Թբիլիսիի քաղաքապետի նախընտրական պաստառը վնասելու համար ընդդիմադիր գործիչ է ձերբակալվել
Ձերբակալվել է Էլենե Խոշտարիան
Վրաստանում ձերբակալվել է ևս մեկ ընդդիմադիր քաղաքական գործիչ՝ Էլենե Խոշտարիան: Նա արդեն իններորդն է վրացի ընդդիմադիրների շարքում, ովքեր վերջին կես տարում ձերբակալվել են քրեական մեղադրանքով:
«Դրոա» կուսակցության հիմնադիր և «Կոալիցիա փոփոխությունների համար» դաշինքի անդամ Էլենե Խոշտարիան ձերբակալվել է Թբիլիսիի քաղաքապետ Կախա Կալաձեի նախընտրական պաստառը վնասելու պատճառով։ Կալաձեն կրկին քաղաքապետի թեկնածու է առաջադրվել իշխող «Վրացական երազանք» կուսակցության ցուցակով:
Վրաստանի Ներքին գործերի նախարարությունը պաշտոնապես հայտարարել է, որ Խոշտարիան ձերբակալվել է «գույքի վնասման» մեղադրանքով և հայտնել, որ մեկնարկել է հետաքննություն Քրեական օրենսգրքի 187-րդ հոդվածով։ Այն նախատեսում է տուգանք, հասարակական աշխատանքների կատարում կամ 1-5 տարվա ազատազրկում։
Էլենե Խոշտարիան իսկապես գրել է «Ռուսական երազանք» («Վրացական երազանք» կուսակցության անվան բառախաղ- JAMnews) և «Ռուսական» բառերը Կալաձեի պաստառների վրա, որոնք փակցված են եղել նրա ընտրական շտաբի մոտ: Այդ կերպ նա իր համերաշխությունն է հայտնել 23-ամյա ակտիվիստ Մեգի Դիասամիձեին, որը նախկինում ձերբակալվել էր նմանատիպ գործողության համար:
Խոշտարիան վնասված պաստառի լուսանկարը հրապարակել է սոցցանցերում և այն մակագրել «Համերաշխություն Մեգիի հետ»:
Մեգի Դիասամիձեն ձերբակալվել էր սեպտեմբերի 9-ին: Նրա նկատմամբ քրեական գործ էր հարուցվել նույն 187-րդ հոդվածով՝ «գույքի վնասում»: Դատարանը Դիասամիձեին տուգանել էր 2000 լարիով [740 դոլար], տուգանքը վճարելուց հետո նա ազատ էր արձակվել։
Ներկա պահին Էլենե Խոշտարիայից բացի վրացական բանտում են ևս 5 ընդդիմադիր քաղաքական գործիչներ: Նրանցից շատերը ձերբակալվել են «Վրացական երազանք» կուսակցության կողմից 2025 թվականի փետրվարի 5-ին ստեղծված ժամանակավոր քննչական հանձնաժողով չներկայանալու համար։ Հանձնաժողովը ստեղծվել է նախկին կառավարության՝ «Միացյալ ազգային շարժում» կուսակցության (այժմ կուսակցությունն ընդդիմադիր է) իշխանավարման շրջանում կատարված հանցագործությունները քննելու համար:
Ձերբակալված բոլոր քաղաքական գործիչները դատապարտվել են 7-8 ամսվա ազատազրկման:
Եվս երկու ընդդիմադիրների, որոնք դատապարտվել էին նույն ժամկետով, ներում է շնորհվել այն պայմանով, որ նրանց կուսակցությունները մասնակցեն հոկտեմբերի 4-ին նախատեսված համայնքային ընտրություններին (այն ընտրություններին, որոնց համար իր թեկնածությունն է առաջադրել Կախա Կալաձեն):
Բացի այդ, սեպտեմբերի 11-ին ձերբակալվել է ընդդիմադիր քաղաքական գործիչ և «Միացյալ ազգային շարժման» նախկին նախագահ Լևան Խաբեիշվիլին: Դատախազության ներկայացրած վարկածի համաձայն՝ նա հրապարակային կոչ է արել կաշառք տալ պաշտոնատար անձանց և բռնի ձևով տապալել իշխանությունը:
Հետևեք մեզ — Facebook | Youtube
Ձերբակալվել է Էլենե Խոշտարիան
