«Փաստ է՝ ՌԴ-ն մեզ մենակ թողեց ամենանեղ պահին»․ Ալեն Սիմոնյան
Ալեն Սիմոնյանի հարցազրույցը Հ1-ին
«Հայաստանը սառեցրել է իր մասնակցությունը ՀԱՊԿ-ին մինչև հասկանանք՝ կազմակերպությունը կա՞, թե՞ չկա, գործո՞ւմ է, դո՞ւրս է գալիս մեր տարածաշրջանից, պատրաստվո՞ւմ է գոնե զանգ կատարել Ադրբեջանին և ասել, որ Ջերմուկը ՀԱՊԿ-ի տարածք է»,– հայտարարել է Հայաստանի ԱԺ նախագահ Ալեն Սիմոնյանն ու հավելել, որ նման արձանագրում անելու համար գալու և տեղում դիտարկումներ անելու կարիք չկա։
Հանրային հեռուստաընկերության եթերում խորհրդարանի խոսնակը հայտարարել է՝ «որևէ մեկը Ռուսաստանի դեմ որևիցե բան չի անում»։ Նրա դիտարկմամբ՝ Մոսկվան է հայկական կողմին «առնվազն մենակ թողել» կամ այն, ինչ կատարվել է, տեղի է ունեցել ռուսական կողմի իմացությամբ։
Հարցազրույցի ընթացքում Սիմոնյանն անդրադարձել է նաև ոչ անկլավային գյուղերն Ադրբեջանին վերադարձնելուն և ԵՄ-ին ՀՀ հնարավոր անդամակցությանը։
Փորձեցին ներքաշել նոր պատերազմի մեջ, որ «փրկեն» ՀՀ-ն
Ռուսաստանի քայլերի մասին նման կարծիք է հայտնել Ալեն Սիմոնյանը։ Նրա խոսքով՝ ի դեմս Մոսկվայի՝ Երևանն ուներ «ընկեր և դաշնակից», որը, սակայն, չպաշտպանեց նրան, երբ ժամանակը եկավ։ Ասում է՝ նույնիսկ դրանից հետո հայկական կողմը հույս ուներ, թե դաշնակիցն իրեն կօգնի․
«Հետո մեզ նորից խաբեցին, խաբեցին, խաբեցին, խաբեցին, վերջում էլ փորձեցին ներքաշել նոր պատերազմի մեջ արդեն ՀՀ տարածքում [2022 թ․ սեպտեմբերին Ադրբեջանի հարձակում ՀՀ ինքնիշխան տարածքի վրա], որպեսզի գան և «փրկեն» ՀՀ-ն»։
Հայտարարել է՝ փաստ է, որ Ռուսաստանն ամենանեղ պահին թողել է դաշնակցին:
Անվտանգության ռուսական համակարգը «չի գործում և չի գործել»
Հարցին՝ ի՞նչ կարծիքի է ընդդիմության այն պնդումների մասին, որ եթե Ռուսաստանը դուրս գա տարածաշրջանից, նրան կփոխարինի Թուրքիան, ԱԺ նախագահը պատասխանել է․
«Մենք մի բանում ենք վստահ, որ այս տարբերակով ակնհայտ պրոբլեմներ ունենք։ Հիմա շարունակենք այդ նույն արգելակ չունեցող մեքենայով շարժվե՞լ՝ հույսով, որ կսեղմենք ու մի պահ կկանգնի գործընթացը»։
Սիմոնյանի խոսքով՝ «անընդհատ են սեղմել»՝ դիմել են ՌԴ-ին, ՀԱՊԿ-ին, խնդրել ու աղաչել, բայց ապարդյուն․
«Ակնհայտ է, չէ, որ այս մեկը [անվտանգության համակարգը] չի աշխատում: Հիմա փորձում ենք մեր երկիրը պաշտպանել բոլոր հնարավոր միջոցներով և դրա մեջ մեզ մեղադրելը, ինձ թվում է, սխալ է»:
«Ամենաճիշտ ու ամենացանկալի տարբերակը» ԵՄ-ին անդամակցելն է
