Աբխազական ընդդիմությունն արդյո՞ք փողոց դուրս կգա
Նախագահ Ռաուլ Հաջիմբան կարծես անհանգստացած է, որ Աբխազիայում ներքաղաքական ճգնաժամը կարող է վերածվել փողոցային պայքարի: Ամեն դեպքում, հենց այսպիսի տպավորություն է թողնում Քաղաքական խորհրդատվական խորհուրդ ստեղծելու նրա առաջարկը: Խորհուրդը պետք է կազմված լինի բոլոր քաղաքական, այդ թվում նաև՝ ընդդիմադիր կազմակերպությունների ղեկավարների:
Գլխավոր ընդդիմադիր ուժը՝ «Ամցախարա» կուսակցությունն արդեն անցել է շփման կտրուկ ոճի: Կուսակցության՝ հոկտեմբերի 21-ին տեղի ունեցած ժամանակային առումով վերջին համաժողովին Հաջիմբայի հեռացման պահանջով բանաձև է ընդունվել, նախագահին նաև զգուշացրել են համաժողովրդական հավաք անցկացնելու մասին: Ընդդիմությունը, որի կորիզը հիմնականում նախկին նախագահ Ալեքսանդր Անկվաբի կողմնակիցներն են, ներկայիս նախագահին մեղադրում են, որ նրա կառավարման մեկ տարվա ընթացքում երկրի սոցիալ-տնտեսական իրավիճակը վատթարացել է, բոլոր ոլորտներում հետընթաց է գրանցվել և, նրանց կարծիքով, իշխանության գլուխ է եկել դիլետանտների թիմ:
Նախագահն իր հերթին մեղադրեց ընդդիմադիրներին երկրում տիրող բարդ իրավիճակի համար: Նրա խոսքով, մի շարք խնդիրներ, որոնց հետևանքով Աբխազիան հայտնվել է խորը սոցիալ-քաղաքական ճգնաժամի մեջ՝ վերածելով պետությունը քրոնիկ խնամարկյալի ահռելի պարտքեր կուտակած, մինչև ուղնուծուծը կոռումպացված բյուրոկրատիայով ու քայքայված տնտեսությամբ: Սա է նախկին իշխանության թաղած ժառանգությունը: «Այժմ, դառնալով ընդդիմություն, նրանք մոռացել են՝ ով է նման անտաղանդ կերպով երկիրը հասցրել հուսահատության», — ասում է Հաջիմբան:
Խորհրդատվական խորհուրդ ստեղծելու նախագահի գաղափարին աջակցում է պատգամավորների մեծամասնությունը և քաղաքացիական հասարակությունը: Աբխազիայի հասարակական պալատի քարտուղար Նատելա Ակաբան որպես նմանատիպ հանրային երկխոսության հարթակ քաղաքական գործիչներին առաջարկում է օգտագործել Հանրային պալատը, քանի որ «արժե, որ նախագահը ընդդիմադիր քաղաքական կուսակցությունների ներկայացուցիչների հետ հանդիպումն անցկացնի հանրային կերպով, այլ ոչ թե ծածուկ:
Ընդդիմությունը բացահայտ կերպով անտեսեց նախագահի նախաձեռնությունը. նրա և ոչ մի առաջնորդ այդպես էլ չմեկնաբանեց այդ գաղափարը, ասես՝ այն չէր էլ եղել: Ընդդիմադիրներն ասում են, որ Հաջիմբան պատրաստ չէ երկխոսության, ինչի առթիվ «Ամցախարան» պատրաստվում է ստորագրահավաք կազմակերպել իշխանությանը վստահելու վերաբերյալ հանրաքվե անցկացնելու համար: Հանրաքվե անցկացնելու համար անհրաժեշտ է 10 հազ. ստորագրություն:
«Ամցախարան» աբխազական քաղաքական դաշտում հայտնվել է 1999թ.-ին որպես Վրաստանի հետ պատերազմի վետերանների հասարակական-քաղաքական շարժում: Սկզբում աջակցելով նախագահ Սերգեյ Բաղապշին, նրա մահից հետո՝ Ալելքսանդր Անկվաբին՝ «Ամցախարան» 10 տարի շարունակ համարվել է իշխանության կարևոր հիմք: 2013թ. «Ամցախարայի» հերթական համագումարին այն վերածվեց քաղաքական կուսակցության: Դրա նոր կանոնադրության համաձայն՝ այժմ կուսակցության անդամ կարող են դառնալ ոչ միայն պատերազմի վետերանները, այլ նաև գաղափարակից ցանկացած քաղաքացի: Այն բանից հետո, երբ 2014թ. մայիսին այն ժամանակվա ընդդիմությունը Ռաուլ Հաջիմբայի գլխավորությամբ ստիպեց նախագահ Ալեքսանդր Անկվաբին հրաժարական տալ, «Ամցախարան» «իշխանական կուսակցությունից» վերածվեց ընդդիմության:
