Վրաստանի նախկին վարչապետ Ղարիբաշվիլին ընդունել է անօրինական եկամուտներ ստանալու փաստը
Ղարիբաշվիլին ընդունել է անօրինական եկամուտներ ստանալու փաստը
Վրաստանի պետական անվտանգության ծառայության (ՊԱԾ) փոխանցմամբ՝ երկրի նախկին վարչապետ Իրակլի Ղարիբաշվիլին հարցաքննվել է Կոռուպցիայի դեմ պայքարի գործակալության կողմից և ընդունել անօրինական եկամուտներ ստանալու փաստը։
«Նա ամբողջությամբ համագործակցել է քննչական մարմնի հետ և խոստովանել է, որ երկար տարիներ անօրինական եկամուտներ է ստացել։
Համապատասխանաբար, մոտակա օրերին քննությունը առկա և լրացուցիչ ապացույցների հիման վրա կդիտարկի ինչպես նրա գործողությունները որակելու, այնպես էլ նրա նկատմամբ խափանման միջոց ընտրելու հարցը»,— հայտարարել են ծառայությունից։
Հոկտեմբերի 17-ին Վրաստանի դատախազությունը հայտարարել էր, որ խուզարկություններ են անցկացվել նախկին բարձրաստիճան պաշտոնյաների և կառավարության անդամների՝ նախկին վարչապետ Իրակլի Ղարիբաշվիլիի, Պետական անվտանգության ծառայության նախկին ղեկավար Գրիգոլ Լիլուաշվիլիի և նախկին գլխավոր դատախազ Օթար Փարցխալաձեի տներում և անձնական տարածքներում։
Ավելի ուշ ՊԱԾ-ը հաղորդել էր, որ խուզարկությունների արդյունքում Ղարիբաշվիլիից, Լիլուաշվիլիից և Փարցխալաձեից, ինչպես նաև նրանց հետ փոխկապակցված ութ անձանցից առգրավվել են ընդհանուր 7 միլիոն դոլարից ավելի կանխիկ գումար, 198 զարդեր և ժամացույցներ, թանկարժեք նկարներ, մի քանի հազար փաստաթղթեր, 50 բջջային հեռախոս և 119 էլեկտրոնային սարքավորումներ։
Բացի այդ, հոկտեմբերի 22-ին Վրաստանի դատախազության քննչական դեպարտամենտի պետի տեղակալը հաղորդել է Պետական անվտանգության ծառայության նախկին ղեկավար Գրիգոլ Լիլուաշվիլիի հետ փոխկապակցված անձի՝ Կոբա Խունդաձեի կալանավորման մասին։
Խունդաձեն մեղադրվում է առանձնապես խոշոր չափերով անօրինական եկամուտների օրինականացման մեջ։ Հաղորդվում է, որ նրա տանն իրականացված խուզարկության արդյունքում առգրավվել են տարբեր չափի գումարներ պարունակող 94 ծրարներ։
Հետևեք մեզ — Facebook | Youtube
Ղարիբաշվիլին ընդունել է անօրինական եկամուտներ ստանալու փաստը
