Գործադո՞ւլ, թե՞ շանտաժ․ երևանցիների մեծ մասը մնացել է առանց տրանսպորտի
Ավտոբուսի վարորդների գործադուլ Երևանում
Երևանի տասնյակ հազարավոր քաղաքացիներ այսօր առավոտյան մնացել էին կանգառներում։ Հանրային տրանսպորտի շարժակազմերի միայն կեսն է երթուղի դուրս եկել։ Խնդիրը շարունակում է մնալ չլուծված։ Ավտոբուսի վարորդները գործադուլ են անում՝ պահանջելով բարելավել իրենց աշխատանքային պայմանները, բարձրացնել աշխատավարձը։
«Ուզում եմ ներողություն խնդրել երևանցիներից ստեղծված իրավիճակի համար։ Միևնույն ժամանակ՝ հստակ արձանագրեմ, որ որևէ տեսակի շանտաժի չենք տրվելու, կոմպրոմիսի չենք գնալու։ Կազմակերպիչները ենթարկվելու են խիստ պատասխանատվության»,- հայտարարել է քաղաքապետ Տիգրան Ավինյանը։
Արդեն իսկ աշխատանքից ազատվել է 18 վարորդ։ Հիմնավորումն այն է, որ «աշխատողը կատարել է այնպիսի արարք, որի հետևանքով գործատուն կրել է կամ կարող էր կրել նյութական վնաս»։
Քաղաքապետարանի փոխանցմամբ՝ վարորդների կողմից բարձրացված աշխատանքային բնույթի հարցերը պարբերաբար լուծում են ստացել։ Բացի այդ, իրենք վարորդներին հայտնել են, որ ստվերային շրջանառության կրճատմանը զուգընթաց բարելավվելու են աշխատանքային պայմանները։
«Այնուհանդերձ, մեծ թվով վարորդների կողմից հերթական անգամ առաջ են քաշվում անտրամաբանական պահանջներ, որոնք զուգորդվում են շանտաժի դրսևորումներով»,- շեշտել է քաղաքապետի խոսնակ Հայկ Կոստանյանը։
Ի՞նչ են պահանջում վարորդները, քաղաքապետարանի արձագանքը, մեկնաբանություններ սոցցանցերից
«Խոսք էին տվել, որ 150 հազարով կբարձրանա»․ վարորդ
«Խոստումներ էլ եղան, որ 150 հազար էլ պիտի բարձրանա։ Վերջնակետերում ոչ զուգարան կա, ոչ լվացվելու տեղ, ոչ մի պայման չկա։ Ու էսօր պարզվում ա, որ ոչ բարձրացում ա լինելու, ոչ էլ։ Հլը ավելի պակասացնելու են մեր աշխատավարձը։ Ոչ մեկն էլ չի ուզում աշխատի»,- Factor TV-ի հետ զրույցում պատմել է վարորդներից մեկը։
Մեկ այլ վարորդ էլ պատմել է, որ միայն աշխատավարձը չէ հարցը։ Նշել է, որ 14 ժամի փոխարեն 18 ժամ են աշխատում, սակայն հավելյալ վարձատրություն չեն ստանում։
Լրագրողների հետ զրույցներում վարորդներն ասել են, որ աշխատավարձի բարձրացման խոստում են ստացել այն բանից հետո, երբ արգելվել է տրանսպորտի համար վարորդներին առձեռն գումար վճարելը։ Բայց հավաստիացրել են, թե իրենց գործադուլի պատճառը դա չէ։
«Գործադուլ չէ, այլ շանտաժ»
Երևանի քաղաքապետի տեղակալ Սուրեն Գրիգորյանն այսօր կազմակերպված մամուլի ասուլիսի ժամանակ վարորդների գործադուլը կապել է ստվերի դեմ անզիջում պայքարի հետ։
Նշել է, որ եթե մինչև նոյեմբերի 1-ը, երբ վարորդներին դեռևս թույլատրվում էր առձեռն վերցնել տրանսպորտի վճարը, աշխատանքային օրերին միջինում 30-31 մլն դրամ էր հավաքագրվում, փոփոխությունից հետո այդ թիվը մոտեցել է 35 մլն-ին։
«Գումարի աճը պայմանավորված չէ նրանով, որ ավելի շատ մարդիկ են սկսել տրանսպորտից օգտվել»,- նշել է նա և հավելել, որ վարորդները նույնպես ստվերային շրջանառության մաս են կազմել։
Փոխքաղաքապետի խոսքով՝ տրանսպորտային բարեփոխումների ճանապարհը հեշտ չէ, բայց մինչև վերջ են գնալու և «շանտաժի չեն տրվելու»․
«Այս գործողությամբ փորձ է արվում քաղաքային իշխանության վրա ճնշում գործադրել, գեներացնել հանրային դժգոհություն, որ մենք էլ ասենք՝ դե լավ, ժողովուրդ ջան, եկեք մի հատ կոմպրոմիսի գանք, մի քիչ քիչ գողացեք։ Այս խոսակցությունները չեն լինելու»։
Անդրադառնալով վարորդների մատնանշած խնդիրներին՝ նկատել է՝ 150 հազար դրամով աշխատավարձի բարձրացման խոստում չի հնչել, ասել են, որ պարբերաբար կվերանային աշխատավարձը։ Ինչ վերաբերում է արտաժամյա աշխատանքին, ըստ Գրիգորյանի, արդեն իսկ հավելավճար նախատեսվել է, պարզապես վարորդները չեն սպասել մինչև աշխատավարձ ստանալու օրը, որպեսզի տեսնեն՝ այդ գումարն իրենց բավարարո՞ւմ է, թե՞ ոչ։
