ՄԻԵԴ-ը տուգանել է Ադրբեջանին 4 ԶԼՄ-ների կայքերի արգելափակման համար
«Ազատություն» ռադիոկայանն ու մյուսները՝ ընդդեմ Ադրբեջանի»
Հունիսի 13-ին Մարդու իրավունքների եվրոպական դատարանը (ՄԻԵԴ) հրապարակեց Ադրբեջանից ուղարկված բողոքների վերաբերյալ ևս երկու որոշում։ Առաջին գործը վերաբերում է հանրապետությունում չորս լրատվամիջոցների կայքերի արգելափակմանը, իսկ երկրորդը՝ «Նարդարանի դեպքերի» առնչությամբ ձերբակալվածներին։ Ընդհանուր առմամբ, այս երկու որոշումների համար Ադրբեջանի իշխանությունները տուգանվել են 77․500 եվրոյով։
- «Ինքնասպանությո՞ւն», թե՞ միջամտություն ՀՀ ներքին գործերին. Ալիևի հայտարարության մասին
- ԱՄՆ-ն Վրաստանի իշխանությունների դեմ պատժամիջոցների առաջին փաթեթն է ընդունել
- Վրաստանի խորհրդարանի խոսնակի գրառումից հետո ակտիվիստին ծեծի են ենթարկել
«Ազատություն» ռադիոկայանն ու մյուսները՝ ընդդեմ Ադրբեջանի»
Դատարանը ճանաչել է արգելափակված չորս լրատվամիջոցների կողմից ներկայացված խախտումները։ Դրանք են՝ «Ազատություն» ռադիոկայանը (azadliq.org), «anaxeber.az» առցանց լրատվական պորտալի հիմնադիր և խմբագիր Ազեր Թալիբովը, az24saat.org առցանց լրատվական պորտալի հիմնադիր Վուգար Ալաքբարովը և хural.com. կայքի գլխավոր խմբագիր Ավազ Զեյնալլին։
2017-2018 թվականներին փոփոխություններ են կատարվել «Տեղեկատվության, տեղեկատվականացման և տեղեկատվության պաշտպանության մասին» օրենքում և Վարչական իրավախախտումների վերաբերյալ օրենսգրքում։ Դրանք փոխել են տեղեկատվության տարածման կանոնները։
Փոփոխություններից հետո Ադրբեջանից այս չորս հայցվորների առցանց լրատվամիջոցներն ամբողջությամբ արգելափակվել են։
Տեղական դատարաններն իրենց որոշումները հիմնավորել են օրենսդրական փոփոխություններով:
Հայցվորները պնդել են, որ արգելափակման նպատակը ոչ թե ինչ-որ անօրինական բովանդակության, այլ կառավարությանը քննադատող ողջ բովանդակության տարածումը կանխելն է:
Շեշտել են՝ խախտվել են Կոնվենցիայի 6-րդ, 10-րդ, 13-րդ և 18-րդ հոդվածները:
Այս գործով Եվրոպական դատարանը եզրակացրել է, որ լրատվամիջոցների արգելափակումը ոտնահարում է նրանց արտահայտվելու ազատության իրավունքը։
Դատարանի որոշման համաձայն՝ կառավարությունը չորս հայցվորներից յուրաքանչյուրին պետք է վճարի բարոյական վնասի փոխհատուցում՝ 5000 եվրո։
Բացի այդ, anaxeber.az, az24saat.org և xural.com կայքերի ղեկավարներին դատական ծախսերի համար պետք է վճարի 1000 եվրո։
Այս որոշումը ներառում է ինտերնետ ռեսուրսների արգելափակման վերացում:
Հայցվորների շահերը ՄԻԵԴ-ում ներկայացրել են փաստաբաններ Էլչինը և Զիբեյդա Սադիգովները:
«Զաքիր Մուստաֆաևն ու մյուսները՝ ընդդեմ Ադրբեջանի»
Այս դատական գործը վերաբերում էր 2015 թվականի «Նարդարանի դեպքերի» ժամանակ տեղի ունեցած ձերբակալություններից հետո քաղաքացիների նկատմամբ խոշտանգումների և անմարդկային վերաբերմունքի մասին հայտարարություններին։
2015 թվականի նոյեմբերին Բաքվի արվարձանում գտնվող Նարդարան գյուղում տեղի էր ունեցել բախում ոստիկանության աշխատակիցների և բնակիչների միջև։ Արդյունքում զոհվել էր յոթ մարդ (երկու ոստիկան, հինգ գյուղացի), չորսը վիրավորվել էին, տասնչորսը՝ ձերբակալվել։
Հայցվորները պնդել են, որ իրենց խոշտանգումների են ենթարկել՝ խոստովանական ցուցմունքներ կորզելու համար:
Նրանք հայտարարել են Մարդու իրավունքների եվրոպական կոնվենցիայի 3-րդ և 10-րդ հոդվածների խախտման մասին՝ պնդելով, որ իրենք տարբեր վնասվածքներ են ստացել, իրենց թույլ չեն տվել կապ հաստատել իրենց նախընտրած փաստաբանների հետ, իսկ ընտանիքի անդամներին չեն տեղեկացրել իրենց ձերբակալության մասին:
ՄԻԵԴ-ը վճռել է, որ բոլոր հայցերի դեպքում տեղի է ունեցել Կոնվենցիայի 3-րդ հոդվածի խախտում:
Դատարանը նաև գտել է, որ Կոնվենցիայի 3-րդ հոդվածը էապես խախտվել է հայցվորներ Աբբաս Հուսեյնովի, Ալիբալի Վալիևի, Աբբաս Գուլիևի, Ռասիմ Ջաբրաիլովի և Ալի Նուրիևի նկատմամբ։
Որոշման համաձայն՝ կառավարությունը պետք է 7500-ական եվրո վճարի Աբբաս Հուսեյնովին, Ալիբալա Վալիևին, Աբբաս Գուլիևին, Ռասիմ Ջաբրաիլովին, Ալի Նուրիևին և 5000-ական եվրո՝ Զաքիր Մուստաֆաևին և Ռամին Յարիևին։
Բացի այդ, յուրաքանչյուրին պետք է վճարի նաև 1000 եվրո՝ որպես դատական ծախսերի փոխհատուցում։
ՄԻԵԴ-ում հայցվորների շահերը ներկայացրել են փաստաբաններ Էլչին և Զիբեյդա Սադիգովները, Նեմաթ Քարիմլին, Ֆարիզ Նամազլին և Յալչին Իմանովը։
