Ադրբեջանցի լրագրողը պահանջում է թույլ տալ բանտից Skype-ով զանգահարել իր ընտանիքին

Դատապարտված ընդդիմադիր լրագրող Աֆղան Մուխտարլին բողոքում է, որ գաղութի ղեկավարությունն արդարադատության նախարարարին չի ուղարկում Skype-ով իր ընտանիքի հետ շփվելու խնդրանք պարունակող նամակը։ Այս մասին հաղորդել է լրագրողի կինը՝ Լեյլա Մուստաֆաևան։ Ադրբեջանական օրենսդրությունում նշված չէ, որ բանտարկյալները կարող են օգտվել տեսակապից, սակայն դրա արգելք էլ չկա։

Նախապատմություն

Լրագրող Աֆղան Մուխտարլին հայտնի էր ադրբեջանական կառավարության հասցեին իր խիստ քննադատությամբ և մերկացնող հոդվածներով։ 2014 թ-ին նա Վրաստան էր տեղափոխվել։ Իսկ 2017թ-ին առևանգվել և Բաքու էր վերադարձվել։ Այստեղ նրան դատապարտեցին վեց տարվա ազատազրկման՝ մեղադրելով սահմանի ապօրինի հատման, մաքսանենգության և իշխանության ներկայացուցչին դիմադրելու համար։ Իր առևանգման համար Մուխտարլին մեղադրում է վրացի ուժայիններին և Վրաստանի կառավարությանը, որոնք իրեն «հանձնել են» Ադրբեջանին։ Նա ներառվել է նաև Ադրբեջանի քաղբանտարկյալների ցանկում, որը կազմվել է Քաղբանտարկյալների պաշտպանության կենտրոնի կողմից։

• Աֆղան Մուխտարլին՝ իր առևանգման և կալանքի մասին

• Ինչո՞ւ է Թբիլիսին դադարել ապաստան լինել ադրբեջանցի քաղէմիգրանտների համար 

• Ադրբեջանում «խղճի գերիները» պատմում են բանտային կյանքի մասին

Ի՞նչ է տեղի ունենում այժմ

Այն բանից հետո, երբ լրագրողը դատապարտվեց, նրա կինը՝ Լեյլա Մուստաֆաևան երեխայի հետ արտագաղթեց Եվրոպա։

«Մեր հնգամյա դուստրն արդեն հոգնել է հոր հետ միայն հեռախոսով խոսելուց և ուզում է տեսնել հորը։ Նա լուրջ հոգեբանական խնդիրներ ունի», — Մուստաֆաևայի խոսքերն է փոխանցում «Կավկազսկի ուզելը»։

Նրան անհանգստացնում է նաև ամուսնու առողջությունը, որը վատթարացել է այն բանից հետո, երբ նրան պատժախցում են որոշ ժամանակ պահել։ Դա հաստատում է նաև լրագրողի հանրային պաշտպան Սամիր Ասադլին։

«Վերջին շաբաթների ընթացքում Աֆղանը բողոքում է մեջքի ուժեղ ցավից, ինչպես նաև թաց հազից։ Նրան անհանգստացնում են նաև նախկինում եղած հիվանդությունները՝ շաքարախտն ու ճնշումը։ Չնայած նրան, որ ընտանիքն ինձ լիազորել է հանդիպել Աֆղանի հետ, ինձ թույլ չեն տալիս դա անել։ Լրագրողը կարող է միայն զանգահարել ինձ», — պատմել է Ասադլին։

Օրենսդրությո՞ւնն է հնացել

Քրեակատարողական ծառայության հանրային կապերի բաժինը վկայակոչում է այն, որ օրենսդրությունում չի նշվում, որ բանտարկյալները կարող են օգտվել Skype-ից։ Նախարարին հասցեագրված նամակի կապակցությամբ նրանք ասում են, որ դրա վերաբերյալ ոչ մի տեղեկատվության չեն տիրապետում։

 «Երբ պատժի կատարման մասին օրենսգիրքն ընդունվում էր, Սկայպ չկար։ Օրենքները պետք է փոխվեն դեպի բարելավումը։ Աշխարհի շատ երկրներում բանտարկյալներին թույլ են տալիս համացանցով հարազատների հետ շփվել։ Ավելին, համացանցն օգտագործվում է նաև դատարաններում ցուցմունք տալիս», — կարծում է իրավունքի ոլորտի փորձագետ Յալչին Իմանովը։

Նա հավելում է, որ, ըստ բանտարկության վայրերում գտնվող անձանց իրավունքների և ազատությունների մասին օրենքի 17-րդ հոդվածի, դատապարտյալները կարող են անսահմանափակ քանակությամբ նամակներ ուղարկել և ստանալ, ինչպես նաև հեռագրեր։ Այնպես որ, Մուխտարլիի նամակն ուղարկելուց հրաժարվելն այդ օրենքի ակնհայտ խախտում է։