Ադրբեջանցի սպա Ռամիլ Սաֆարովը, որը դատապարտվել է իր հայ գործընկերոջը սպանելու համար, հայրենիքում հերթական խրախուսումն է ստացել

Ռամիլ Սաֆարովը, որն այն ժամանակ դեռ լեյտենանտ էր, համաշխարհային հանրությանը հայտնի է դարձել 2004թ-ին, երբ «Գործընկերություն հանուն խաղաղության» ծրագրի շրջանակում ՆԱՏՕ-ի դասընթացների ժամանակ նա գիշերը կացնով սպանել էր իր հայաստանցի գործընկեր Գուրգեն Մարգարյանին: Հունգարական դատարանը Սաֆարովին դատապարտել էր զմահ ազատազրկման: Սաֆարովի փաստաբաններն ու հանրային պաշտպանները վկայակոչում էին նրա հոգեբանական վնասվածքը: Սաֆարովի ընտանիքի մի քանի անդամ սպանվել էր 1993թ-ին հայկական զորքերի կողմից Ադրբեջանի Ջաբրայիլի շրջանի նրա հարազատ գյուղը գրավելու ժամանակ: Սակայն փորձաքննությունը նրան մեղսունակ էր ճանաչել հանցանքը գործելու պահին:

Սաֆարովն 8 տարի էր անցկացրել հունգարական բանտում: Այդ ընթացքում նա սովորել էր հունգարերեն և նույնիսկ ադրբեջաներեն էր թարգմանել հունգարական գրականության դասականների մի քանի վեպ:

2012թ-ի օգոստոսին անսպասելիորեն Հունգարիան որոշեց Սաֆարովին Ադրբեջանին հանձնել, որպեսզի նա շարունակի կրել իր պատիժը հայրենիքում: Այդ նույն օրն Ադրբեջանի նախագահ Իլհամ Ալիևը նրան ներում շնորհեց և ազատեց պատիժը կրելու հետագա ժամկետից: Բացի այդ, Սաֆարովն Ադրբեջանում բնակարան նվեր ստացավ և լեյտենանտից բարձրացվեց մինչև մայոր (շրջանցելով կապիտանի կոչումը): Նրան վճարեցին 8 տարվա աշխատավարձ, որոնք նա հունգարական բանտում էր անցկացրել:

Ռամիլ Սաֆարովին Ադրբեջանին փոխանցելու մասին որոշումը հանգեցրեց Հայաստանի և Հունգարիայի միջև դիվանագիտական հարաբերությունների խզման: Սաֆարովի ազատ արձակումն ու հերոսացումը քննադատվեց միջազգային կազմակերպությունների բազմաթիվ ներկայացուցիչների կողմից: Նախագահ Ալիևը հերքեց այդ մեղադրանքները որպես «անհիմն»: