Ադրբեջանցի բլոգերին արտաքսել են Ուկրաինայից և Բաքվի քննչական մեկուսարան տեղափոխել
Ադրբեջանցի բլոգեր Էլվին Իսաևը ձերբակալվել է Ուկրաինայում և արտաքսվել Ադրբեջան, որտեղ գրեթե միանգամից քննչական մեկուսարանում է հայտնվել։ Նախկինում նրան արդեն փորձել էին Ռուսաստանից արտաքսել՝ մեղադրելով միգրացիոն օրենսդրության խախտման համար։ Ինչի համար են նրան մեղադրում Ադրբեջանում՝ դեռ պարզ չէ։ Իսաևը հայտնի է իր տեսաբլոգներով, որոնցում հայհոյում էր ադրբեջանական իշխանություններին։
• Լապշինի գործը․ Ադրբեջանում ռուս բլոգերի չարաբաստիկ արկածները
• Ռուսաստանը Բաքվին է արտահանձնել ազգային փոքրամասնությունների իրավունքների պաշտպանին
Արտաքսման սպառնալիք – փախուստ – արտաքսում
Էլվին Իսաևը ռուսական քաղաքացիություն ուներ և ապրում էր Սանկտ Պետերբուրգում։ Սակայն 2019 թ-ի օգոստոսին նրան որոշեցին արտաքսել այնտեղից՝ մեղավոր ճանաչելով Ռուսաստանում կացության ռեժիմի խախտման մեջ։
Ընդ որում, Մարդու իրավունքների եվրոպական դատարանը պահանջում էր Իսաևի նկատմամբ կիրառել ասպես կոչված «համար 39 կանոնը», որի համաձայն՝ չի կարելի արտաքսել մարդկանց, որոնց հայրենիքում քաղաքական հետապնդում է սպառնում։
Սեպտեմբերին գործն ուղարկվեց նոր քննության, իսկ Իսաևն այդ ընթացքում Ուկրաինա մեկնեց։ Այնտեղ նա ձերբակալվեց դեկտեմբերի 14-ին Ադրբեջանի պահանջով և արտաքսվեց Բաքու։
Ադրբեջանի պետական միգրացիոն ծառայությունը պնդում է, որ, Բաքու հասնելով, Իսաևն ինքն է իրենց դիմել, բուժզննում անցել և քննչական մեկուսարան տեղափոխվել։
«Կալանքի մասին որոշումը կապված է այն բանի հետ, որ Բաքվի Նասիմինի շրջանային դատարանն օգոստոսի 22-ին վճռել է Իսաևին կալանքի տակ առնել քրեական գործի շրջանակում, որը հետաքննում է գլխավոր դատախազության ծանր հանցագործությունների քննչական վարչությունը», — գրում է «Կավկազսկի ուզելը»՝ վկայակոչելով միգրացիոն ծառայությունը, սակայն չի մանրամասնում, թե ինչ քրեական գործի մասին է խոսքը։
Վարկած․ «Իսաևը խաբեության զոհ է դարձել»
Ադրբեջանցի լրագրող և քաղէմիգրանտ Ֆիքրեթ Հուսեյնլին կարծում է, որ Էլվին Իսաևը խաբեության զոհ է դարձել․ ինչ-որ մարդիկ նրան Ուկրաինա էին կանչել՝ խոստանալով փողի դիմաց օգնել Սլովակիա տեղափոխվել։
Ֆիքրեթ Հուսեյնլին, որն այժմ Նիդերլանդներում է ապրում, 2017 թ-ին նույնպես ձերբակալվել էր Ուկրաինայում և քիչ էր մնացել՝ արտահանձնվեր Ադրբեջան․ նա մեղադրվում էր խաբեության և սահմանի ապօրինի հատման մեջ։
Ավելի վաղ Ռուսաստանից և Թուրքիայից արդեն արտաքսվել և արտահանձնվել էին մի քանի ադրբեջանցի բլոգերներ, լրագրողներ և քաղակտիվիստներ։
Սոցցանցերի արձագանքը․ կարեկցանքից մինչև չարախնդություն
Ադրբեջանում շատերն են թերահավատորեն վերաբերվում Էլվին Իսաևի գործունեությանը։ Այդ պատճառով էլ սոցցանցերում վեճ է բռնկվել նրանց միջև, ովքեր կարեկցում են Իսաևին, և նրանց, ովքեր չարախնդում են նրա արտաքսման առթիվ։
Որոշ մեկնաբանություններ․
«Բավական չէ պարզապես հայհոյել ընդդիմադիր գործիչ լինելու համար»;
«Իսաևը վիրավորում է Իլհամ Ալիևին, Իլհամ Ալիևը՝ ողջ ադրբեջանցի ժողովրդին»;
«Իր վերջին տեսանյութում նա աջակցություն էր հայտնում Դոնեցկի անջատողականներին, ասում՝ «Ռուսաստանը ձեզ հետ է»։ Ճիշտ է արել Ուկրաինան, որ արտաքսել է նրան»;
«Եվ ի՞նչ հոդվածով է նրան դատելու այս կեղտոտ ադրբեջանական ռեժիմը։ Աստված չանի մեկը դրանց երախում հայտնվի»;
«Նրան հասնում է։ Նրա նմանները խայտառակում են ընդդիմության անունը»։