Քաղաքային իշխանությունը նախատեսում է հունվարի 1-ից անցում կատարել միասնական տոմսային համակարգի։ Մինչև այդ՝ նոյեմբերի 1-ից քաղաքացիները տրանսպորտային ծառայությունների համար վճարում էին բացառապես 100 դրամանոց մետաղադրամը սարքի մեջ գցելով կամ նախապես գնած QR կոդն անցկացնելով։ Դեկտեմբերի 2-ից քաղաքացիները կարող են հանրային տրանսպորտի համար վճարել նաև բանկային քարտով, եթե այն աշխատում է wifi-ով։
Նոյեմբերի 1-ից առաջ թույլատրվում էր նաև 100 դրամանոցի բացակայության դեպքում տրանսպորտի գումարն առձեռն տալ վարորդներին։
Քաղաքապետարանը մեկ ամիս առաջ ուժի մեջ մտած այս փոփոխությունը մեկնաբանում է որպես ստվերի դեմ պայքար, ըստ էության, չբացառելով, որ առձեռն ստացած գումաների մի մասը մնում էր վարորդների գրպանում և չէր հասնում պետբյուջե։
«Վարորդների գործողություններին կտրվի պատշաճ քրեաիրավական գնահատական»
Անդրադառնալով «Երևանի ավտոբուս» ՓԲԸ-ի մեծ թվով վարորդների գործադուլին՝ Երևանի քաղաքապետի խոսնակ Հայկ Կոստանյանը շեշտել է, որ նրանք հրաժարվել են դուրս գալ երթուղիներ «առանց որևէ նախնական ծանուցման»։ Նրա բնորոշմամբ՝ այդ կերպ վարորդները փաստի առաջ են կանգնեցրել առավոտյան աշխատանքի և այլ վայրեր շտապող տասնյակ հազարավոր քաղաքացիների։
Հիշեցրել է՝ ՀՀ աշխատանքային օրենսդրությամբ սահմանվում է, որ քաղաքային հասարակական տրանսպորտի կազմակերպության աշխատակիցները, գործադուլ իրականացնելու մասին առնվազն 14 օր առաջ պարտավոր են ծանուցել այդ մասին և նույնիսկ այդ դեպքում պարտավոր են գործադուլի ընթացքում ապահովել նվազագույն պայմաններ, որոնք «անհրաժեշտ են հասարակության անհետաձգելի կարիքները բավարարելու համար»։
«Տեղեկացնում ենք նաև, որ վերոնշյալ գործողություններին տրվելու է գնահատական աշխատանքային օրենսդրության շրջանակներում, ինչպես նաև դիմելու ենք պատկան մարմիններին՝ վերոնշյալ արարքներին պատշաճ քրեաիրավական գնահատական տալու նպատակով»,-ասել է քաղաքապետի խոսնակը։
Կոստանյանի փոխանցմամբ՝ վարորդների՝ ամսվա ընթացքում 15 օրվա համար վարձատրությունն առանց հարկերի, այսինքն այսպես կոչված «մաքուր աշխատավարձը» կազմում է՝
- MAN ավտոբուսների դեպքում 401 500 ՀՀ դրամ,
- Zhong Tong՝ 309 500 ՀՀ դրամ,
- Gazel City՝ 219 500 ՀՀ դրամ:
«Միասնական տոմսային համակարգի ներդրմանը [ամբողջությամբ կգործի հունվարի 1-ից] զուգահեռ էականորեն կրճատվել է ստվերային շրջանառությունը։ Եվ այս գործընթացը շարունակական է լինելու»,- վստահեցրել է նա։
Մեկնաբանություններ սոցցանցերից
«Պարոն քաղաքապետ, որևէ կերպ կոմպրոմիսի գնալը ուղիղ հարված կլինի ժողովրդին։ Մեզ հետ շանտաժի ու ուլտիմատումի լեզվով որևէ մեկը չի հարող խոսել, ժողովուրդը առաջվա միամիտը չէ»։
«Կարելի է հասկանալ մարդկանց դժգոհությունը և կոմպրոմիսի գնալ։ Եթե որոշել եք թանկացնել տրանսպորտը, ինչը ես անհիմն եմ համարում, ուրեմն նաև պետք է բարելավել աշխատակիցների (վարորդների) պայմանները և վարձավճարը»։
«Ավինյան Տիգրան, դու կարա՞ս նման պայմաններում աշխատես, տարրական պայմաններ չունեն, տուալետ չունեն, կեղտոտ վիճակ ա։ Մենակ մեղադրեք։ Լավ բան չեք անում»։
«Բա դրանց մուննաթով քշելու ձևը ու կոպիտ խոսելը (իհարկե ոչ բոլորինը)… 1 միլիոն էլ ստանան, մեկ ա՝ դժգոհ են լինելու, որովհետև լևի փողից զրկվել են»։
«Վարորդներն էլ բոլորիս նման քաղաքացիներ են։ Ձեզ շվայտություններ շռայլելու փոխարեն մարդկանց տարրական հարմարություններ ապահովեք»։
«Ազատել աշխատանքից, ընդունել բարեխիղճ վարորդների, սովոր են թալանի, դրանց մի տես»։
Հետևեք մեզ — Facebook | Youtube | Telegram
Ավտոբուսի վարորդների գործադուլ Երևանում
