Վրաստանում ևս 10 քաղաքական գործիչ է հացադուլ հայտարարել՝ աջակցելով Սաակաշվիլիին

Պատգամավորները հացադուլ են հայտարարել Վրաստանում

10 ընդդիմադիր քաղաքական գործիչներ, այդ թվում՝ պատգամավորներ, նոյեմբերի 14-ի երեկոյան հացադուլ են հայտարարել՝ Վրաստանի նախկին նախագահ Միխեիլ Սաակաշվիլիին բազմապրոֆիլ հիվանդանոց տեղափոխելու պահանջով։

Նրանք միացել են պատգամավոր, «Դրոա» («ժամանակն է») քաղաքական կուսակցության առաջնորդ Էլենե Խոշտարիային, որը խորհրդարանում հացադուլ է անում նոյեմբերի 3-ից՝ պահանջելով նախկին նախագահին քաղաքացիական հիվանդանոց տեղափոխել։

«Միասնական ազգային շարժում» առաջատար ընդդիմադիր կուսակցության առաջնորդ Նիկա Մելիան կոչ է արել մասշտաբային ցույցեր սկսել ողջ երկրի տարածքում նոյեմբերի 15-ից, այդ թվում՝ սկսել ճանապարհներ փակել։

Սաակաշվիլիի առողջությունն արագ վատթարանում է, զգուշացնում են բժիշկները, քանի որ նա արդեն 45 օր հացադուլի մեջ է բանտային հիվանդանոցում, ուր տեղափոխվել է իր կամքին հակառակ։

Ինչպես հաղորդում են բժիշկները, Սաակաշվիլին արդեն չի կարողանում քայլել։ Մի քանի օր առաջ նա հայտարարել էր, որ պատրաստ է դադարեցնել հացադուլը, եթե իրեն տեղափոխեն բազմապրոֆիլ հիվանդանոց։ Սակայն կառավարությունը հրաժարվում է կատարել այդ պահանջը։

Հացադուլ են հայտարարել․

• Ակակի Մինաշվիլին,
• Դավիթ Քիրքիտաձեն,
• Լևան Բեժաշվիլին,
• Թեմուր Ջանաշիան,
• Բաչուկի Կարդավան,
• Նիկա Մաչուտաձեն,
• Աբդուլա Իսմայիլովը,
• Սուլխան Սիբաշվիլին,
• Գիորդի Գոդաբրելիձեն,
• Գիորգի Բարամիձեն։

• «Սաակաշվիլիի գործը» Ստրասբուրգում։ Ի՞նչ է գրված ՄԻԵԴ վճռում

Ավելի վաղ նախկին նախագահի ամերիկացի փաստաբան Ջոն Սենդվիջը մեկնաբանել էր տեսակադրերը, որոնք հրապարակել է Վրաստանի քրեակատարողական ծառայությունը, որոնցում երևում է, թե ինչպես է Սաակաշվիլին դիմադրում բանտային հիվանդանոց տեղափոխվելուն, իսկ նրան բռնի ուժով քարշ են տալիս մի քանի մարդ․

«Դա այն ինստիտուտը չէ, որտեղ նա անվտանգ կլինի։ Միջազգային իրավունքի համաձայն՝ պետությունը առնվազն պարտավոր է հոգ տանել բանտարկյալի նկատմամբ»։

Սենդվիջը նաև հայտարարել է, որ Սաակաշվիլիի դեմ առաջադրված մեղադրանքները «քրեական իրավախախտումներ չեն համարվում ո՛չ ԱՄՆ-ում, ո՛չ էլ միջազգային իրավունքի պրակտիկայում»։

Նախորդ իրադարձությունները

Նոյեմբերի 10-ին Ստրասբուրգի դատարանը վճիռ էր կայացրել «ժամանակավոր միջոցների» անհրաժեշտության մասին, որոնք կապված են «Սաակաշվիլիի կյանքին և առողջությանն անդառնալի վնաս հասցնելու վտանգի» և բանտային հիվանդանոցում նրա անվտանգության հնարավոր սպառնալիքի հետ։

Նոյեմբերի 11-ին Վրաստանի վարչապետ Իրակլի Ղարիբաշվիլին մերժել էր Ուկրաինայի նախագահ Վլադիմիր Զելենսկու խնդրանքն այն մասին, որ ուկրաինացի բժիշկները հետազոտեն Սաակաշվիլիի առողջական վիճակը։ Այս խնդրանքը պայմանավորված էր նրանով, որ Միխեիլ Սաակաշվիլին Ուկրաինայի քաղաքացի է։

Նոյեմբերի 12-ին վրացական 20 հասարակական կազմակերպություն ստորագրել էր դիմումը կտտանքների կանխարգելման հարցերով Եվրախորհրդի կոմիտե՝ Վրաստանի քրեակատարողական համակարգ այցելելու և նախկին նախագահի իրավական դրությունը վերահսկելու խնդրանքով։

Նույն օրը Վրաստանի կառավարությունը Եվրախորհրդարանի լեհ պատգամավոր Աննա Ֆոտիգային և Լիտվայի խորհրդարանի երկու անդամների թույլ չէր տվել այցելել Սաակաշվիլիին բանտում, թեև նրանք հատուկ այդ նպատակով էին Վրաստան ժամանել։

Միխեիլ Սաակաշվիլին գաղտնի կերպով հայրենիք է վերադարձել 2021 թ-ի հոկտեմբերի 1-ին, ութ տարվա բացակայությունից հետո, կալանավորվել է և բանտ տեղափոխվել, որտեղ գրեթե անմիջապես հացադուլ է հայտարարել։ Վրաստանի երրորդ նախագահի դեմ մի քանի քրեական գործ է հարուցվել, դրանցից երկուսով նա արդեն դատապարտվել է վեց տարվա ազատազրկման։

Փաստաբանները երկար ժամանակ է՝ պահանջում են նրան տեղափոխել քաղաքացիական հիվանդանոցներից մեկը։ Սակայն դրա փոխարեն իշխանությունը նոյեմբերի 8-ին գաղտնի կերպով, փաստացի՝ հարկադրաբար, Սաակաշվիլիին Ռուսթավիի բանտից տեղափոխել է Թբիլիսիի ծայրամասում գտնվող Գլդանի թաղամասի բանտային հիվանդանոց։

Սաակաշվիլին, նրա ընտանիքը, բժիշկներն ու ժողովրդական պաշտպանի գրասենյակը կտրականապես դեմ են այդ որոշմանը, քանի որ այնտեղ չկան անհրաժեշտ բուժսարքավորումներ։ Բացի այդ, այնտեղ իրավիճակը վտանգավոր է Սաակաշվիլիի համար, որը շատ թշնամիներ ունի քրեական աշխարհում։

Նոյեմբերի 8-ից ընդդիմությունը լայնամասշտաբ անժամկետ բողոքի ակցիաներ է անցկացնում երկու պահանջով՝ ազատ արձակել Միխեիլ Սաակաշվիլիին և արտահերթ խորհրդարանական ընտրություններ հայտարարել։