Առանց դիվանագիտական փորձի, անսպասելի նշանակված․ ո՞վ է Ադրբեջանի նոր արտգործնախարարը

Ադրբեջանի նոր արտգործնախարար Ջեյհուն Բայրամովը դիվանագիտական փորձ չունի, հայտնի է իրավաբանական ընկերությունում իր աշխատանքով, և այս պաշտոնին նշանակվել է 2020 թ–ի հուլիսի 16–ին՝ երկրի բնակչության և փորձագետների համար անսպասելիորեն։

Նրա նշանակման մասին հայտարարվել է Էլմար Մամեդյարովի պաշտոնանկության մասին նույնքան անսպասելի լուրին գրեթե զուգահեռ։ Մամեդյարովն ԱԳ նախարարի պաշտոնն էր զբաղեցնում 15 տարի և ազդեցիկ ֆիգուր էր երկրում։

Նրա պաշտոնանկությանը նախորդել էր նախագահ Իլհամ Ալիևի հայտարարությունն այն մասին, որ հուլիսի 12–ին՝ Հայաստանի և Ադրբեջանի սահմանին տեղի ունեցած մարտերի ժամանակ բոլորն աշխատանքի էին՝ բացառությամբ արտգործնախարարի։

Ադրբեջանի արտգործնախարարն ազատվել է պաշտոնից

Ադրբեջանի նախագահ Իլհամ Ալիևն Էլմար Մամեդյարովին ազատել է երկրի արտգործնախարարի պաշտոնից և գրեթե անմիջապես այդ պաշտոնում նշանակել Ջեյխուն Բայրամովին, որը մինչ այս կրթության նախարարն է եղել

Ինչպես է Ադրբեջանի նախագահը պաշտոնանկ արել Էլմար Մամեդյարովին, որն այդ պաշտոնը զբաղեցնում էր 15 տարի

Նոր նախարար Ջեյհուն Բայրամովը երկու բարձրագույն կրթություն ունի․ նա իրավաբան է և տնտեսագետ։ Վերջին երկու տարիներին կրթության նախարարն էր՝ 2018 թ–ի ապրիլի 23–ից։

Ինչպես հաղորդում է «Ազադլիգ» ռադիոկայանը, Ջեյհուն Բայրամովն առավել հայտնի է ոչ թե որպես կրթության նախարար, այլ որպես OMNİ իրավաբանական ընկերության ղեկավար, նա զբաղեցնում էր տնօրենի պաշտոնը կառավարությունում հայտնվելուց առաջ։

Տնտեսագետ Թոգրուլ Մաշալին JAMnews–ին ասել է, որ OMNİ ընկերությունը 2019 թ–ին փորձում էր հասնել Ադրբեջանի օկուպացված տարածքներում [Ղարաբաղն ու հարակից յոթ շրջանները, որոնք չճանաչված Լեռնային Ղարաբաղի Հանրապետության իշխանության վերահսկողության տակ են 1990–ականների սկզբին տեղի ունեցած պատերազմից հետո – JAMnews] գունավոր մետաղների ապօրինի արդյունահանման միջազգային իրավական գնահատականի։

Այդ նախագծի համար OMNİ–ն պատվիրատուից՝ «Azərqold» ԲԲԸ–ից, 195,5 հազար մանաթ [մոտ $115 հազար] գումար էր ստացել, ասել է Մաշալին։

Մեկնաբանություն

Քաղաքական մեկնաբան Շահին Հաջիևը JAMnews–ին տված հարցազրույցում ասել է․

«Արտգործնախարարի պաշտոնում մի մարդու նշանակումը, որը ոչ մի օր դիվանագետ չի եղել, հարցեր է առաջացնում։

Նախարարության գլխավոր աշխատանքը ղարաբաղյան կարգավորման բանակցությունները վարելն է։ Թե որքանով է հավանական, որ մարդը, որը ոչ մի տեղեկություն չունի, «խոհանոցին» ծանոթ չէ, մասնակցի այդ գործընթացին, չեմ կարող ասել»։

Ադրբեջանի ԱԳՆ–ն սկանդալային իրադարձությունների կենտրոնում է սկսել հայտնվել 2020 թ–ի ամառվա սկզբից։

Հունիսին ադրբեջանական մի քանի լրատվամիջոցներում տեղեկություններ են հայտնվել այն մասին, որ այն ժամանակվա նախարար Էլմար Մամեդյարովի ընտանիքը թանկարժեք գույք ունի ԱՄՆ–ում։

ԱԳՆ–ն այն ժամանակ դիմեց Պետանվտանգության ծառայություն՝ առաջարկելով «հետաքննել Էլմար Մամեդյարովին սևացնելու արշավը»։

2020 թ–ի հուլիսին սկանդալային կալանավորումներ տեղի ունեցան ԱԳՆ–ում․ կաշառակերության համար ձերբակալվեց մի քանի բարձրաստիճան պաշտոնյա։