«Թշնամանքի էջը երկուստեք փակել ենք»․ ՀՀ ԱԺ նախագահի արձագանքը Ֆիդանին
Ալեն Սիմոնյանի արձագանքը Հաքան Ֆիդանին
«Շնորհակալություն եմ հայտնում Թուրքիայի արտաքին գործերի նախարարին և տարածաշրջանային մեր բոլոր այն գործընկերներին, որոնք աջակցում են Հայաստանի հանրության մեծամասնության՝ խաղաղության գնալու և առևտուր անելու, ինչպես նաև TRIPP-ի շրջանակներում այդ առևտուրը զարգացնելու կոչերին»,– լրագրողների հետ ճեպազրույցում հայտարարել է ՀՀ Ազգային ժողովի նախագահ Ալեն Սիմոնյանը։
Նախօրեին Թուրքիայի ԱԳ նախարար Հաքան Ֆիդանը խոսել էր տարածաշրջանային խնդիրների լուծման հարցում Հայաստանի, Ադրբեջանի և Թուրքիայի ղեկավարության քաղաքական կամքի, ինչպես նաև ՀՀ-ում սպասվող կարևոր իրադարձությունների մասին։
«Հունիսի սկզբին ՀՀ-ում սպասվում են ընտրություններ, կարևոր փուլ է լինելու։ Ներկայում տեսնում ենք, որ հարցումներում պարոն Փաշինյանն է առաջատարը։ Եվ մենք այս հարցում [տարածաշրջանային գործընթացների] նրա կատարած կառուցողական դերին իսկապես աջակցում ենք։ Անրաժեշտ է, որ այդ [քաղաքական] գիծն ու կամքը շարունակվեն»,- հայտարարել էր Ֆիդանը։
Հայաստանի խորհրդարանի նախագահի խոսքով՝ Ֆիդանն արտահայտել է իր կարծիքը, և չի կարելի դա ներկայացնել որպես «արտաքին միջամտության փորձ», ինչպես փորձում են անել մի շարք տեղական լրատվամիջոցներ և փորձագետներ։ Վերջիններս Ֆիդանի հայտարարությունից հետո զուգահեռներ են անցկացնում ռուս պրոպագանդիստ Սոլովյովի հայտարարությունների հետ։
ԱԺ խոսնակը դրական է գնահատել Ֆիդանի հայտարարությունը։ Հերթական անգամ հայտարարել է, որ «խաղաղությունը տարածաշրջանում այլևս իրողություն է»։
«Թշնամանքի էջը կարողացել ենք երկուստեք փակել՝ թե՛ մենք՝ հայերս, թե՛ թուրքերը: Եվ մենք պետք է ամրապնդենք այս խաղաղությունը»,- արձանագրել է նա։
Ճեպազրույցում Սիմոնյանն անդրադարձել է մի շարք այլ թեմաների, այդ թվում՝ «Թրամփի ուղի» նախագծին, «Արևմտյան Ադրբեջան» թեզին։
Կարևոր դրվագները՝ ստորև
- Հնարավո՞ր է հայ-թուրքական կարգավորում առանց Բաքվի․ Երևան-Անկարա հեռակա բանավեճ
- «Հայաստան-Թուրքիա կարգավորման պահը մոտենում է»․ Փաշինյան
- Արարատ լեռան պատկերը կհանվի ՀՀ-ի սահմանահատման կնիքի վրայից․ Թուրքիայի պահա՞նջն է
«Գալիք ընտրություններում մեծամասնություն ենք կազմելու»
ԱԺ նախագահը հաստատել է՝ «Քաղաքացիական պայմանագիրն» ավարտել է նախընտրական ցուցակի ձևավորման գործընթացը։ Նրա փոխանցմամբ՝ ծանր ու դժվար աշխատանք է եղել, ամեն նիստ ձգվել է 6-8 ժամ։
«99 տոկոս որոշումները կայացվել են կոնսենսուսով»,- հայտարարել է նա։
Սիմոնյանի փոխանցմամբ՝ ցուցակում կլինեն ինչպես արդեն ծանոթ գործիչներ, այնպես էլ նոր դեմքեր։
««Քաղաքացիական պայմանագիր» կուսակցության ցուցակում ընդգրկվելու համար դիմել է գրեթե 400 մարդ։ Դա ցուցիչ է, որ մարդիկ շատ լավ գիտակցում են՝ ՀՀ գալիք ընտրություններում ՔՊ-ն մեծամասնություն է կազմելու։ Եվ դրա համար որևէ մեկին պարգևավճար տալու և դրանով խրախուսելու կարիք չկա»,- նշել է նա՝ արձագանքելով պնդումներին, թե ընտրությունների նախաշեմին պատգամավորների և կառավարության անդամների պարգևատրումները «նախընտրական քայլեր» են։
