Մայիսի 1-ին Հայաստանում նշում են Աշխատանքի և աշխատավորի միջազգային օրը
Մայիսի 1-ը Հայաստանում ոչ աշխատանքային օր է. Աշխատանքի և աշխատավորի միջազգային օրը նշում են, սակայն այլևս առանց հատուկ տոնակատարության: Միայն Հայաստանի Կոմունիստական կուսակացությունն է, որ ամեն տարի այս օրը կարմիր դրոշակներով ու վզկապներով երթ է անցկացնում՝ հիշեցնելով, որ առաջին անգամ Մայիսի 1-ը նշվել է 1890 թ.-ին:
Օրը առիթ է ևս մեկ անգամ անդադառնալու աշխատանքային ոլորտի խնդիրներին ու բարձրաձայնելու աշխատողների իրավունքի պաշտպանության հարցը: Իսկ դրանք Հայաստանում, ինչպես նշում են մասնագետները, բազում են` սկսած արձակուրդների ժամանակ աշխատավարձը չվճարելուց, աշխատավարձերի ուշացումից, ոչ ամբողջական վճարումից՝ մինչև աշխատանքից անհիմն ազատում:
Այս խնդիրների առկայությունը հայտնի և իշխանություններին: ՀՀ աշխատանքի և սոցիալական հարցերի նախարարի աշխատանքի և զբաղվածության հարցերով գլխավոր խորհրդական Թադևոս Ավետիսյանն այսօր լրագրողների հետ զրույցում թվարկել է բոլոր այս և այլ խնդիրները ու նշել, որ ամենավտանգավոր երևույթը անօրինական աշխատանքն է, որը հնարավորություն չի տալիս աշխատողին պաշտպանել իր իրավունքները, եթե դրանք խախտվում են:
Իրավապաշտպանների մեծամասնոթյունն էլ կարծում է, որ ամենամեծ խնդիրներից մեկը գործազրկությունն է: Հայաստանի ազգային վիճակագրական ծառայության հրապարակած տվյալների համաձայն, 2015 թ.-ի վերջի դրությամբ Հայաստանում գործազուրկ է եղել 243.700 մարդ, որից 120. 400-ը տղամարդիկ են, իսկ 123.300-ը՝ կանայք։
Ի դեպ, տոնի առիթով բնակչությանը շնորհավորել է նաև ՀՀ նախագահ Սերժ Սարգսյանը: Նա մաղթել է արգասաբեր աշխատանք ու շեշտել, որ «արդար վաստակը հավերժական արժեք» է:
