Ադրբեջանում նշել են լրագրող Ռասիմ Ալիևի սպանության երկրորդ տարելիցը
Օգոստոսի 9-ին երկու տարի է լրանում լրագրող Ռասիմ Ալիևի սպանության օրվանից: Մի խումբ լրագրողներ, քաղաքական գործիչներ, Ադրբեջանի հասարակության ներկայացուցիչներ պատվեցին նրա հիշատակը Բաքվից ոչ հեռու գտնվող Մեհթիաբադ գյուղում նրա գերեզմանին:
Ռասիմ Ալիևը ծեծի է ենթարկվել 2015թ-ի օգոստոսի 8-ին Ադրբեջանի ֆուտբոլի հավաքականի ֆուտբոլիստի հարազատների և երկրպագուների կողմից: Ֆուտբոլիստը վիրավորվել է սոցցանցում լրագրողի կատարած գրառումից, որտեղ նա քննադատում էր վերջինիս անպատեհ ժեստը կիպրոսցի լրագրողի հասցեին: «Ես չեմ ուզում, որպեսզի Ադրբեջանը Եվրոպայում ներկայացնեն անդաստիարակները», — ասվում էր գրառման մեջ: Հեռոխոսով հնչեցված մի քանի սպառնալիքից հետո ֆուտբոլիստի ազգականները Ռասիմին «հանդիպման» են կանչել և հինգը մեկի դեմ նրան այնտեղ դաժանաբար ծեծել:
Ծանր մարմնական վնասվածքներով Ռասիմ Ալիևը հիվանդանոց է տեղափոխվել, կոտրված էին նրա կողոսկրերը, ներքին արյունահոսություն ուներ: Օգոստոսի 9-ի առավոտյան լրագրողը մահացավ:
Դատարանը ծեծի հինգ մասնակցին դատապարտեց 9-13 տարվա ազատազրկման: Ֆուտբոլիստ Ջավիդ Հուսեյնովը դատապարտվեց 4 տարվա ազատազրկման «ծանր հանցագործության մասին չհաղորդելու և կոծկելու» համար: Սակայն, նստելով 1 տարի և երկու ամիս, նա ազատ արձակվեց և ներկա պահին պաշտպանում է Ադրբեջանի ֆուտբոլի հավաքականի գույները:
Ռասիմ Ալիևի գերեզմանին ելույթ ունեցան հայտնի լրագրողներ և հասարակական գործիչներ:
«Երկրում անպատժելիության մթնոլորտ է տիրում, յուրաքանչյուրը համարում է, որ կարող է լրագրողի ծեծել», — ասել է լրագրող Շահվելեդ Չոբանօղլուն:
Լրատվամիջոցների հանդեպ իշխանությունների քաղաքականությունը քննադատեցին նաև ընդդիմադիր «Մուսավաթ» կուսակցության առաջնորդներ Իսա Համբարն ու Արիֆ Հաջիլին:
«Այս իշխանությունն այլախոհների մարդասպան է: Ամեն անգամ, հիշատակելով սպանված լրագրողներին, մենք հիշեցնում ենք իշխանություններին, որ, լրագրող սպանելով, նրանք ոչ մի բանի չեն հասնի», — ասել է «Մուսավաթի» նախկին առաջնորդ Իսա Համբարը:
Հետոքննող լրագրող, խղճի նախկին գերի Խադիջա Իսմայիլն ասել է.
«Ռասիմի գերեզմանն իրականում հուշարձան է: Երկրում տիրող կոռուպցիայի, ապաշնորհ բժշկության, դատական համակարգի անկման, արդարության բացակայության հուշարձան»:
Լուսանկարում՝ Ռասիմի գերեզմանը, նրա մայրն ու հարսնացուն, Իսա Համբարն ու Խադիջա Իսմայիլը:
