Հայաստան ներթափանցած ադրբեջանցին մեղադրվում է սպանության մեջ
Ադրբեջանցի զինծառայողը ՀՀ քաղաքացու է սպանել
Ադրբեջանցի զինծառայող Հուսեյն Ախունդովն է սպանել «Զանգեզուրի պղնձամոլիբդենային կոմբինատի» պահակին։ Դեպքից գրեթե մեկ շաբաթ անց շրջանառվող լուրերը հաստատել է Հայաստանի Գլխավոր դատախազությունը։
Հայաստանի տարածք ներթափանցած Ախունդովը հայտնաբերվել էր ապրիլի 13-ին։ Նախորդ օրն էլ տեղի էր ունեցել կոմբինատի պահակի սպանությունը։ Նախնական տեղեկությունների համաձայն՝ ադրբեջանցի զինծառայողը նրան սպանել է հեռախոսն ու ավտոմեքենան հափշտակելու և այդ կերպ հեշտությամբ հարևան Իրան մուտք գործելու նպատակով։ Նրա նկատմամբ հանրային քրեական հետապնդում է հարուցվել։
Ենթադրաբար ապրիլի 9-ին Նախիջևանից Հայաստանի ինքնիշխան տարածք էին ներթափանցել Ադրբեջանի երկու զինծառայողներ՝ Ագշին Բաբիրովն ու Հուսեյն Ախունդովը։ Բաբիրովը հայտնաբերվել էր ապրիլի 10-ին Սյունիքի մարզի Աշոտավան գյուղում, Ախունդովը՝ ապրիլի 13-ին նույն մարզի Աճանան գյուղում։ Բաբիրովը նույնպես կալանավորված է։ Նա մեղադրվում է Հայաստանի պետական սահմանն ապօրինի հատելու և հրազեն ու ռազմամթերք տեղափոխելու մեջ։
Ադրբեջանցիներին նախ նկատել էին Սյունիքի մարզի Բնունիս համայնքի բնակիչները, որոնք պնդում են՝ տներից մեկի տեսախցիկը երեք մարդու է ֆիքսել։ Չեն բացառում, որ նրանք լինեն դիվերսիոն խմբի անդամներ։ Մինչդեռ Ադրբեջանը հայտարարում է, որ իր բանակի երկու զինծառայողները մոլորվել են ոչ բարենպաստ եղանակային պայմանների պատճառով։ Արտգործնախարար Ջեյհուն Բայրամովն էլ պահանջում է, որ հայկական կողմը անհապաղ ազատ արձակի «գերեվարված ադրբեջանցի զինծառայողներին»։
Մինչ այս պահը հայտնի բոլոր մանրամասները
«Սահմանն ապօրինի հատել է Իրան հասնելու համար»
Ախունդովը ապրիլի 12-ին, հասնելով Սյունիքի մարզի Կապան համայնքի Շղարշիկում գտնվող «Զանգեզուրի պղնձամոլիբդենային կոմբինատի» պահակակետ, դիտավորությամբ «իր մոտ ապօրինի պահվող ինքնաձիգից» կրակոցներ է արձակել պահակի՝ Հայրապետ Մելիքսեթյանի ուղղությամբ, ինչի արդյունքում նա տեղում մահացել է։ Գլխավոր դատախազության հաղորդագրությունում ասվում է․
«Իր հանցավոր մտադրությունն ավարտին հասցնելու ուղղակի դիտավորությամբ հափշտակել է Մելիքսեթյանի մարմնի կողքն ընկած բջջային հեռախոսը, ծխախոտն ու կրակայրիչը, փորձել գործարկել կայանված մեքենայի շարժիչը, սակայն չկարողանալով՝ դիմել է փախուստի»։
Ըստ աղբյուրի՝ հենց հափշտակված բջջային հեռախոսով էլ Ախունդովը նկարահանել է համացանցում լայն տարածում գտած տեսաուղերձը, որում հայտարարում է՝ «մենք դավաճան չենք, գլխատել ենք 400-ից 500 հայերի», հույս ունենք հաջողությամբ վերադառնալ Ադրբեջան (…)»:
«Զանգեզուրի պղնձամոլիբդենային կոմբինատի» պահակակետում 56-ամյա տղամարդու սպանության գործը մինչ այս Քննչական կոմիտեում էր։ Կոմիտեն հայտնել էր, որ դեպքի վայրից վերցվել են «նմուշներ, երկփողանի հրացան, որը հայտնաբերվել է տնակի մեջ, ինչպես նաև քննությանը հետաքրքրող այլ առարկաներ»: Նշանակված փորձաքննությունների արդյունքների մասին տեղեկություններ, սակայն, չէին հրապարակվել։ Ապրիլի 18-ին հայտնի դարձավ, որ գործը փոխանցվել է Գլխավոր դատախազությանը։
