Ադրբեջանում բարձրացվել է մի քանի համալսարաններում սովորելու գինը
Ադրբեջանի մի քանի պետական և մասնավոր համալսարաններ ուսումնական տարվա մեկնարկից մոտ մեկ ամիս առաջ հայտարարել են վճարովի բաժիններում ուսուցման գների բարձրացման մասին:
Այս որոշումը հրապարակվել է պետական քննական հանձնաժողովի պաշտոնական “Դիմորդ” ամսագրի հուլիսյան համարում:
Բաքվի պետական համալսարանի իրավաբանական ֆակուլտետի վարձավճարը տարեկան 3800 մանաթից բարձրացվել է մինչև 4300 մանաթ (2235 դոլարից մինչև 2530 դոլար): “Խազար” համալսարանում գինն աճել է մինչև 4500-5000 մանաթ (2647-2941 դոլար)՝ կախված ֆակուլտետից:
Համեմատության համար. հարևան Թուրքիայում որոշ համալսարաններում նույն ֆակուլտետներում ուսմանվճարը չի գերազանցում 500 դոլարը:
Կրթության ոլորտի փորձագետ Քամրան Ասադովը մատնանշեց պետական և մասնավոր համալսարանների, ինչպես նաև մայրաքաղաքում և շրջաններում վարձավճարի միջև անհամապատասխանությունը. “Որոշ պետհամալսարաններում ուսման վճարը 4000 մանաթ է, սակայն նույն մասնագիտությամբ այլ համալսարաններում վարձավճարը կազմում է 2000 մանաթ, իսկ շրջաններում՝ 1500 մանաթ: Նույն մասնագիտությամբ պետհամալսարաններում վարձավճարների տարբերությունը չի կարող գերազանցել 10%-ը, իսկ պետականների և մասնավորների միջև՝ 30%-ը: Սակայն Ադրբեջանում այդ կանոնը հաճախ խախտվում է”, — ասել է Ասադովը contact.az կայքին:
«Մեր համալսարանները չեն կարող արտասահմանցի ուսանողների գրավել: Թուրքիայում 230 համալսարան կա, դրանցում արտասահմանցիների թիվը գերազանցում էր 800 հազարը: Սինգապուրում, որտեղ ընդամենը 3 համալսարան կա, արտասահմանցի ուսանողների թիվը կազմում է 10 մլն մարդ, և համալսարանների փոխանցումները երկրի պետբյուջե կազմում են 6 մլրդ դոլար: Իսկ Ադրբեջանում 54 բարձրագույն ուսումնական հաստատություն կա, որոնցում սովորում է ընդամենը 4000 արտասահմանցի ուսանող”, — ասում է Ասադովը:
Փորձագետի կարծիքով՝ բարձր գներն անմխիթար հետևանքների կբերեն. “Ադրբեջանում այդ փողերով սովորելու փոխարեն դիմորդները նախընտրում են հարևան Թուրքիա մեկնել սովորելու: Էժան և որակով: Ի վերջո դա կբերի երկրից երիտասարդության զանգվածային արտահոսքի: Միայն Թուրքիայում սովորում է 15 հազար ադրբեջանցի ուսանող: Ադրբեջանցի ուսանողների թիվը ռուսական և ուկրաինական համալսարաններում գերազանցել է 24 հազարը: Պատկերացրեք, թե որքան միջոցներ են երկրից դուրս գալիս, եթե այդ 40 հազար ուսանողներից յուրաքանչյուրին միջինում 1000 մանաթ են ուղարկում: Բացի այդ, այնպես չէ, որ այդ ուսանողները կվերադառնան ուսումն ավարտելուց հետո: Այդ պատճառով էլ անհրաժեշտ է իջեցնել համալսարաններում սովորելու գներն ու արտասահմանցի ուսանողներ գրավել”, — հավելել է Ասադովը:
