Սենսացիոն ձերբակալություն Ադրբեջանում․ հնարավոր է՝ գործադիր իշխանության ղեկավարն առաջին անգամ մեղադրվի կոռուպցիայի համար
Ադրբեջանի շրջաններից մեկի գործադիր իշխանության ղեկավար Նիզամեդին Գուլիևը ձերբակալվել է անվտանգության պետական ծառայության աշխատակիցների կողմից։ Ձերբակալման ենթադրյալ պատճառը կոռուպցիան ու հափշտակությունն է, որը Գուլիևն իրականացրել է պաշտոնը զբաղեցնելիս։
• Ի՞նչ է տեղի ունենում Ադրբեջանում․ հեղափոխություն վերևի՞ց, թե՞ իմիջի շտկում
• Վրացի նախկին դատախազի հայտնությունները․ կտտանքներ, առևանգումներ, շինծու գործեր
Ադրբեջանում այս դեպքն անվանել են «շոկային» և «աննախադեպ»։ Թեև բարձրաստիճան պաշտոնյաների ձերբակալություն և կալանք տեղի է ունեցել նախկինում ևս, բայց դեռ երբեք գործադիր իշխանության ղեկավարը բացահայտ չի մեղադրվել հափշտակության և կաշառակերության համար։
Ոչ մի պաշտոնական հայտարարություն դեռ չկա, սակայն ձերբակալության մասին արդեն գրել են տեղական շատ լրատվամիջոցներ։ Դրանցից որոշները փորձել են ինքնուրույն պարզել պատճառներն ու մանրամասներն, իսկ մյուսները հաշվում են պաշտոնյայի ունեցվածքը։
Յուրացված գումարներ և չասֆալտապատված ճանապարհներ
2019 թ-ի ապրիլին Նիզամեդին Գուլիևը նշանակվել է Ադրբեջանի Աղստաֆայի (Աղստևի) շրջանի գործադիր իշխանության ղեկավար։ Դրանից առաջ նա 10 տարի գլխավորում էր Գերանբոյի շրջանը։ Ըստ Modern.az կայքի՝ ֆինանսների նախարարությունը պարզել է, որ այդ պաշտոնը զբաղեցնելիս Գուլիևը պարբերաբար յուրացրել է պետական միջոցները։ Մասնավորապես, նա շինծու ձևով աշխատանքի է ընդունել 300 անձանց, իսկ աշխատավարձն իրեն պահել։ Ինչպես նաև յուրացրել է Գերանբոյ քաղաքի փողոցների ասֆալտապատման համար տրամադրված գումարները, բայց ասֆալտապատել է միայն կենտրոնական փողոցը։
Այս գործի այլ մանրամասներ դեռ հայտնի չեն։
«Վտանգավոր պաշտոն»
Ադրբեջանում գործադիր իշխանության ղեկավար լինելը փաստացի նշանակում է շրջանի կամ քաղաքի տեր լինել, և պաշտոնյային մեծ լիազորություններով է օժտում։ Հաճախ տեղի բնակիչները դժգոհ են լինում ղեկավարից, և մի քանի անգամ դա լուրջ քրեական հետևանքներ է ունեցել։
Այսպես, օրինակ, 2013 թ-ին Իսմայիլի շրջանում զանգվածային անկարգություններ տեղի ունեցան, որոնք, ինչպես կարծում են շատերն Ադրբեջանում, շրջանի ղեկավարի ամենաթողության հետևանք էին։
Իսկ 2018 թ-ի հուլիսին մահափորձ իրականացվեց Գյանջա քաղաքի գործադիր իշխանության ղեկավարի նկատմամբ։ Ըստ պաշտոնական վարկածի՝ մահափորձը կազմակերպվել էր իսլամական էքստրեմիստների կողմից, սակայն «ժողովրդական վարկածը» պնդում էր, որ դա նույնպես վրեժ էր ամենաթողության համար։
