Ի՞նչ անել Աբխազիայի ընտրություններից հետո․ կարծիք Սուխումից
Աբխազիան՝ ընտրություններից հետո․ ի՞նչ անել
2025 թվականի մարտի 1-ին Աբխազիայում տեղի ունեցավ նախագահական ընտրությունների երկրորդ փուլը, որի արդյունքում հանրապետության նոր ղեկավար դարձավ Բադրա Գունբան, ով փաստացի հանդիսանում է նախկին նախագահ Ասլան Բժանիայի իրավահաջորդը և Կրեմլի նախընտրելի թեկնածուն: Այսինքն, ըստ էության, իշխանությունը Աբխազիայում չի փոխվել, թեև հենց այդ նպատակով էին նախաձեռնվել արտահերթ նախագահական ընտրությունները:
Հայտնի հասարակական գործիչ Ախրա Բժանիան կարծում է, որ ընտրություններն արդար չեն եղել։ Նա հրաժարվում է ճանաչել դրանց արդյունքներն ու մտորում է այն մասին, թե ինչպես կապրի Աբխազիան այսուհետ:
Ախրա Բժանիա
«Աբխազիայի Սահմանադրությունում գրված չէ, որ քաղաքացին պարտավոր է ճանաչել ընտրությունների արդյունքները, որոնց ընթացքում խախտվել են միջազգային իրավունքի նորմերը, բոլոր հնարավոր իրավական ու բարոյական օրենքները:
Հետևաբար, ես չեմ ճանաչում այս ընտրությունները և կանեմ ամեն հնարավորը՝ նվազագույնի հասցնելու համար այն հետևանքները, որոնք դրանք կբերեն մեր հանրապետությանը:
Բայց ես չեմ կարող չընդունել իմ ընկերների, հարևանների, գործընկերների, զինակիցների կամքը, նույնիսկ եթե նրանց կարծիքը համարում եմ ոչ միայն սխալ, այլև վտանգավոր հենց նրանց համար: Հետևաբար, եթե այսօր ես ինչ-որ բան պատրաստ եմ ընդունել, ապա դա միայն նրանց ընտրությունն է:
Ի՞նչ անել հիմա
Առաջին հերթին՝ հասկանալ, թե ինչ հսկայական աջակցություն է դեռևս վայելում աբխազական ազգային գաղափարը, և այդ փաստը դարձնել քաղաքական պայքարի դրոշ:
Երկրորդ՝ իրականացնել իրավիճակի քննադատական վերլուծություն: Ուժերի դասավորվածությունը չի փոխվել: Իշխանության մեջ դեռևս մնում են մարդիկ, ովքեր չեն հավատում, վաճառում և նվիրաբերում են: Ընդդիմությունը նորից պետք է պայքարի՝ նրանց թույլ չտալով մասերի բաժանել այն, ինչ մեզ է պատկանում իրավունքով:
Միայն հանրահավաքներով և հայտարարություններով սահմանափակվել չի ստացվի: Անհրաժեշտ են նոր գաղափարներ և մեթոդներ: Պահանջվում է իրական կուսակցաշինություն, պայքար քաղաքացիների գաղափարների համար: Անհրաժեշտ են գաղափարներ և ծրագրեր, որոնք կդառնան քաղաքացիների սեփական գաղափարները, ոչ թե նրանց կներկայացվեն բացառապես ընտրություններից առաջ:
Պետք է առավելագույն ջանքեր գործադրել սեփական թեկնածուներին տեղական և հանրապետական իշխանության մարմիններում առաջ մղելու համար:
Մենք պետք է պահանջենք ոչ միայն արտաքին, այլև պետական հաստատությունների ներքին բարեփոխումներ։
Անհրաժեշտ է ամեն կերպ աջակցել և պաշտպանել ազատ մամուլը և ճնշում գործադրել ազգային հեռուստատեսության վրա:
Պետք է բաց և փաստարկված ձևով Ռուսաստանից պահանջել դադարեցնել մեր քաղաքացիների նկատմամբ քաղաքական հետապնդումներն ու միջամտությունը ընտրական գործընթացներին:
Մեզ սպասում են դժվարին և կարևոր գործեր:
Բայց ամենակարևորն այն է, որ մենք ունենք ոչ անտարբեր քաղաքացիներ և հազարավոր երիտասարդներ, ովքեր պատրաստ են աշխատել և պայքարել՝ հետագայում ևս ազատ երկրում ապրելու համար»:
