Վրաստանում ընդդիմադիր դաշինքը մեկնարկել է ազգային մոբիլիզացիայի արշավ
Ազգային մոբիլիզացիայի արշավ Վրաստանում
Վրաստանի ընդդիմադիր կուսակցությունների դաշինքը մարտի 31-ին հայտարարել է ազգային մոբիլիզացիայի արշավի մեկնարկի մասին։ Արշավը կամփոփվի մայիսի 26-ին՝ Անկախության օրը նախատեսված մասշտաբային հանրահավաքով։
Դաշինքի հայտարարությունը ճեպազրույցի ժամանակ ներկայացրել է «Գիրչի՝ ավելի շատ ազատություն» կուսակցության առաջնորդ Զուրաբ Ջափարիձեն։ Նրա խոսքով՝ քարոզարշավի մեկնարկի ամսաթիվը խորհրդանշականորեն կապված է 1991 թվականի մարտի 31-ի հանրաքվեի հետ, երբ Վրաստանի քաղաքացիներն արտահայտեցին անկախությունը վերականգնելու իրենց ցանկությունը։ Նա նաև հիշեցրել է 1918 թվականի մայիսի 26-ը, երբ առաջին անգամ հռչակվեց Վրաստանի անկախությունը։
Հայտարարության մեջ նշվում է, որ երկու ամսաթվերն էլ՝ մարտի 31-ը և մայիսի 26-ը, երկրի պատմության ամենակարևոր հանգրվաններից են և կապված են պետական անկախության հետ։
Դաշինքի գնահատմամբ՝ այսօր Վրաստանը կրկին կանգնած է նմանատիպ մարտահրավերի առաջ։
Ըստ ընդդիմադիր դաշինքի՝ հայտարարված քարոզարշավը նախատեսված է լայն հանրության մասնակցությունը խրախուսելու համար։ Նախաձեռնության նպատակն է ամրապնդել քաղաքացիների հետ անմիջական շփումը, չեզոքացնել «ռեժիմի քարոզչությունը», հանրային բողոքի ցույցերն ու փոփոխությունների պահանջները վերածել քաղաքական գործողությունների, հաղթահարել վախը և ավելացնել բողոքի ակցիաների մասնակիցների թիվը։
Արշավը կտևի երկու ամիս, այսինքն՝ մինչև մայիսի 26-ին Թբիլիսիում կայանալիք ակցիան։
Դաշինքի անդամներն այլ քաղաքական և քաղաքացիական խմբերին, ինչպես նաև ակտիվ քաղաքացիներին կոչ են արել միանալ գործընթացին: Հայտարարության մեջ նրանք իրենց երախտագիտությունն են հայտնել նրանց, ովքեր «ռեժիմի գերիներ» են կամ կանգնած են նման ռիսկի առաջ, ինչպես նաև նրանց, ովքեր տարբեր ձևերով մասնակցում են Վրաստանում ընթացող բողոքի ցույցերին։
«Մենք ոչ մեկին չենք խոստանում հեշտ ճանապարհ կամ հրաշքներ, բայց գիտենք՝ եթե չգործենք, ոչինչ չի փոխվի: Եթե գործենք, ռեժիմի փոփոխությունը կլինի միայն ժամանակի և վճարվող գնի հարց»,— ասված է հայտարարության մեջ:
