Ադրբեջանում հրաժարվում են գրանցել անկախ լրատվամիջոցներին
Ադրբեջանում որոշ անկախ լրատվամիջոցների պետական գրանցումը մերժվել է։ Այս մասին հայտարարել է փաստաբան Խալիդ Աղալիևը։ Լրատվամիջոցների պետական գրանցումը «ԶԼՄ-ների մասին» նոր օրենքի պահանջներից է, օրենք, որը քննադատության է ենթարկվել ինչպես Ադրբեջանում, այնպես էլ միջազգային կազմակերպությունների կողմից։ Օրենքի այն հոդվածը, որը լրատվամիջոցներից պահանջում է գրանցումից առաջ ունենալ որոշակի «աշխատանքային փորձ», մերժվել է Եվրոպայի խորհրդի Վենետիկի հանձնաժողովի կողմից։
- Շրջապատին դուր գալը պարտադիր չէ․ արտասովոր հագուստներով դերասանը Բաքվից։ Տեսանյութ
- «Վրացական երազանքի» իշխանության 10 տարին. վերլուծություն՝ ըստ ոլորտների
- Ո՞վ է խոսում Լուկաշենկոյի շուրթերով. կարծիք Երևանից
2022 թվականի հոկտեմբերի 14-ից ԶԼՄ-ների զարգացման պետական գործակալությունը (կրճատ անվանումը՝ MEDIA) ընդունում է ադրբեջանական լրատվամիջոցների պետական գրանցման հայտեր։ Սակայն, ինչպես ասաց փաստաբան Խալիդ Աղալիևը, գերատեսչությունը մերժում է որոշ լրատվամիջոցների։
ԶԼՄ-ների զարգացման գործակալությունը (MEDIA) ստեղծվել է Ադրբեջանի նախագահի հունվարի 12-ի հրամանագրով՝ ԶԼՄ-ների զարգացման քաղաքականության իրականացման նպատակով։ «ԶԼՄ-ների մասին» օրենքը խորհրդարանի կողմից ընդունվել է 2021 թվականի դեկտեմբերի 30-ին և հաստատվել նախագահի 2022 թվականի փետրվարի 8-ի հրամանագրով։
Աղալիևը չի նշել, թե կոնկրետ որ լրատվամիջոցների գրանցումն է մերժվել, սակայն շատ փորձագետների կարծիքով՝ խոսքը անկախ լրատվամիջոցների մասին է։
Գործակալությունում որպես մերժման պատճառ մատնանշում են «ԶԼՄ-ների մասին» օրենքի 74.1.2 հոդվածը, որը վերաբերում է ԶԼՄ-ների գործունեության տևողությանը։ Փաստաբանն ընդգծել է, որ այս հոդվածը, մյուսների հետ միասին, մերժվել է Եվրոպայի խորհրդի Վենետիկի հանձնաժողովի կողմից: Հանձնաժողովը հայտարարել է, որ ԵԽ անդամ երկրներում նման պահանջներ չեն կարող դրվել:
Այդ հոդվածի համաձայն՝ լրատվամիջոցներից պահանջվում է գործունեության որոշակի տևողություն՝ գրանցման համար դիմելուց առաջ։ Բայց պարզ չէ, թե ինչ ժամանակահատվածի մասին է խոսքը։
«Նման պահանջը սահմանափակում է խոսքի ազատությունը և ոչ այլ ինչ է, քան գրաքննություն»,- Աղալիևի խոսքերն է մեջբերում Turan լրատվական գործակալությունը:
«Լրատվամիջոցների թվում, որոնց գրանցումը մերժվել է, կան այնպիսիք, որոնք սկսել են աշխատել դեռևս այն ժամանակ, երբ MEDIA-ի ղեկավարները դպրոցական էին: Այդ լրագրողներն արդեն հայտնի էին, և դատարանները նրանց դեմ վճիռ կայացրին։ Հետևաբար, պետությունը ճանաչում է այդ լրատվամիջոցներին և լրագրողներին, սակայն գործակալությունը հրաժարվում է գրանցել»,- հավելել է Աղալիևը։
Նրա կարծիքով՝ մոտ ապագայում պետք է սպասել մերժված լրատվամիջոցների բողոքների հիման վրա դատական գործընթացների։
Հետաքրքիր է, որ գործակալության կայքի «Վիճակագրություն» բաժնում գրանցված և մերժված լրատվամիջոցների անունները նշված չեն։
Գործակալությունն այդ որոշումները չի մեկնաբանել։
