Վրաստանի նախագահ. ցույց տանք աբխազներին ու օսերին, թե ինչպես կարող ենք ուժեղացնել ինքնավարությունը

Գեորգի Մարգվելաշվիլին կարծում է, որ նոր Սահմանադրությունում անպայման պետք է վերանայել տարածքային կառուցվածքի հարցը հօգուտ ինքնավար կազմավորումների իրավասությունների: Նախագահը կարծում է, որ դա լավ ուղերձ կլիներ աբխազներին և օսերին. «Մենք պետք է աբխազներին և օսերին ցույց տանք, թե ինչպես կարող ենք ուժեղացնել ինքնավարությունն, այդ թվում՝ Աջարիայի օրինակով»:

Սակայն իշխող կուսակցությունը չի կիսում նախագահի հայացքները և չի պատրաստվում հիմնական օրենքի նախագծում տարածքային հարցի հետ կապված փոփոխություններ մտցնել:

«Քանի դեռ հնարավոր չեն դարձել Աբխազիայի և Ցխինվալի շրջանի բնակիչների հետ խորհրդատվությունները, տարածքային կառուցվածքին չենք անդրադառնալու», — հայտարարել է խորհրդարանի նախագահ Իրակլի Կոբախիձեն:

Տարածքային կառուցվածքի մասին հարցերից բացի նախագահ Մարգվելաշվիլին այսօր քննադատեց Սահմանադրության նաև այլ կետերը: Նրա խոսքով՝ եթե փոփոխություններն ուժի մեջ մտնեն, Վրաստանում անարդարացի ընտրական համակարգ կլինի: Մարգվելաշվիլիի կարծիքով՝ ընդդիմադիր կուսակցությունների համար դժվար կլինի խորհրդարան մտնել, քանի որ, նախագծի համաձայն՝ արգելվում է ընտրական բլոկեր կազմել, բայց ընտրական շեմը բարձր է մնում՝ 5%:

Նախագահն այսօր առաջին անգամ մասնակցել է Սահմանադրության համաժողովրդական քննարկմանը: Ելույթ ունենալով Բաթումիում՝ նա ուշադրություն է հրավիրել նախագահի լիազորությունների կրճատման վրա: Նրա խոսքով՝ պետության ղեկավարը միայն ձևական է գլխավոր հրամանատար մնալու, սակայն իրական որոշումներ ընդունելու իրավունք չի ունենալու:

«Վրաստանը մի երկիր է, որը պատմական անարդարության  հետևանքով (մասամբ) օկուպացվել է ավելի հզոր հարևանի կողմից: Մեր պետականությունն ուժեղացնել մենք ստիպված ենք շատ բարդ իրավիճակում և պայմաններում: Այս իրավիճակում բանակի գլխավոր հրամանատարի պաշտոնը լուծարելը, որը նախատեսված է այս Սահմանադրությամբ, սկզբունքային հարց եմ համարում: Նախագահը նույնիսկ իրավասություն չի ունենալու պատերազմ հայտարարելու կամ չհայտարարելու», — նշել է նախագահը:

• Սահմանադրական փոփոխությունները նախաձեռնել է իշխող «Վրացական երազանք» կուսակցությունը: Ենթադրաբար խորհրդարանի գարնանային նստաշրջանի ավարտին նոր Սահմանադրություն կընդունվի:
• Վրաստանի ներկայիս գործող Սահմանադրությունն ընդունվել է 1995թ-ի օգոստոսի 24-ին: Այդ օրվանից 109 հոդվածից բաղկացած հիմնական օրենքում 33 անգամ է փոփոխություն արվել: