Ուկրաինայի կողմից կռված Վրաստանի ևս մեկ քաղաքացու սպառնում է ՀՀ-ից ՌԴ արտահանձնում
Վանո Սաբաշվիլիին կարող են արտահանձնել ՀՀ-ից Ռուսաստան
Ուկրաինայի կողմից կռված՝ Վրաստանի արդեն երկրորդ քաղաքացուն՝ Վանո Սաբաշվիլիին, սպառնում է Հայաստանից Ռուսաստան արտահանձնում։
Ըստ ընկերների՝ Սաբաշվիլին չգիտեր, որ Ռուսաստանը իր նկատմամբ միջազգային հետախուզում է հայտարարել։ Սեպտեմբերի 9-ին նա գործուղման է մեկնել Հայաստան, առանց խնդիրների հատել է վրացական սահմանը, սակայն հայկական կողմում ձերբակալվել է։
Վանո Սաբաշվիլին 8 տարի ծառայել է Վրաստանի զինված ուժերում։ Ռուս-ուկրաինական պատերազմի առաջին փուլում նա կռվել է Միջազգային լեգեոնի շարքերում։ Պայմանագրի ավարտից հետո վերադարձել է հայրենիք։ Ավելի ուշ չճանաչված Դոնեցկի ժողովրդական հանրապետության դատարանը հեռակա կարգով դատապարտել է նրան։
Վրացի զինծառայողի՝ Ռուսաստան արտահանձնման հարցով որոշում պետք է կայացնի հայկական դատարանը։ Ռուսաստանն ունի 40 օր՝ Սաբաշվիլիի դեմ մեղադրանքները հաստատող ապացույցներ ներկայացնելու համար։
Ներկա պահին ևս մեկ վրացի ծառայող՝ Գիորգի Քինոյանը, նույնպես գտնվում է կալանքի տակ Հայաստանում՝ սպասելով Ռուսաստան արտահանձնման մասին որոշմանը։
Հայաստանը ԱՊՀ անդամ է և պարտավոր է պահպանել Քիշնևյան կոնվենցիայի դրույթները, մասնավորապես՝ քաղաքացիական, ընտանեկան և քրեական գործերով իրավական աջակցության և իրավական հարաբերությունների մասին։ Այս կոնվենցիայի շրջանակներում գործում է սահմանի վերաբերյալ ընդհանուր տվյալների բազա, որտեղ ավտոմատ կերպով մուտքագրվում են այն անձանց տվյալները, որոնց նկատմամբ հարուցվել է քրեական գործ կամ որոնք հետախուզվում են ԱՊՀ անդամ պետությունների կողմից։
Հետևեք մեզ — Facebook | Youtube
Վանո Սաբաշվիլիին կարող են արտահանձնել ՀՀ-ից Ռուսաստան
