ԱՄՆ նախագահին իշխանությունից հեռացնելը հաստատվել է առաջին փուլում։ Բայց ինչո՞ւ են բոլորը վստահ, որ նա հազիվ թե ժամկետից շուտ հեռանա
ԱՄՆ կոնգրեսի ներքին պալատը դեկտեմբերի 18-ին քվեարկել է իմպիչմենտի՝ ԱՄՆ նախագահին երկու մեղադրանքով իշխանությունից հեռացնելու օգտին․ իշխանության չարաշահում Ուկրաինայի վրա ճնշում գործադրելիս և Կոնգրեսի հետաքննության խոչընդոտում, հաղորդում է CNN-ը։
Սակայն, ինչպես նշում են փորձագետներն, այս որոշումը հազիվ թե նշանակի, որ Դոնալդ Թրամփը լքելու է իր պաշտոնը դեռևս նախքան նախագահական ընտրությունները, որոնք անցկացվելու են 2020 թ-ին։ Վերջնական որոշումը պետք է ընդունի ԱՄՆ Սենատն, իսկ այնտեղ մեծամասնությունը պատկանում է Թրամփի՝ Հանրապետական կուսակցության ներկայացուցիչներին։
Ավելին, մեկնաբաններից շատերը կարծում են, որ իմպիչմենտի հետ կապված այս ողջ պատմությունը, հնարավոր է, ավելացրել է 2020 թ-ի նախագահական ընտրություններում Թրամփի հաղթանակի շանսերը, քանի որ միավորել է նրա կողմնակիցներին։
• Ուկրաինան Թրամփի շանտաժի զո՞հն է: Հինգ սկանդալային փաստ՝ ամերիկացի դիվանագետից
• Մեկնաբանություն: Ինչո՞ւ Թրամփը ոչ ոքի չի վստահում
Ինչի՞ համար է մեղադրվում Թրամփը
Նախագահը մեղադրվում է երկու հոդվածով՝ պաշտոնեական դիրքի չարաշահում և Կոնգրեսի աշխատանքի խոչընդոտում։
Մեղադրանք 1
Թրամփը կասեցրել էր ԱՄՆ կողմից Ուկրաինային տրամադրվող ռազմական օգնությունը և այն վերականգնելու դիմաց նա Ուկրաինայի նախագահ Վլադիմիր Զելենսկուց համառորեն պահանջել է հետաքննել այդ երկրում ԱՄՆ նախկին փոխնախագահ Ջո Բայդենի որդու գործունեությունը․ Ջո Բայդենը կարող է 2020թ-ի նախագահական ընտրություններին Թրամփի մրցակիցը լինել։
Մեղադրանք 2
Երբ սա հայտնի էր դարձել, և Կոնգրեսը սկսել էր հետաքննել այս գործը, Թրամփը Սպիտակ տան աշխատակիցներին արգելել էր համագործակցել Կոնգրեսի հետ և քննարկումներին ներկայանալ։
Երկու կետերով էլ Ներկայացուցիչների պալատի անդամների մեծ մասը Թրամփին մեղավոր է ճանաչել։
Ի՞նչ են ցույց տվել առանցքային վկաները
Մի քանի բարձրաստիճան դիվանագետ, այդ թվում՝ Ուկրաինայում ԱՄՆ նախկին և գործող դեսպանները, Սպիտակ տան արգելքը խախտելով, ելույթ է ունեցել Ներկայացուցիչների պալատում լսումների ժամանակ։
Նրանք բոլորը հաղորդել են, որ նախագահ Թրամփն Ուկրաինայի իշխանության հետ կապի ոչ պաշտոնական ալիք է ստեղծել՝ շրջանցելով ավանդական դիվանագիտական կապերը։
Ըստ վկաների՝ Դոնալդ Թրամփի նպատակն Ուկրաինայի նախագահին ստիպելն է եղել, որ նա հանրային կերպով հայտարարի ԱՄՆ նախկին փոխնախագահ Բայդենի որդու նկատմամբ հետաքննություն սկսելու մասին։
Որպես ճնման գործիք ԱՄՆ նախագահը կասեցրել էր Ուկրաինային ԱՄՆ կողմից տրամադրվող 300 մլն դոլար ռազմական օգնության տրամադրումը։ Այն վերականգնվել է, միայն երբ սկանդալը հանրանացվել էր։
Ի՞նչ է լինելու
Հավանաբար, արդեն 2020 թ-ի հունվարին իմպիչմենտի մասին հարցը քննարկելու է Կոնգրեսի վերին պալատը՝ Սենատը։ Այնտեղ մեածմասնությունը հանրապետականներինն է (Թրամփի կուսակցությունը), և նրանք արդեն հայտարարել են, որ դեմ են հանդես գալու դրական որոշմանը։
Այսպիսով, Թրամփն Էնդրյու Ջեքսոնից և Բիլ Քլինթոնից հետո երրորդ նախագահն է դառնալու, որին իմպիչմենտ է ներկայացվել Ներկայացուցիչների պալատում, սակայն այն չի հաստատվել Սենատում։
Սակայն դիտորդների մեծ մասն այն կարծիքին է, որ դեմոկրատները Կոնգրեսում իրատեսական են գնահատել իրենց շանսերը։ Նրանք չէին էլ սպասում, որ Սենատը համաձայնելու է իմպիչմենտին։
Նրանց գլխավոր նպատակը 2020 թ-ին Թրամփի վերընտրման շանսերն առավելագույնս նվազեցնելն էր։
Սակայն այլ կարծքիք էլ կա․ իմպիչմենտի հետ կապված սկանդալը, հնարավորր է, միայն ամրապնդի Թրամփի դիրքերը գալիք ընտրություններում։
