Ադրբեջանում մերժում են բուրգերները, պիցան և շամպունները․ ինչի՞ց է ամեն ինչ սկսվել
Արդեն գրեթե մեկ շաբաթ է, ինչ Ադրբեջանում մարդիկ բոյկոտ են հայտարարել որոշ արտասահմանյան ցանցային ռեստորաններին և արտադրողներից մեկի հիգիենիկ պարագաներին։ Նրանց զայրացրել է, որ այդ հաստատությունները սոցցանցերում կասկածի տակ են դրել երկրի տարածքային ամբողջականությունը։
• Պատերազմ, թթու և ժենգյալով հաց․ իրենց տները լքած արցախցիների կյանքի մասին
Հոկտեմբերի սկզբին McDonalds համաշխարհային ռեստորանների հայտնի ցանցի ադրբեջանական մասնաճյուղը սոցցանցերի իր էջում Ադրբեջանի քարտեզի լուսանկար էր հրապարակել՝ «Ղարաբաղն Ադրբեջան է» գրառմամբ։ Ինչպես ավելի ուշ պարզվել էր, ԱՄՆ-ում հավատարմագրված հայկական սփյուռքի կազմակերպությունները հրապարակման դեմ բողոքել են ընկերության գլխամասային գրասենյակ։ Դրանից հետո այդ գրառումները հեռացվել են ադրբեջանական ռեստորանի էջերից։
![](https://jam-news.net/app/uploads/2020/11/photo_2020-11-03_13-19-33-602x1024.jpg)
Դրանից անմիջապես հետո սոցցանցերի ադրբեջանական տիրույթում McDonalds-ը բոյկոտելու կոչեր սկսեցին հնչել և արագորեն տարածվեցին։ Նույնիսկ կամավորներ հայտնվեցին, որոնք կանգնում էին ընկերության ռեստորանների դիմաց և պոտենցիալ հաճախորդներին բացատրում էին, թե ինչու չարժե ճաշել այդ հաստատությունում։
McDonalds-ի ադրբեջանական մասնաճյուղի ղեկավարությունը սառեցրել է սոցցանցերում հաստատության էջերը, սակայն հայտարարությամբ է հանդես եկել, որ իր ավելի քան 20 աշխատակից ներկա պահին ադրբեջանական բանակի շարքերում է։
Ընկերությունը պարտավորվել է իր զինվոր աշխատակիցներին նախկին ծավալով աշխատավարձ վճարել, ինչպես նաև հայտարարել է, որ պատերազմում զոհված աշխատակիցների ընտանիքներն օգնություն կստանան ռեստորանների ցանցից Ադրբեջանում դրա գործունեության ողջ ընթացքում։
Սակայն այս հայտարարությունը մեծ արդյունք չի տվել, և բոյկոտը նախկինի պես շարունակվում է։
Պակաս մասշտաբային էր Burger King և Papa John’s ցանցային ռեստորանների ադրբեջանական մասնաճյուղերի սոցցանցերի էջերում կատարած գրառումների հետ կապված սկանդալը։ Այս ռեստորանները նույնպես հեռացրել են իրենց «ռազմատենչ» գրառումները սոցցանցերից, սակայն դրանից հետո ոչ մի հայտարարություն չեն արել։
![](https://jam-news.net/app/uploads/2020/11/photo_2020-11-03_13-19-42-1024x498.jpg)
Իսկ հիգիենայի պարագաներ արտադրող Jonhson&Johnson ընկերությունը սոցցանցերի իր էջում գրառում է կատարել, որում նշվել է «Արցախ» անվանումը։ Երկրի տարածքային ամբողջականության նկատմամբ այս անհարգալից քայլը դարձել է Ադրբեջանի ցանցային խանութներում ընկերության արտադրանքի վաճառքից հրաժարվելու պատճառ։ Ճիշտ է, հաջորդ օրը Jonhson&Johnson-ը հեռացրել է գրառումը։
![](https://jam-news.net/app/uploads/2020/11/photo_2020-11-03_13-23-48-2.jpg)
«Նախևառաջ, պետք է պարզել, թե փիառի և գովազդային նյութերի վերաբերյալ ինչ կետեր են նախատեսված գլխամասային գրասենյակի և ադրբեջանական մասնաճյուղի միջև ֆրանչայզինգի մասին պայմանագրում։ Եթե կատարվածը վերլուծենք, ապա մասնաճյուղը ոչ մի օրենք չի խախտել։ Ղարաբաղն Ադրբեջանի միջազգայնորեն ճանաչված մաս է, և գրառման մեջ այդ մասին է խոսվել։ Այս գործը հանգիստ կարելի կլիներ անգամ դատարանում շահել, սակայն մասնաճյուղը որոշել է դրանով իրեն երկար չզբաղեցնել և հեռացրել է գրառումը։
Իսկ ինչ վերաբերում է բոյկոտին, ապա, կարծում եմ, քաղաքացիները պետք է դիմեն ընկերության գլխամասային գրասենյակ, այլ ոչ թե հրաժարվեն ռեստորանի ծառայություններից, որտեղ աշխատում է Ադրբեջանի մոտ 1 700 քաղաքացի», — ասում է հայտնի լրագրող Ռահման Հաջին։
Հայտնի ադրբեջանցի բլոգեր Ֆարիդ Փարդաշունասն այնքան էլ չի կիսում լրագրողի մտքերը։
«Այս կամ այն ծառայությունը բոյկոտելը սպառողի ամենաբնական իրավունքն է։ Դա բողոքի ամենահասանելի տեսակն է սովորական հասարակ բնակչի համար, որը գլխամասային գրասենյակ բողոքելու համար ուղիներ չի փնտրելու։ Այդ պատճառով էլ կարծում եմ, որ որևէ ցանցային ընկերության ադրբեջանական մասնաճյուղ, նախևառաջ, պետք է մտածի իր հաճախորդների մասին։ MсDonalds-ի գլխամասային գրասենյակը պետք է նաև ուշադրություն դարձնի նրան, որ Հայաստանում մինչ օրս իր ցանցի գեթ մեկ ռեստորան չկա, իսկ Ադրբեջանում դրանք շատ են», — նշել է բլոգերը։