13.06.2016

Վրաստանն առաջարկում է դիտել

Ատելլա Ադլեյբա

Աբխազիայի բնակիչներն այս օրերին նույնիսկ հասարակ ալեհավաքով հեռուստացույցը միացնելիս տեսնում են, որ ալիքների սովորական ցուցակին գումարվել է միանգամից 20 վրացական ալիք: Ինչպես գրում է «Էխո Կավկազա»-ն, հեռարձակումն ապահովել է վրացական «Ստերեո+» ընկերությունը:

Ինչպես պատմում է ընկերության հիմնադիր Դավիթ Զիլպիմիանին, «Ստերեո+»-ը տենդեր է շահել և աշխատել է Վրաստանը թվային հեռարձակման տեղափոխելու նախագծի վրա: Նախագծին աջակցել են Վերակառուցման և Զարգացման Եվրոպական Բանկն ու Եվրահանձնաժողովը, արժեցել է 18 մլն եվրո: Սակայն այն չէր ներառում հեռարձակում Աբխազիայի և Հարավային Օսիայի տարածքում, դա «Ստերեո+»-ի բարի կամքի միակողմանի դրսևորում է, քանի որ ընկերությունը նման պարտավորություններ չունի պետության առջև:

Նախկինում Աբխազիայի միայն արևելյան շրջանում էր վրացական ալիքների թույլ ազդանշան գալիս: Այժմ Զուգդիդիի շրջանում հզոր վերահեռարձակման կայան է տեղադրվել, որի ազդանշանը ծածկում է Օչամչիրի շրջանն ամբողջությամբ, Թկվարչելի և Գուլրիպշի շրջանները մասամբ՝ ընդհուպ մինչև Դրանդա գյուղը:

Աբխազիայի բնակիչները տարբեր կերպ են գնահատում Աբխազիայի եթերում վրացական ալիքների հայնտվելը:

Լրագրող և հասարակական գործիչ Նադեժդա Վենեդիկտովան այդ նախաձեռնությունն անիմաստ է համարում.

«Նրանք, ովքեր ուզում են վրացական ալիքներ դիտել, կարող են համացանցում էլ դա անել: Իսկ նրանք, ովքեր այդպիսի ցանկություն չունեն, սովորական ալեհավաքի միջոցով էլ չեն անի: Դա վրացական կողմի բոլորովին անիմաստ նախաձեռնություն է»:

Լրագրող Ռոին Ագրբայի կարծիքով, այդ ալիքները Գալի շրջանի բնակիչներից բացի ոչ ոքի պետք չեն.

«Չէ, որ մնացածները լեզուն չեն հասկանում: Ես դիտել եմ այդ ալիքները: Նույնիսկ ունենալով այնպիսի դիմացկուն նյարդեր, ինչպիսիք իմն են, և իմ բավարար հանդուրժող բնավորության դեպքում նույնիսկ այդ տեսարանն հավասարակշռությունից հանում է: Այդ պատճառով էլ որոշեցի անջատել արբանյակային ալեհավաքը»:

Մադլենա Խուրոշվիլի.

«Դա զիլ է, կարևորը, որպեսզի ոչ ոք վրացական ալիքները Աբխազիայի դեմ հիբրիդային պատերազմի գործիք չանվանի: Մեր տանը արբանյակային ալեհավաքը վրացական ալիքները բռնում է: Ինքս չեմ նայում, քանի որ լեզուն չեմ հասկանում, սակայն եթե թարգմանություն լիներ, թերևս նայեի: Բայց պետք չէ մոռանալ, որ ավագ սերնդից շատերը հասկանում են վրացերեն»:

Ալխաս Չկոտուա.

«Եթե այդ ալիքներով հիմնականում խոսվի այն մասին, թե ինչքան վատ է ամեն ինչ Աբխազիայում և լավ՝ Վրաստնում, և Աբխազիան անպայման պետք է Վրաստանի մաս դառնա, ապա այդ ալիքները գրոշի արժեք չունեն: Սակայն եթե դրանք պատմելու են Վրաստանում մարդկանց կյանքի, հետաքրքիր իրադարձությունների մասին, ինչո՞ւ չնայել: Տարբեր տեսակետների շնորհիվ մեզ մոտ սեփական անաչառ կարծիքն է ձևավորվում: Ոչ մի վտանգավոր բան չեմ տեսնում»:

Մարիաննա Աչբա.

«»Աբխազիայի ղեկավարությունը կարող էր մտածել այն ուղղությամբ, որպեսզի մեր երկու ալիքները հեռարձակվեին Վրաստանում: Ինչո՞ւ ոչ: Թող դա էլ բարի կամքի դրսևորում լինի»:

Ադիցա Սամանջիա.

«Չեմ ուզում ոչ տեսնել, ոչ էլ լսել ինչ-որ բան նրանց մասին: Բարի կամք նրանք արդեն ցույց են տվել 1992-1993թթ-ին»:

Ալլա Չաքրյան (Դրանդա գյուղի բնակիչ).

«Ինձ մեկ է՝ կլինեն այդ ալիքները, թե ոչ: Դրանք ինձ չեն խանգարում»:

Մզիա Մուկբա.

«Ես հաստատ չեմ նայելու: Իհարկե պետք է դադարեցնել դրանց հեռարձակումը այնպես, ինչպես սահմանն ենք գծել: Ինձ հետաքրքիր չեն նրանց ալիքները, նույնիսկ եթե քաղաքականացված չլինեն, իսկ դրանք անպայման այդպիսին կլինեն, չէ՞ որ նրանք հենց այնպես չեն նման բան որոշել»:

Աբխազիայի պետական հեռուստառադիոընկերության գլխավոր տնօրեն Լեոնիդ Ենիկը զարմացել է 20 վրացական հեռուստաալիքների հայտնվելու կապակցությամբ.

«Առաջին անգամ եմ լսում, որ Աբխազիայում վրացական հեռուստաալիքներ են հեռարձակվելու: Գիտեմ, որ Գալի շրջանում որոշ վրացական ալիքներ հասնում են, և բնակիչները հաճույքով նայում են: Ինչ-որ ժամանակ առաջ պատրաստվում էին արգելափակել դրանք, որպեսզի ոչ մի վրացական ալիք այստեղ չհասնի: Սակայն ալիքների արգելափակումը մեր իրավասությունների շրջանակում չէ, այդպիսի հարցերը պետական մակարդակով են լուծվում»:

Այս պահին Աբխազիայի տարածքում կարելի է 18 վրացական հեռուստաալիք դիտել: Երկուսը ժամանակավորապես անջատված են: