Ադրբեջանում թանկացել է բենզինը

Ադրբեջան ներկրվող AI-95 (Premium) և AI-98 (Super) տեսակի բենզինի գինն աճել է: Այժմ AI-95 բենզինի արժեքը կազմում է 1,25 AZN, իսկ AI-98-ինը՝ 1,50 AZN (համապատասխանաբար 0,74 և 0,88 USD):

Գների բարձրացումից առաջ այդ տեսակների բենզինի մեկ լիտրն արժեր համապատասխանաբար 0,95 և 1,10 AZN: Այսպիսով, «սուպեր» տեսակի բենզինը թանկացել է 13,6 տոկոսով:

SOCAR պետական նավթային ընկերությունը գների աճը բացատրում է նրանով, որ այդ տեսակների բենզինը ներկրվում է արտասահմանից (մասնավորապես՝ Ռումինիայից) և հավելում, որ բենզինի գինը գոյանում է համաշխարհային շուկայի գնային միտումների համապատասխան: Այդ տեսակների բենզինը ներկրվում է, դրանց գինը չի կարգավորվում Ադրբեջանի կառավարության սակագնային խորհրդի կողմից: Նոր գները կանդրադառնան բացառապես «լյուքս» դասի ավտոմեքենաների վարորդների վրա, վստահեցնում է SOCAR-ը:

Կառավարությունը պնդում է, որ գների աճը չի տարածվելու հանրապետությունում արտադրվող և վարորդների մեծ մասի կողմից օգտագործվող AI-92 տեսակի բենզինի և դիզելային վառելիքի վրա:

Որպես արդարացում SOCAR-ի աղբյուրներն ավելացնում են, որ այս տարի premium և super տեսակի բենզինի գներն աճել են նաև հարևան Ռուսաստանում և Վրաստանում:

«Եթե Ադրբեջանում AI-95premium տեսակի բենզինն արժե 0,74 դոլար, ապա Ուկրաինայում այն արժե 0,31դոլարով ավել, և լիտրն արժե 1,05 դոլար: AI-95 premium տեսակը հարևան Վրաստանում արժե 0,86 դոլար, այլ կերպ ասած, 0,12 դոլարով ավելի թանկ, քան Ադրբեջանում: Թուրքիայում բենզինի այդ տեսակն արժե 1,45 դոլար, ինչն ադրբեջանական գնից թանկ է 0,71 դոլարով: Հայաստանում AI-95premium-ը վաճառվում է 0,85 դոլարով, ինչը 0,11դոլարով ավելի թանկ է, քան Ադրբեջանում: Գրեթե նույն պատկերն է նաև super տեսակի բենզինի հետ կապված», — գրում է report.az կայքը:

Սոցցանցերը բենզինի գների բարձրացման մասին նորությանը բացասաբար արձագանքեցին.

«Եթե, ինչպես ասում են, ներկրվող բենզինի գինը որոշվում է համաշխարհային շուկայով, ապա ինչու է այն անընդհատ աճում և ոչ մի անգամ չի իջնում: Այդ ի՞նչ շուկա է, եթե երկրում մի մոնոպոլիստ կա՝ SOCAR-ը”:

«Ամոթ է, որ նավթային երկիրը կախված է բենզինի ներկրումից դրա համար հարկ եղած տեխնոլոգիայի բացակայության պատճառով: Ի՞նչպիսի ուղեղ է պետք ունենալ Թուրքիայում, այլ ոչ թե սեփական երկրում ժամանակակից նավթամշակման գործարան կառուցելու համար» (նկատի ունի STAR Rafinery գործարանն Իզմիրում՝ SOCAR-ի դուստր ընկերությունը):