Ադրբեջանցի ընդդիմադիր գործիչը 25 օրով կալանավորվել է անհայտ պատճառով

Ընդդիմադիր «Հանուն ժողովրդավարության և բարօրության շարժման»(ԺԲՇ) ակտիվիստ Հուսեյն Մելիքը 25 օրվա ազատազրկման է դատապարտվել։ Թե ինչի համար են նրան մեղադրել, հայտնի չէ։ Շարժման ղեկավարությունը Մելիքի կալանքը կապում է այն բանի հետ, որ նա սոցցանցերում քննադատել է իշխանություններին։

«Հանուն ժողովրդավարության և բարօրության շարժումը» ստեղծվել է 2014թ-ին «Մուսավաթ» ընդդիմադիր կուսակցությունը լքած ակտիվիստների կողմից։ Հուսեյն Մելիքն այդ շարժման ամենաակտիվ մասնակիցներից մեկն է։

•  Ադրբեջանում քաղբանտարկյալների ցուցակի մասին 

• Ադրբեջանցի խղճի գերիների մայրերը պատմում են իրենց որդիների կալանքի մասին 

Ձերբակալման մանրամասները

Ըստ ՇԺԲ փոխնախագահ Էլլադա Մամեդլիի՝ դեկտեմբերի լույս 5-ի գիշերը Հուսեյն Մելիքի տուն են ներխուժել քաղաքացիական հագուստով անձինք, ձեռնաշղթաներ հագցրել և տարել։ Դեկտեմբերի 6-ի երկրորդ կեսին նրա ընկերներն իմացել են նրա հանդեպ կայացրած դատավճռի մասին։ Նրանք դա գնահատում են որպես առևանգում․ «Մենք ավելի քան համոզված ենք, որ Հուսեյն Մելիքին կալանավորել են նրա ֆեյսբուքյան քննադատական գրառումների համար։ Պատահական չէ, որ նրան ձերբակալելուց հետո նրա գրառումները ջնջվել են։ Հնարավոր է, որ նրա վրա ճնշում է գործադրվել», — «Կավկազսկի ուզել» կայքին ասել է ԺԲՇ առաջնորդ Գուբադ Իբադօղլուն։

Ոչ ներքին գործերի նախարարության մամուլի ծառայությունում, ոչ Բաքվի Սաբայիլի շրջանային դատարանում այդ կալանքը չեն մեկնաբանել։

Սա Ադրբեջանում անցած ամսում առաջին նման դեպքը չէ։ Նոյեմբերի կեսին վարչական տուգանքի էր դատապարտվել Ադրբեջանի ժողովրդական ճակատ ընդդիմադիր կուսակցության առաջնորդ Ալի Քերիմլին։ Իսկ նոյեմբերի վերջին 30 օրվա վարչական կալանքի էր դատապարտվել լրագրող Աֆղան Սադիղովը։