Ադրբեջանը և Ուկրաինան սատարում են միմյանց տարածքային ամբողջականությանն, ասել է Զելենսկին Բաքվում
Բաքու կատարած իր այցի ընթացքում Վլադիմիր Զելենսկին շնորհակալություն է հայտնել Ադրբեջանին «Ուկրաինայի ինքնիշխանությանն ու տարածքային ամբողջականությանը սատարելու և ճանաչելու համար», իսկ Իլհամ Ալիևն այս թեմայով ոչ մի արտահայտություն չի արել։ Ուկրաինայի և Ադրբեջանի նախագահների հանդիպումը կայացել է Բաքվում դեկտեմբերի 17-ին։ Սա Վլադիմիր Զելենսկու առաջին պաշտոնական այցն էր Բաքու՝ նախագահ ընտրվելուց հետո։
• Մեղրամիս հայ-ադրբեջանական հարաբերություններում
• Ուկրաինան մաքուր էջի՞ց է սկսում
Հանդիպման արդյունքները․ շնորհակալություն և կհամագործակցենք
«Ցանկանում ենք շնորհակալություն հայտնել Ադրբեջանին Ուկրաինայի ինքնիխանությունը և տարածքային ամբողջականությունը ճանաչելու և սատարելու համար։ Ցանկանում եմ, որ իմանաք, որ մենք նույնպես աջակցում ենք Ադրբեջանի տարածքային ամբողջականությանն ու ինքնիշխանությանը», — մեջբերում է President.az կայքը Զելենսկու խոսքերը, որոնք նա ասել է Ալիևի հետ հանդիպման ժամանակ։
Ընդ որում, Ալիևն Ուկրաինայի տարածքային ամբողջականության մասին (Ղրիմի և Դոնբասի վերաբերյալ) ոչինչ չի ասել այդ հանդիպմանը։ Համենայնդեպս, բաց աղբյուրներում նման արտահայտություն չկա։
Կողմերը պայմանավորվել են, որ Կիևն աջակցություն կցուցաբերի Ադրբեջանի SOCAR պետական նավթային ընկերությանն ուկրաինական շուկայում նրա աշխատանքում և կսատարի Բաքու-Թբիլիսի-Էրզրում գազատարի նախագծին։
Բացի այդ, ըստ Զելենսկու, Ուկրաինան և Ադրբեջանը մտադիր են ակտիվացնել փոխադարձ ավիացիոն, ավտոմոբիլային և երկաթուղային փոխադրումներն ու շահագրգռված են տիեզերական ոլորտում և ավիացիայում նախագծերի իրականացմամբ։
«Ընդհանուր դժբախտություն», կամ «Ճիշտ է արել, որ լռել է»
Զելենսկին Ադրբեջան է ժամանել Իլհամ Ալիևի հրավերով։ Սակայն հանդիպման նախօրեին «Ատլաս» հետազոտական կենտրոնի ղեկավար, քաղաքագետ Էլհան Շահինօղլուն փորձել է հանրության ուշադրությունը հրավիրել այն բանի վրա, որ Ադրբեջանը Հարավային Կովկասի առաջին երկիրն է, որն այցելել է Ուկրաինայի նախագահը։ Շահինօղլուի տեսանկյունից, դա հենց այնպես չէ․
«Դա մի քանի պատճառ ունի։ Նախ, Ուկրաինայի և Ադրբեջանի միջև առևտրատնտեսական կապերն ավելի ակտիվ են, քան Վրաստանի և Հայաստանի հետ։ Ադրբեջանին և Ուկրաինային միավորում է նաև ընդհանուր դժբախտությունը։ Լեռնային Ղարաբաղի և Դոնբասի խնդիրների միջև էական տարբերություն չկա»։
Նախագահների հանդիպումից հետո սոցցանցերի շատ օգտատերեր ուշադրություն են դարձրել նրան, որ Ալիևը բացահայտ չի հայտարարել, որ Ղրիմն ու Դոնբասն օկուպացված են Ռուսաստանի կողմից։ Մյուսները համարում են, որ նա չպետք է նման բան աներ, քանի որ Ադրբեջանը ստորագրել է ՄԱԿ-ի Գլխավոր ասամբլեայի բանաձևը, որը ճանաչում է Ուկրաինայի տարածքային ամբողջականությունը, և դա լիովին բավարար է, իսկ նմանատիպ հրապարակային հայտարարությունները կարող են փչացնել Ռուսաստանի հետ Ադրբեջանի հարաբերությունները։
Մի քանի մեկնաբանություն․
«Եթե Ադրբեջանը լռում է Ղրիմի և Դոնբասի մասին, ուրեմն թող չնեղանա, որ ուրիշ երկրները լռում են Ղարաբաղի մասին»;
«Պաշտոնական Բաքուն բոլոր փաստաթղթերում Ղրիմն Ուկրաինայի տարածք է ճանաչում։ Ուրեմն ի՞նչ բողոքներ կարող են լինել»;
«Ռուաստանի կողմից Ղրիմի և Դոնբասի օկուպացիայի մասին հայտարարելը կնշանակի կենդանի և ոչ այնքան ադեկվատ վիշապի պոչը տրորել, որի տաք որովայնի տակ մենք ապրում ենք»։
