Ռուսաստանում նախագահական ընտրություններ են անցկացվում
Մարտի 18-ին Ռուսաստանում նախագահական ընտրություններ են անցկացվում: 2008թ-ին ՌԴ Սահմանադրության փոփոխությունից հետո երկրի նախագահն ընտրվում է 6 տարի ժամկետով:
Փորձագետներից շատերը նշում էին, որ Վլադիմիր Պուտինի հաղթանակն իրենց մոտ կասկածներ չի առաջացնում, որն այս պարագայում 4–րդ անգամ կզբաղեցնի նախագահի պաշտոնը: Արդյոք այդպես կլինի, թե կլինեն անակնկալներ, հավանաբար հայտնի կդառնա միայն մարտի 19-ի առավոտյան:
Ընտրողների մասնակցությունը կարևոր է ցանկացած ընտրություններին, սակայն Ռուսաստանում այս նախագահական ընտրույթուններին դա առանձին հարց է: Եվ դա կապված է «Ընտրողների գործադուլ» աղմկահարույց ակցիայի հետ, որը մի քանի ամիս ՌԴ բոլոր շրջաններում անցկացնում էր առաջատար ռուս ընդդիմադիր գործիչ Ալեքսեյ Նավալնին:
Նա այդ երկարաժամկետ ակցիան սկսեց այն բանից հետո, երբ չկարողացավ նախագահական ընտրություններին իր թեկնածությունն առաջադրելու թույլտվություն ստանալ: Կենտրոնական ընտրական հանձնաժողովը նրան թույլ չտվեց դա անել՝ հիմնավորելով այդ քայլը չմարված դատվածության առկայությամբ. 2009թ-ին Նավալնուն մեղադրեցին «Կիրովլես» ձեռնարկության գույքի հափշտակման համար, որտեղ նա այն ժամանակ աշխատում էր: Այդ գործն արդյունքում հասավ Մարդու իրավունքների եվրոպական դատարան, որը հայտարարեց, որ Նավալնու՝ արդար դատաքննության իրավունքն այդ պարագայում խախտվել է:
Սակայն ՌԴ ԿԸՀ-ին դա չի հուզել, և Նավալնուն չեն գրանցել որպես Ռուսաստանի նախագահի թեկնածու:
Մեկ տարի շարունակ Ալեքսեյ Նավալնին խոշորամասշտաբ արշավ էր իրականացնում, շրջում երկրի քաղաքներով, հանրահավաքներ կազմամկերպում, իր յութուբյան ալիքում տեղադրում բարձրաստիճան կաշառակեր պաշտոնյաների մասին հետաքննություններ:
Նա բազմիցս հայտարարել է, որ Կրեմլի գլխավոր նպատակն այս ընտրություններին որքան հնարավոր է մեծ մասնակցություն ապահովելն է, քանի որ հենց դա է ընտրություններին լեգիտիմություն տալիս: Այդ պատճառով էլ Նավալնու կողմնակիցներից շատերն ընտրություններին գրանցվել են որպես դիտորդներ և հետևել են մասնակցությանը:
Այսօր՝ ընտրությունների օրը, լրագրողները Նավալնուն հարցրել են, թե արդյոք նա հանրահավաք է անցկացնելու ընտրատեղամասերի փակվելուց հետո: «Այսօր գիշերը կորոշվի, թե արդյոք ինչ-որ բան կլինի, քանի որ խախտումների մասին հիմնական տվյալները կհայտնվեն ընտրատեղամասերի փակվելուց հետո», — նշել է քաղաքական գործիչը:
Ի՞նչպիսին է մասնակցության հետ կապված իրավիճակը տվյալ պահին
Ըստ «Նովայա գազետայի» տեղեկատվության՝ Մոսկվայի ժամով ժամը 15.00-ին ընտրողների ամենացածր մասնակցությունը գրանցվել է Պետերբուրգում, ամենաբարձրը՝ Չուվաշիայում:
Պետերբուրգում ժամը 15:00-ի դրությամբ քվեարկել է սպասված ընտրողների 38,99 տոկոսը:
Մոսկվայում՝ 40,06 տոկոսը:
Այս կետով առաջատարներն են.
Չուվաշիան՝ 71,76 տոկոս;
Յամալո-նենեցական ինքնավար շրջանը՝ 69,93 տոկոս;
Չեչնիան՝ 68,56 տոկոս
Ա
յս նախագահական ընտրություններին Ռուսաստանում 8 թեկնածու է գրանցվել. սա վերջին 18 տարվա ընթացքում թեկնածուների ամենամեծ թիվն է: Ստանդարտ թեկնածուները ցուցակում երկուսն են՝ Վլադիմիր Պուտինն ու Վլադիմիր Ժիրինովսկին: Ժիրինովսկին մասնակցել է Ռուսաստանի պատմության մեջ տեղի ունեցած բոլոր նախագահական ընտրություններին:
Ընտրողները կարող են քվեարկել նաև Գրիգորի Յավլինսկու օգտին, որն ընտրություններին չի մասնակցել 2000թ-ից ի վեր: Իր ծրագրում նա խոստացել է դադարեցնել պատերազմները Սիրիայում և Արևելյան Ուկրաինայում, Ղրիմի կարգավիճակի վերաբերյալ միջազգային կոնֆերանս նախաձեռնել, վերանայել ՌԴ բյուջեն՝ ավելացնելով կրթության և առողջապահության համար ծախսերը: Սակայն Յավլինսկին բացահայտ հայտարարել է, որ չի հաղթի այս ընտրություններին, իր նպատակը 10 մլն ձայն հավաքելն է:
Նմանատիպ մի ծրագիր է ներկայացրել Քսենյա Սոբչակը, որը կես տարի առաջ անսպասելիորեն հայտարարել է ընտրություններին իր մասնակցության մասին: Նա իրեն ներկայցնում էր որպես «թեկնածու՝ բոլորի դեմ»: Քսենյան Սանկտ Պետերբուրգի նախկին քաղաքապետ Անատոլի Սոբչակի դուստրն է: 90-ականներին Սոբչակի ամենամոտ օգնականը եղել է Վլադիմիր Պուտինը:
Քսենյա Սոբչակը բազմիցս հանդես է եկել անձամբ Վլադիմիր Պուտինի և ներկայիս ռուսական իշխանության խիստ քննադատությամբ: Սակայն հեղինակավոր փորձագետներից շատերը կարծում են, որ Սոբչակի նախագահական արշավը համաձայնեցված է Կրեմլի հետ և Ալեքսեյ Նավալնուց ուշադրություն շեղելու միջոց է:
Այս ընտրություններին նախագահի ևս մեկ թեկնածու է Պավել Գրուդինինը, որի թեկնածությունն առաջադրվել է ՌԴ կոմունիստական կուսակության կողմից: Նա փոխարինել է Կոմկուսի ղեկավար Գենադի Զյուգանովին, որը մինչ այս 4 անգամ մասնակցել էր նախագահի ընտրություններին:
Քվեաթերթիկում ևս մի քանի ազգանուն կա՝ Սուրայկին, Տիտով և Բաբուրին: Սակայն փորձագետները միաբերան պնդում են, որ նրանց ձայների աննշան քանակ կհավաքեն:
