Ադրբեջանի և Թուրքիայի ղեկավարները Զանգիլանում բացել են նոր միջազգային օդանավակայան
Ղարաբաղյան երկրորդ պատերազմի արդյունքում Ադրբեջանի վերահսկողության տակ անցած Զանգիլանում (հայերեն տեղանունը՝ Կովսական) բացվել է միջազգային օդանավակայան՝ Ադրբեջանի և Թուրքիայի նախագահների մասնակցությամբ։ Փորձագետի խոսքով՝ այս օդանավակայանը ոչ միայն սովորական օդային նավահանգիստ է, այլև ռազմավարական ենթակառուցվածքի կարևոր բաղադրիչ։
Օդանավակայանի բացումից հետո մամուլի համար արված հայտարարության մեջ Իլհամ Ալիևն ասել է, որ Ադրբեջանի և Թուրքիայի եղբայրությունը «ազդանշան է աշխարհի և տարածաշրջանի երկրներին»։
Իր հերթին, Ռեջեփ Թայիփ Էրդողանը նշել է, որ «Զանգեզուրի միջանցքի վերաբերյալ որոշ երկրների վախերը բացարձակապես անհիմն են»։
- Ադրբեջանն առաջարկում է պարիսպ կառուցել Իրանի հետ սահմանին
- Ի՞նչ է սպասվում արցախցիներին Ադրբեջանի կազմում. ադրբեջանագետի կանխատեսումը
- «Ադրբեջանից միակ ակնկալիքը կառուցողականությունն է»․ Փաշինյան
Սա 2020 թվականի 44-օրյա պատերազմից հետո Ադրբեջանի վերահսկողության տակ անցած տարածքներում կառուցված երկրորդ միջազգային օդանավակայանն է։ 2021 թվականի հոկտեմբերին առաջին նման օդանավակայանը բացվեց Ֆիզուլիի շրջանում (Վարանդա)։ Երրորդ օդանավակայանը Լաչինի շրջանում կգործարկվի 2025 թվականին։
Ադրբեջանի ինչի՞ն են պետք այս օդանավակայանները
«Օկուպացիայից ազատագրված տարածքներում կառուցվող օդանավակայանները ոչ միայն օդային նավահանգիստներ են, այլև ռազմավարական ենթակառուցվածքի կարևոր բաղադրիչներ»,- ընդգծում է ադրբեջանցի քաղաքական գործիչ, «Հանրապետական այլընտրանք» ընդդիմադիր կուսակցության առաջնորդներից Նաթիկ Ջաֆարլին:
«Ինձ ծիծաղելի է թվում, երբ ոմանք ասում են, որ սա կոռուպցիայի ևս մեկ աղբյուր է, և այս կերպ փողեր են յուրացվում։ Կարելի է մտածել, թե այդ մարդիկ վերահսկում են պետական բոլոր նախագծերը, արդեն հաջողել են կոռուպցիայի դեմ պայքարում և չեն կարողանում հետևել միայն օդանավակայանների կառուցմանը։
Եվ այսպես, գոյություն ունեցող համակարգը սովոր է վատնել և՛ բյուջեն, և՛ նավթային հիմնադրամի միջոցները՝ առանց որևէ վերահսկողության և հաշվետվողականության։ Դա մի համակարգ է, որը հիմնված է կոռուպցիայի վրա՝ կոռուպցիայի միջոցով վերից վար ապահովելով քաղաքական լոյալությունը։ Ինչու՞ նա պետք է օդանավակայաններ կառուցի միայն փողերի լվացման համար:
Ըստ երևույթին, այդ օդանավակայանները Ադրբեջանի կողմից «դե յուրե» և «դե ֆակտո» կառուցված նոր դաշինքների համատեղ որոշումների արդյունք են, և դրանք ենթակառուցվածքային նախագծեր են, որոնք համապատասխանում են տարածաշրջանի անվտանգության հայեցակարգին»,- հավելել է Ջաֆարլին։
Նոր օդանավակայանի մասին
Զանգիլանի միջազգային օդանավակայանի ասֆալտբետոնե ծածկով թռիչքուղին ունի 3000 մետր երկարություն և 60 մետր լայնություն։ Օդանավակայանը կընդունի բոլոր տեսակի, այդ թվում՝ լայն թափքով տրանսպորտային ինքնաթիռներ։
Հարթակի մակերեսը 60 հազար քմ է։ Օդանավակայանը թույլ կտա թռիչքներ կատարել, որոնք կհամապատասխանեն ICAO-ի և IATA-ի չափանիշներին։
Միջազգային օդանավակայանի տերմինալը հնարավորություն կտա սպասարկել ժամում 200 ուղևորի։ Տերմինալը ներառում է VIP-դահլիճ, սրճարան, բուժկետ և գրասենյակային տարածքներ։
Ադրբեջանի և Թուրքիայի նախագահների հայտարարությունները
Օդանավակայանի բացումից հետո Ադրբեջանի նախագահ Իլհամ Ալիևը և Թուրքիայի նախագահ Ռեջեփ Թայիփ Էրդողանը Ջաբրայիլի շրջանում առանձնազրույց են ունեցել։
Հանդիպումից հետո նախագահները հանդես են եկել հայտարարություններով։
«Այսօր մենք հանդիպում ենք անցկացնում Ջաբրայիլում։ Ջաբրայիլ, որպես այդպիսին, չկա։ Շուրջը ավերված է, հայերը քանդել են ամեն ինչ։ Բայց մենք վերադարձել ենք, կյանքն այստեղ աշխուժանում է»,- ասել է Ալիևը։
«Թուրքիան մեր հիմնական դաշնակիցն է։ Մեր եղբայրությունը պատերազմից հետո միայն ուժեղացել է։ Մենք ստորագրեցինք Շուշայի հռչակագիրը։ Մեր եղբայրությունն ազդակ է աշխարհի և տարածաշրջանի երկրներին։ Եթե ինչ-որ մեկը որոշի մեր դեմ ագրեսիա իրականացնել, ապա մեր գործընկերությունը նրանց համար ազդանշան կլինի»,- հավելել է նա։
Ալիևի խոսքով՝ շատ երկրներ ճգնաժամի մեջ են, «դժվար ժամանակներ են ապրում։ Բայց Թուրքիան առաջ է գնում, նախագծեր իրականացնում։ Բոլորը հաշվի են առնում Թուրքիայի հաջողությունները, և բոլորը գիտեն, որ դրանցում գլխավոր դերը պատկանում է Ռեջեփ Թայիփ Էրդողանին»։
«Թուրքիան կշարունակի մասնակցել տարածաշրջանում իրականացվող նախագծերին։ Մեր հարաբերությունները տարածաշրջանայինից տեղափոխվում են համաշխարհային համագործակցության մակարդակ»,- ընդգծել է Ադրբեջանի նախագահը։
Իր հայտարարության մեջ Ռեջեփ Թայիփ Էրդողանը շեշտել է, որ ուրախ է ներկա գտնվել «նման ժամանակակից օդանավակայանի բացմանը»։
