Տեսանյութ նրանց մասին, ովքեր պաշտպանեցին Վրաստանում խոսքի ազատությունը

Թբիլիսի

Վրաստանում բողոքի ակցիայի մասնակիցները

Մարտի 7-ը, 8-ը և 9-ը այժմ ներառված են Վրաստանի նորագույն պատմության մեջ։ Վրացական հասարակությանը հաջողվեց համախմբվել և ստիպել իշխանություններին հետ կանչել «Օտարերկրյա ազդեցության թափանցիկության մասին» օրենքի նախագիծը։ Այստեղ այն անվանում են «Օտարերկրյա գործակալների մասին ռուսական օրենք», որը, ըստ ոչ կառավարական ԶԼՄ-ների հեղինակավոր ներկայացուցիչների, սպառնում էր երկրում քաղաքացիական հասարակության և անկախ լրագրության գոյությանը։

Ամբողջ պատմությունը հակիրճ ներկայացված է այս տեսանյութում, մանրամասները՝ ստորև

Դժվար է ցուցարարների ընդհանուր թիվը ասել․ տարբեր օրերի և օրվա տարբեր ժամերի փողոց էր դուրս գալիս մի քանի տասնյակ հազարից մինչև 100 հազար մարդ։ Սկզբում բողոքի ակցիան խաղաղ բնույթի էր, սակայն շուտով խորհրդարան ուղարկվեցին հատուկ ջոկատայիններ։ Եվ երկու գիշեր անընդմեջ՝ մարտի 7-ին և 8-ին, նրանք տասնյակ հազարավոր մարդկանց ցրում էին՝ օգտագործելով արցունքաբեր գազ, խլացուցիչ նռնակներ և ջրցան մեքենաներ։

Ուժի կիրառումն էլ ավելի առաջ մղեց ցուցարարներին, և փողոց դուրս եկան շատերը այն մարդկանցից, որոնք կատարվողին հետևում էին հեռուստացույցով։ Չնայած ճնշումներին ու կալանավորումներին՝ շարժումը չմարեց, և մարտի 8-ի առավոտյան երթով ցուցարարներին միացան կանայք և այլ համախոհներ։

Ովքե՞ր էին այդ բոլոր մարդիկ

Շատ երիտասարդներ

Հանրահավաքներին հետևած լրագրողներն ու քաղաքագետները նշում են, որ երկար դադարից հետո առաջին անգամ բողոքի ակցիան հավաքել էր բազմաթիվ երիտասարդների՝ ուսանողների և ավագ դպրոցի աշակերտների։ Դեռահասները եկել էին փողոց՝ չվախենալով ոստիկաններից։

Բողոքի ակցիայի խորհրդանիշներից մեկը Վրաստանի թաեքվանդոյի 16-ամյա չեմպիոն Սալոմե Կենչիաշվիլին էր։ Ամբողջ երկիրը նրան հիշում է նրան որպես «կարմիր շալվարով աղջիկ», որը հմտորեն խուսափում էր ջրցան մեքենայի արձակած ջրի շիթից։

Պետական ծառայողներ և քաղաքականությունից հեռու մարդիկ

Վերջին տասնամյակում առաջին անգամ բողոքի ակցիաներին միացան մարդիկ, որոնց սովորաբար համարել են իշխող կուսակցությունից կախվածության մեջ գտնվող և հավատարիմ։ Խոսքը պետական ծառայողների մասին է։ Այսպիսով, ԵՄ դրոշով կինը, որը դարձավ մարտյան ցույցերի գլխավոր խորհրդանիշը՝ 47-ամյա Նանա Մալաշխիան, պարզվեց, որ Թբիլիսիի քաղաքապետարանի աշխատակից է։

Օրենքն անընդունելի համարողների թիվը գնալով ավելանում էր նաև սոցիալական ցանցերում. հարյուրավոր, եթե ոչ հազարավոր նոր գրառումներ էին հայտնվում #ոչ ռուսական օրենքին հեշթեգով։ Դրանք հաճախ հրապարակում էին տարբեր մասնագիտությունների տեր հասարակ մարդիկ, որոնք որևէ կապ չունեին քաղաքականության հետ։

Առաքիչների ֆլեշմոբ

Ամենահիշարժան իրադարձություններից մեկը առաքիչների ֆլեշմոբն էր, որոնք երթով անցան Թբիլիսիի Եվրոպայի հրապարակով: Նրանք ոչ միայն իրենց աջակցությունը հայտնեցին Վրաստանի եվրոպական ձգտումներին, այլև բարձրաձայնեցին Վրաստանի աշխատանքային օրենսդրության առանցքային թերությունների մասին՝ հույս հայտնելով, որ եվրաինտեգրումը կօգնի լուծել այդ խնդիրները։

Սպորտի և մշակույթի հայտնի գործիչներ

Սոցիալական ցանցերում գրառումներով էին հանդես եկել հայտնի մարզիկներ Խվիչա Կվարացխելիան, Զազա Պաչուլիան, Շոթա Արվելաձեն, մշակույթի գործիչներ Նինո Կատամաձեն, Նիկոլոզ Ռաչվելին, Լանա Գոգոբերիձեն, ակադեմիկոսներ Մզեկալա Շանիձեն և Ռիսմագ Գորդեզիանին, գրող Նաիրա Գելաշվիլին և այլ ճանաչված անձինք։

Նյութը պատրաստվել է Լուրերի փոխանակման ռուսալեզու մեդիացանցի (Медиасеть) աջակցությամբ