Ի՞նչ մեղադրանքներ են առաջադրվել Ախունդովին
Ինչպես Ախունդովի, այնպես էլ Հայաստան ներթափանցած մյուս զինծառայողի՝ Ագշին Բաբիրովի նկատմամբ հարուցվել էր հանրային քրեական հետապնդում, նրանք կալանավորվել էին: Նախօրեին Գլխավոր դատախազությունը հայտարարեց, որ Ախունդովի նկատմամբ հանրային քրեական հետապնդումը փոփոխվել ու լրացվել, նոր հանրային քրեական հետապնդում է հարուցվել՝
- մի խումբ անձանց կողմից նախնական համաձայնությամբ ՀՀ պետական սահմանն ապօրինի հատելու,
- մի խումբ անձանց կողմից նախնական համաձայնությամբ, մաքսային հսկողությունից թաքցնելով, ՀՀ պետական սահմանով հրազեն և ռազմամթերք ապօրինի տեղափոխելու,
- մի խումբ անձանց կողմից նախնական համաձայնությամբ ապօրինի հրազեն պահելու և փոխադրելու,
- շահադիտական դրդումներով, այլ հանցանքի կատարումը հեշտացնելու նպատակով և ազգային ատելության, անհանդուրժողականության և թշնամանքի շարժառիթով ապօրինաբար մեկ ուրիշին կյանքից զրկելու հանրորեն վտանգավոր արարքների համար:
«Զինծառայողը խոստովանել է»
Իրավապահ մարմինների լռության ֆոնին՝ ավելի վաղ «Ազատության» հետ զրույցում հայտարարել էր իշխանական պատգամավոր Նարեկ Ղահրամանյանը։
«Գերեվարվածը, որն անցել էր մեր կողմը, ինքն է սպանել Զանգեզուրի պղնձամոլիբդենային կոմբինատի պոչատարի պահնորդ Հայրապետին, եթե չեմ սխալվում՝ արձակած 6 կրակոցներով։ Ես հստակ նաև տեղեկություն ունեմ, որ ինքը նաև խոստովանել է դրա մասին»։
Պատգամավորը նշել էր, որ գուցե իրավապահները չեն հաստատում դա, քանի որ դեռ չեն հայտնաբերել այն զենքը, որով ադրբեջանցի զինծառայողը սպանել է պահակին։
«Զենքը անտառներում է, փնտրում են, բայց էլի եմ ասում, կասկած չկա, ոչ էլ երկրորդ կասկածյալ կա …»,- ընդգծել էր նա։
Ադրբեջանցի զինծառայողներին հանրային պաշտպան է տրամադրվել
Օրերս Հայաստանի նորընտիր օմբուդսմեն Անահիտ Մանասյանն էր այցելել կալանավորված Ագշին Բաբիրովին և Հուսեյն Ախունդովին, ծանոթացել նրանց պահման պայմաններին և իրավունքների ապահովմանն առնչվող հարցերին։
ՄԻՊ գրասենյակի փոխանցմամբ՝ օմբուդսմենն արձանագրել էր, որ նրանք ապահովված են պատշաճ պահման պայմաններով, այդ թվում՝ մշտական խմելու ջրով, սննդով, հիգիենայի պարագաներով, ըստ անհրաժեշտության ստանում են բժշկական օգնություն և սպասարկում․
«Առանձնազրույցների ընթացքում պետական մարմինների և պաշտոնատար անձանց կողմից խոշտանգումների, վատ վերաբերմունքի այլ ձևերի, այդ թվում՝ հոգեբանական ճնշումների վերաբերյալ որևէ բողոք չի ներկայացվել»։
Կալանավորված ադրբեջանցիները տեղեկացրել են, որ ծանոթ են իրենց առաջադրված մեղադրանքին, իրենց տրամադրվել է անվճար հանրային պաշտպան, վարույթի ողջ ընթացքում ապահովված է եղել թարգմանչի մասնակցությունը։
Հետևեք մեզ — Facebook | Youtube | Telegram
Ադրբեջանցի զինծառայողը ՀՀ քաղաքացու է սպանել
