Վրաստանում արտակարգ դրության ժամանակահատվածում 7 մլն դոլարի տուգանք է սահմանվել

Վրաստանում  մարտի 31–ից մինչև մայիսի 22–ը գործող արտակարգ դրության դրույթների խախտման համար ոստիկանությունը տուգանել է շուրջ ութ հազար մարդու՝ 23 մլն լարի ընդհանուր գումարով [մոտ $7 մլն]։

Ընդդիմությունը պահանջում է, որ կառավարությունը չեղարկի տուգանքները։ Սակայն վարչապետ Գիորգի Գախարիան հայտարարել է, որ չի պատրաստվում նման խնդրանքով խորհրդարան դիմել։ Իր հերթին, խորհրդարանական մեծամասնության ներկայացուցիչները չեն բացառում այդ հարցի քննարկումը։

Ընդդիմությունը կասկածում է, որ իշխանությունները տուգանքները չեղարկելու են խորհրդարանական ընտրությունների նախաշեմին, որոնք պետք է անցկացվեն այս տարվա աշնանը։ Եվ այդպիսով փորձելու են ընտրազանգվածի լրացուցիչ ձայներ ստանալ։

Արտակարգ դրության գործողության ընթացքում դրա դրույթների խախտման համար ֆիզիկական անձինք տուգանվում էին 3 000 լարիով [մոտ $970], իսկ իրավաբանական անձինք՝ 15 000 լարիով [մոտ $4,8 հազար]։ Ընդհանուր առմամբ՝ մարտի 31–ից մինչև մայիսի 23–ը տուգանվել է 7 974 մարդ 23 922 000 լարի ընդհանուր գումարով [մոտ $7,7 մլն]։  Այդ նույն ժամանակահատվածում 15 000 լարիով [մոտ $4,8 հազար] տուգանվել են իրավաբանական անձինք։

Այնուամենայնիվ, վարչապետ Գիորգի Գախարիան, թեև հայտարարել է, որ տուգանքները չեղարկելու նախաձեռնությամբ հանդես չի գալու, սակայն չի էլ բացառել, որ նման որոշում կարող է կայացնել երկրի խորհրդարանը։

«Մեր սահմանած տուգանքներն արդյունավետ լծակ էին կարգուկանոն հաստատելու և համաճարակաբանների հորդորները կատարելու համար․․․ Սակայն համավարակը չի ավարտվել, այդ պատճառով էլ տուգանքների չեղարկումը կարող է բնակչության անկարգապահ հատվածի մոտ ամենաթողության և անպատժելիության զգացողություն առաջացնել», — իր դիրքորոշումն է պարզաբանել Գախարիան։

• Կառավարության հակաճգնաժամային պլանը
• Կառավարությունը սկսել է փրկել գյուղատնտեսությունը
• Կառավարությունը 434 մլն լարի է տրամադրել շինարարական ոլորտի աջակցությանը 

Ընդդիմությունն, իր հերթին, իշխանությունների սահմանած տուգանքներն անհամաչափ է համարում բնակչության եկամուտներին։ Վրաստանում բնակչության մեկ շնչի հաշվարկով եկամուտը կազմում է 336 լարի [մոտ $105]։ Այսպիսով, ֆիզիկական անձանց տուգանքն ինն անգամ գերազանցում է այդ ցուցանիշը։

Ընդդիմադիր «Եվրոպական Վրաստան» կուսակցությունը դեռևս մայիսի 27–ին խորհրդարանում գրանցել է արտակարգ դրության օրերին դուրս գրված երեք հազար լարի տուգանքների չեղարկման օրինագիծը։

«Մենք գիտենք դեպքեր, երբ տուգանվել են ընտանիքներ, որոնք իրենց մեքենայի մեջ են եղել։ Կամ գործող պարետային ժամը մի քանի րոպեով խախտելու և այլ աննշան խախտումների համար», — հայտարարել է «Եվրոպական Վրաստանի» առաջնորդներից մեկը՝ Սերգի Կապանաձեն՝ հիշեցնելով, որ համավարակն առանց այդ էլ վատթարացրել է մարդկանց նյութական վիճակը։

Տուգանքների չեղարկումը կարող է վատ ծառայություն մատուցել, եթե Վրաստանում համաճարակի երկրորդ ալիք սկսվի․ կարգուկանոն հաստատելն ավելի բարդ կլինի, վստահ է խորհրդարանական մեծամասնության առաջնորդ Մամուկա Մդինարաձեն։

«Տուգանվածների 90 տոկոսն, ըստ մեր տվյալների, ի վիճակի չէ վճարել այդ երեք հազար լարի տուգանքը։ Այդ պատճառով էլ մենք պետք է ինչ–որ կշռադատված որոշում կայացնենք առանց ծայրահեղությունների», — կարծում է Մդինարաձեն։

«Հնարավոր է, որ ընտրությունների նախաշեմին իշխանությունները չեղարկեն այդ տուգանքներն ու սկսեն շահարկել այդ թեման՝ հանուն լրացուցիչ ձայների», — կարծում է «Ազգային շարժման» ներկայացուցիչ Ռոման Գոցիրիձեն։

Վրաստանում կորոնավիրուսով վարակման առաջին դեպքը գրանցվել է 2020 թ–ի փետրվարի 26–ին։ Համաճարակին հակազդելու համար երկրում մարտի 21–ից մինչև մայիսի 23–ն արտակարգ դրություն էր հայտարարվել։  Դրա հետ կապված սահմանափակումները Վրաստանի իշխանությունները սկսեցին աստիճանաբար չեղարկել ապրիլի 27–ից։ Հունիսի 15–ից պլանավորվում է վերսկսել ներքին զբոսաշրջությունն, իսկ հուլիսի 1–ից՝ բացել սահմաններն արտասահմանյան զբոսաշրջիկների համար, ճիշտ է, որոշակի վերապահումներով։