«Չե՞ք տեսնում, որ բան է փոխվել». «Արևմտյան Ադրբեջան» թեզի մասին
Լրագրողները պնդել են՝ ՀՀ իշխանությունները խոսում են հաստատված խաղաղության մասին, մինչդեռ հարևան Ադրբեջանի նախագահն անձամբ է ֆինսանավորում այսպես կոչված «Արևմտյան Ադրբեջան» թեզի տարածումը։
ԱԺ նախագահ Ալեն Սիմոնյանը պատասխան է, որ «անշնորհակալ գործ է մտածել, թե Ադրբեջանում որևէ քաղաքական նարատիվ կարող է գոյություն ունենալ առանց երկրի ղեկավարի իմացության»։ Ասել է՝ ֆինանսավորման մասին տեղեկությունների չի տիրապետում։
Ինչ վերաբերում է «Արևմտյան Ադրբեջան» թեզին, ըստ որի՝ ՀՀ ողջ ինքնիշխան տարածքը ներկայացվում է որպես «պատմական ադրբեջանական հող», Սիմոնյանը նշել է, որ նման հայտարարություններ տեսնում են, այդ ուղղությամբ աշխատում են ադրբեջանական կողմի հետ․
«Այդ հայտարարութունները փոխվում են: Իրենց նախագահի, խորհրդականի, ԱԳ նախարարի 3-4 տարի առաջվա հայտարարությունները համեմատեք այսօրվա հայտարարությունների հետ։ Չե՞ք տեսնում, որ բան է փոխվել, թե՞ ես ուրիշ երկրում եմ»։
Սիմոնյանն ակնարկել է, որ ժամանակին ինքն էլ է հարևան երկրի տարածքը ներկայացրել որպես հայրենիք՝ նկատի ունենալով Աղդամից արված իր լուսանկարը։
«Իմ արածները, մեր արածները՝ հեչ, իրենց արածները՝ մե՞ջ, ուզում եմ հասկանալ»,- հարցրել է պաշտոնյան։
ԱԺ նախագահի գնահատմամբ՝ հաստատված խաղաղությունն ունի խնդիրներ, բայց այն պետք է փայփայել և փորձել առաջ տանել։
«Իհարկե, Ադրբեջանի կողմից արված քայլեր կան, որոնք բացասական են, և մենք իրենց դրա մասին ասում ենք: Նրանք, իրենց հերթին, մեզ են ասում»,- նկատել է նա։
«Առնվազն 49 տարով ԱՄՆ-ն անվտանգություն է բերելու ՀՀ-ին». TRIPP-ի մասին
Խոսելով «Թրամփի ուղի» (TRIPP) նախագծի մասին՝ Սիմոնյանը շեշտել է՝ պայմանագիրը կնքվել է առնվազն 49 տարով, ինչը նշանակում է, որ «առնվազն 49 տարով ԱՄՆ-ն ինչ-որ չափով՝ բավականին մեծ, նաև անվտանգություն է բերելու ՀՀ սահմաններին և տարածքին»։
«TRIPP-ը նաև անվտանգային համակարգ է ոչ միայն այն պատճառով, որ մենք [Ադրբեջանի հետ] առևտուր ենք անում և դա ամրապնդում է [խաղաղությունը]: ԱՄՆ-ն հետաքրքրություն ունի այստեղ: Դա նշանակում է, որ բացի մնացած գործընկերներից՝ եվրոպացի, ռուսաստանցի, որոնք իրենց տնտեսական շահերն ունեն, Նահանգները՝ նույնպես [շահ ունի]»,- մանրամասնել է նա։
Խորհրդարանի խոսնակը հիշեցրել է՝ երկար ժամանակ Երևանն այլ տրամաբանությամբ է առաջնորդվել․
«Մի կենտրոնի հետ ընկերություն ենք արել: Այդ մի կենտրոնը, երբ իրեն հարմար է եղել, ուրիշ տեղ գործ է ունեցել անելու, մեզ մանրադրամի տեղ բան ա արել [օգտագործել]»։
Այժմ, ըստ նրա, Հայաստանը վարում է այլ քաղաքականություն, հարաբերություններ է կառուցում իր անմիջական հարևանների հետ։ Բացի այդ, ՀՀ-ն դաշնակցային հարաբերություններ ունի տարբեր երկրների հետ, այդ թվում՝ Եվրամիության անդամ երկրների, Իրանի հետ։
Հետևեք մեզ — Facebook | Youtube
Ալեն Սիմոնյանի արձագանքը Հաքան Ֆիդանին
