«Օսկար»․ առաջին անգամ լավագույն ֆիլմն արտասահմանյան է

Հարավկորեական «Մակաբույծներ» ֆիլմն «Օսկար» մրցանակաբաշխության պատմության մեջ է մտել որպես առաջին ժապավեն, որը հաղթել է «Լավագույն ֆիլմ» անվանակարգում։ Մանրամասները CNN–ի նյութում։

Հաղթողները

Լավագույն դերասան է ճանաչվել Հոաքին Ֆենիքսը, որը «Ջոկեր» ֆիլմում գլխավոր դերն է խաղացել։

Լավագույն դերասանուհի է ճանաչվել Ռենե Զելվեգերնը «Ջուդի» ֆիլմի համար։

Իր երկար սպասված «Օսկարն» է ստացել Բրեդ Փիթը Քվենթին Տարանտինոյի «Մեկ անգամ Հոլիվուդում» ֆիլմում երկրորդ պլանի դերի համար։

Լավագույն մուլտֆիլմ է ճանաչվել «Ինչպե՞ս վարժեցնել ձեր դրակոնին։ Թաքնված աշխարհը»։

«Մակաբույծները» հաղթել են ևս երկու անվանակարգերում՝ «Լավագույն ռեժիսոր» (Պոն Չժուն Հո) և «Օտար լեզվով լավագույն ֆիլմ»։

Հաղթանակների շքերթ

Մի քանի անվանակարգերում «Օսկար» մրցանակը «Մակաբույծներ» ֆիլմի համար դարձավ միջազգային կինոփառատոններին դրա հաղթական երթի գագաթնակետը։ Սա չորրորդ հաղթանակն է, իսկ առաջինը լեգենդար Կաննի կինոփառատոնն էր։

Քննադատները փորձում են պատասխանել այն հարցին, թե ո՞րն է «Մակաբույծների» հաջողության գաղտնիքը։

Այս երգիծական կատակերգությունը պատմում է Հարավային Կորեայում երկու ընտանիքների փոխհարաբերությունների մասին, որոնք ապրում են կորեական «տնտեսական հրաշքի» տարբեր բևեռներում։ Սյուժեի կենտրոնում փոխադարձ վախերն են, որոնք միմյանց նկատմամբ ունեն հարուստներն ու աղքատները։

Քննադատների մեծ մասը կարծում է, որ «Մակաբույծների» հաջողության գաղտնիքն այն է, որ ֆիլմն անդրադարձել է աշխարհում մարդկանց մեծ մասին հուզող գլխավոր թեմային՝ աճող անհավասարությանը։

«Օսկար» մրցանակաբաշխությունն անցկացվում էր ԱՄՆ–ում նախագահական ակտիվացող ընտրարշավի ֆոնին։ Շատերն են արդեն ուշադրություն դարձրել, որ «Մակաբույծների» հաղթանակն ու արմատական ձախ քաղաքական գործիչների աճող պոպուլյարությունը միևնույն բնույթի երևույթներ են։