Ադրբեջանում ներում է շնորհվել 625 մարդու, այդ թվում՝ 38 քաղբանտարկյալի

Ադրբեջանի նախագահ Իլհամ Ալիևը հրաման է ստորագրել 625 բանտարկյալի ներում շնորհելու մասին։ Ցուցակում 38 քաղբանտարկյալի անուն կա։ Համաներումը չի տարածվել 1995 թ-ի ապստամբության մասնակիցների և 2017 թ-ի «Թարթառի գործով» դատապարտվածների վրա։

• Եվրոպայի ամենահոմոֆոբ երկի՞ր, թե «մեզ մոտ նրանց ոչ ոք չի դիպչում»։ ԼԳԲՏ հարցման արդյունքները
• ԵՄ-ն Վրաստանի քաղաքական գործիչներին կոչ է անում փոխզիջման գնալ, իշխանությունները կտրուկ հայտարարություններ են անում
• Ադրբեջանցի գեներալը կալանավորվել է Ուկրաինայում 20 տարի առաջվա սպանության համա՞ր

Համաներվածներից երեքը ցմահ էին դատապարտվել։ Նրանց նկատմամբ խափանման միջոցը փոխարինվել է 25 տարվա ազատազրկմամբ։

Համաներված օտարերկրացիները

Համաներման մասին հրահանգը տարածվում է նաև ութ երկրների 24 անձանց վրա։
Նրանցից յոթն Իրանի քաղաքացիներ են, վեցը՝ Վրաստանի, չորսը՝ Ռուսաստանի, երկուսը՝ Թուրքիայի, երկուսը՝ Կամերունի, մեկը՝ Պակիստանի, մեկը՝ Ղազախստանի, և վերջինը՝ Աֆղանստանի։

Պատժի չկրած հատվածից ազատվել է 23 օտարերկրացի, որոնք դատապարտված էին ազատազրկման։ Նաև կրկնակի կրճատվել է մի օտարերկրացու պատժի չկրած մասի ժամկետը։

38 քաղբանտարկյալ ներառվել է համաներվածների ցանկում

Համաներվածների ցանկում 38 դատապարտյալ կա, որոնք քաղբանտարկյալ են համարվում։

Նրանցից 28-ը դատապարտվել է 2015 թ-ին Բաքվի Նարդարան ավանում տեղի ունեցած անկարգությունների գործով։

2015 թ-ին Ադրբեջանի իրավապահ մարմինները կոպտորեն ճնշել են Նարդարան ավանում Մուսուլմանների միավորման շարժման բողոքի ցույցերը։ Իշխանությունների հետ դիմակայության հետևանքով ձերբակալվել և կալանավորվել են անկարգությունների տասնյակ մասնակիցներ։

Ազատ են արձակվել նաև «Ժողովրդական ճակատ» կուսակցության չորս անդամներ, այդ թվում՝ լրագրող Էլչին Իսմայիլը։

Ազատ է արձակվել մեկ մարդ, որը դատապարտվել է Գյանջայում 2018 թ-ին տեղի ունեցած անկարգությունների գործով։

Ազատ է արձակվում Իսլամական կուսակցության անդամներից մեկը, որը դատապարտվել է դպրոցում հիջաբ կրելու արգելքի դեմ բողոքի համար։

Ներված քաղբանտարկյալներից ևս մեկն արտասահմանում ապրող քաղէմիգրանտի ազգական է։

Ո՞ւմ վրա չի տարածվել համաներումը

Լուծարված ՕՊՕՆ-ի անդամներից երեքը, որոնք ցմահ ազատազրկման են դատապարտվել, չեն ներառվել համաներվածների ցուցակում։ Նրանք նախկին ՕՊՕՆ-ի՝ կալանքի տակ գտնվող վերջին անդամներն են։

1995 թ-ի մարտին Ոստիկանության հատուկ նշանակության ջոկատը (ՕՊՕՆ) գնդապետ Ռովշան Ջավադովի ղեկավարությամբ ապստամբություն է բարձրացրել իշխանության դեմ։ Ապստամբության կոշտ ճնշման հետևանքով ՕՊՕՆ-ի մի քանի մասնակից է մահացել, այդ թվում՝ Ջավադովը, հարյուրավոր մարդիկ տարբեր ժամկետների ազատազրկման են դատապարտվել։ Տարիներ անց նրանք բոլորն ազատ են արձակվել։ ՕՊՕՆ-ի վերջին երեք անդամներն ապստամբությունից հետո երկար ժամանակ թաքնվում էին, այնուհետև ձերբակալվել են և դատապարտվել մի քանի հանցագործությունների, այդ թվում՝ իշխանության ներկայացուցիչների սպանության համար։

Ներում չի շնորհվել նաև 2017 թ-ի աղմկահարույց «Թարթառի գործով» կալանավորվածներին։

Հայկական և ադրբեջանական ուժերի միջև Արցախում 2016 թ-ի «քառօրյա պատերազմից» հետո կալանավորվել է ադրբեջանական բանակի մի քանի զինծառայող, որոնք մեղադրվել են հակառակորդի հատուկ ծառայությունների հետ համագործակցության համար։