Նոր տրանսպորտային միջանցքների ստեղծում, որոնք կկապեն Հայաստանը, Ադրբեջանն ու Ռուսաստանը
Հայաստանը, Ադրբեջանն ու Ռուսաստանը միմյանց կապող նոր տրանսպորտային միջանցքների վերաբերյալ գործնական որոշումներ են կայացրել Մոսկվայում հունվարի 30-ին եռակողմ աշխատանքային խմբի առաջին նիստին։
Երեք երկրների փոխվարչապետները պայմանավորվել են մի քանի փորձագիտական ենթախմբեր ձևավորել, մասնավորապես․
- երկաթուղային և ավտոմոբիլային փոխադրումների հարցերով,
- դրանց անվտանգության ապահովման հարցերով,
- փոխադրումների ժամանակ մաքսային, սանիտարական և անասնաբուժական վերահսկողության կազմակերպման հարցերով։
Ենթախմբերը պետք է ստեղծվեն մինչև փետրվարի 2-ը, մինչև փետրվարի 5-ը դրանք պետք է առաջին քննարկումներն անցկացնեն։
Ի՞նչ տրանսպորտային ուղիներ են քննարկվում
Հարավային Կովկասում նոր երկաթուղային և ավտոմոբիլային ուղիները թույլ կտան բացել մի քանի տրանսպորտային փակուղի, մասնավորապես․
- Կօգնեն կապել Ադրբեջանի կազմում Նախիջևանի Ինքնավար Հանրապետությունը երկրի մյուս մասին, ինչի համար ճանապարհ կբացվի Հայաստանի տարածքով։ Ներկա պահին այստեղ տեղաշաժը հնարավոր է միայն օդով կամ Իրանի տարածքով։
- Հայաստանից Ադրբեջանի տարածքով դեպի Ռուսաստան տանող ավտոմոբիլային և երկաթուղային ուղիներ կբացվեն։ Ներկա պահին Հայաստանից դեպի Ռուսաստան տանող միակ և Հայաստանի համար ծայրահեղ կարևոր ցամաքային ուղին անցնում է Վրաստանով, այն ծանրաբեռնված է և հաճախ փակ է եղանակային պայմանների պատճառով։
- Ռուսաստանն ու Թուրքիան Հայաստանի և Ադրբեջանի տարածքով առաջին անգամ ցամաքային հաղորդակցության հնարավորություն կստանան։
Հարավային Կովկասում տարանցիկ ուղիները բացելու եռակողմ որոշման մասին
2021 թ․ հունվարի 11-ին Հայաստանի, Ադրբեջանի և Ռուսաստանի ղեկավարների մոսկովյան հանդիպմանը որոշում է կայացվել հատուկ աշխատանքային խմբի ստեղծման մասին։ Այս խմբի պարտականությունների թվում 2020 թ-ի նոյեմբերի 10-ին երեք երկրների ստորագրած մյուս եռակողմ համաձայնագրի իններորդ կետի իրականացումն է։
Այդ համաձայնագրով հրադադար հաստատվեց Արցախում, որտեղ պատերազմ էր ընթանում 2020 թ․ սեպտեմբերի 27-ից մինչև նոյեմբերի 10-ը։ Այն, տարբեր հաշվարկներով, 5-10 հազար մարդու կյանք է խլել երկու կողմից։
Տրանսպորտային միջացքների բացման ուղղությամբ հետագա քայլերը
Եռակողմ աշխատանքային խմբի հաջորդ հանդիպումը որոշվել է անցկացնել Մոսկվայում։ Դրա ամսաթիվը համաձայնեցվելու է համանախագահների կողմից, ասված է ՌԴ կառավարության մամուլի ծառայության հաղորդագրությունում։
Կովկասում նոր տրանսպորտային միջանցքներին միանալու հետաքրքրություն է հայտնել Իրանը։ Այդ երկրի արտգործնախարար Ջավադ Զարիֆը 2021 -ի հունվարի վերջին օրերին այցելել էր Ադրբեջան, Հայաստան և Թուրքիա։ Այդ այցերի ժամանակ նա հանդիպել է երեք երկրների առաջնորդներին, ինչպես նաև Նախիջևանի խորհրդարանի խոսնակին։