Ազգային ժողովի նախագահի խոսքով՝ հայ ժողովուրդը կիսում է «եվրոպական ընտանիքի, եվրոպական արժեքների, ժողովրդավարության այդ համակարգը»։ Ըստ նրա՝ Հայաստանի մասին նման ընկալում կա նաև արտերկրում։ Կարծում է՝ խնդիրը ԵՄ անդամության թեկնածու դառնալու գործընթացն է․
«Պետք է հասկանանք՝ այդ գործընթացը ինչ ձևով ենք անում։ Դա ուղղակի դիմումով չի, շատ բաներ պետք է համապատասխանեցնենք եվրոպական ստանդարտներին: Այո΄, դա այն արժեհամակարգն է, որին մենք պետք է ձգտենք»։
Ալեն Սիմոնյանի փոխանցմամբ՝ ապրիլի կեսերին Իսպանիայում տեղի է ունենալու ԵՄ երկրների ԱԺ նախագահների հավաք, առաջին անգամ մասնակցության հրավեր է ստացել նաև Երևանը։
«Եթե չեմ սխալվում որևէ հետխորդային երկիր նման հրավեր չունի, նույնիսկ հավակնորդ [ԵՄ անդամության թեկնածու] երկիր։ Վերաբերմունքը աշխատանքային առումով շատ բարձր մակարդակի վրա է»,- ընդգծել է նա:
«Այն, ինչ մերն է, չենք պատրաստվում զիջել»
Անդրադառնալով Տավուշի մարզում գտնվող 4 ոչ անկլավային գյուղերն Ադրբեջանին վերադարձնելու թեմային՝ Սիմոնյանն ասել է՝ իշխանությունները չեն պատրաստվում նույնիսկ քննարկել ՀՀ որևէ տարածքի «հանձնում»։ Սիմոնյանն իր հետ եթեր է բերել նաև քարտեզ՝ ցույց տալու համար, թե Տավուշի մարզի սահմանամերձ շրջաններում որտեղով է անցնում ՀՀ- Ադրբեջան սահմանագիծը՝ ըստ Ալմա Աթայի հռչակագրի: Վստահեցրել է՝ Ադրբեջանի մատնանշած գյուղերի ցանկում Ոսկեպարը չկա։ Նման պնդումներ անողներն, ըստ նրա, դա անում են կամ անգրագիտությունից կամ էլ սադրելու և ՀՀ-ում ներքաղաքական պրոցես սկսելու համար:
«Մենք պատրաստ ենք այդ կտորում անել դեմարկացիա։ Ինչ մերն է, մնալու է մերը, ինչը իրենցն է, թող մնա իրենց»,- հայտարարել է նա։
Խոսելով նշված հատվածով անցնող կոմունիկացիաների մասին ասել է, թե այդտեղ գազատար չկա։
ԱԺ նախագահը վստահեցրել է՝ իշխանությունները չեն պատրաստվում ՀՀ տարածքից որևէ բան զիջել այն պայմանով, որ պատերազմ չլինի: Նրա գնահատմամբ՝ Հայաստանն այս գործընթացին չի գնում սպառնալիքի տակ, դա արվում է, որովհետև «պետք է ՀՀ-ին»։
«Երբ որ մենք ասում ենք՝ ՀՀ-ն կադաստրի վկայական ունենա, դա վերացական բան չի կարող լինել»,- հիշեցրել է նա։
Պատասխանելով հարցին, թե արդյո՞ք այդ ժամանակ Ադրբեջանը կճանաչի գոյություն ունեցող սահմանը՝ Սիմոնյանն ասել է․
«Բա ի՞նչ պիտի անի։ Իհարկե, երբ որ ինքը ճանաչում է մեր սահմանը, ինքը դրանով ճանաչում է իր սահմանը, այստեղ Ադրբեջանի սահմանը կապված է նաև մեր ճանաչելով»։
Հետևեք մեզ — Facebook | Youtube | Telegram
Ալեն Սիմոնյանի հարցազրույցը Հ1-ին
