ԱԺ ընդդիմադիր «Հայաստան» խմբակցությունը Հայաստանի կառավարությունից պահանջում է զերծ մնալ գրավոր կամ բանավոր համաձայնություններից, որոնք կխախտեն երկրի Սահմանադրության պահանջներն ու Անկախության հռչակագրով արտահայտված հայ ժողովրդի հավաքական կամքը։
Ընդդիմադիր խմբակցությունը սահմանագծման և սահմանազատման խնդիրներին վերաբերող խորհրդարանական լսումներ է նախաձեռնել՝ շրջանառելով Ազգային ժողովի հայտարարության նախագիծ։ Այն ներկայացրել է ԱԺ փոխնախագահ Իշխան Սաղաթելյանը։
Հայտարարությամբ «Հայաստան» խմբակցությունը դատապարտել է Ադրբեջանի կողմից Արցախի տարածքների բռնազավթումը, Հայաստանի ինքնիշխան տարածք ներխուժումները, ուժի գործադրման իրական սպառնալիքները, ինչպես նաև ռազմական գործողությունների դադարից հետո գերեվարված, պատանդառված անձանց նկատմամբ արձանագրվող միջազգային իրավունքի կոպտագույն խախտումները, այդ թվում՝ կեղծ դատավարությունների պատրվակով նրանց չվերադարձնելը:
«Ադրբեջանի կողմից վերը նշված հանցավոր գործողությունները շարունակվում են՝ ուղեկցվելով Հայաստանի ու Արցախի տարածքների նկատմամբ հավակնություններով, այդ տարածքներում բնակվող խաղաղ բնակիչների նկատմամբ ահաբեկչություններով, բռնազավթված բնակավայրերում սրբավայերի ու պատմական հուշարձան հանդիսացող եկեղեցական կառույցների սրբապղծմամբ», — ասված է հայտարարությունում։
Անդրադառնալով սահմանագծման և սահմանազատման խնդրին՝ խմբակցությունը հիշեցրել է, որ սահմանները որոշվում են սահմանակից պետությունների միջև միջազգային իրավունքի վրա հիմնված համաձայնության միջոցով՝ ՄԱԿ-ի «Միջազգային պայմանագրերի իրավունքի մասին» Վիեննայի կոնվենցիայի համաձայն։
Ըստ կոնվեցիայի դրույթների՝ առոչինչ է ուժի սպառնալիքի կամ այն կիրառելու միջոցով ցանկացած միջազգային համաձայնություն:
«Հայաստան» խմբակցությունը համոզված է, որ պետք է առաջնորդվել ՀՀ Սահմանադրությամբ և Հայաստանի տարածքի փոփոխությանը վերաբերող հարցերը լուծել բացառապես հանրաքվեի միջոցով, ինչպես նաև ՀՀ Գերագույն խորհրդի 1992 թ. հուլիսի 8-ի որոշմամբ:
Արցախը չի կարող ընդգրկվել Ադրբեջանի տարածքային ամբողջականության շրջանակներում։ Հայաստանն էլ չունի որևէ միջազգային կամ իրավական պարտավորություն՝ հիմք ընդունելու որևէ քարտեզով արձանագրված սահմանները։
«Հայաստան» խմբակցության հայտարարության համաձայն՝ ՀՀ-ն պաշտոնապես ներկայացնող որևէ անձ չի կարող գրավոր կամ բանավոր համաձայնության գալ՝ խախտելով Արցախի Հանրապետությանը և Հայաստանի Հանրապետությանը վերաբերող վերը նշված հիմնարար իրավական նորմերը․
«Այդպիսի ցանկացած համաձայնություն ի սկզբանե առոչինչ է»։
Ընդդիմադիր խմբակցությունը Հայաստանի կառավարությունից պահանջել է․
զերծ մնալ որևէ բանակցությունից, գրավոր կամ բանավոր համաձայնություններից, որոնք կխախտեն Հայաստանի Հանրապետության Սահմանադրության պահանջներն ու հայ ժողովրդի հավաքական կամքը արտահայտված Անկախության հռչակագրով:
Հայաստանի և Ադրբեջանի միջև սահմանագծման և սահմանազատման վերաբերյալ հարցը որևէ կերպ չտարանջատել Արցախի ժողովրդի՝ իր պատմական տարածքում ինքնորոշման իրավունքի երաշխավորված իրացումից:
«Հայաստան» խմբակցությունը միջազգային կազմակերպություններին, բարեկամ երկրների խորհրդարաններին կոչ է արել դատապարտել Ադրբեջանի ն Թուրքիայի կողմից իրականացված և շարունակվող հանցագործություններն ու ձեռնարկել գործողություններ վերջիններիս իրավական պատասխանատվության ենթարկելու ուղղությամբ։
