Մոսկվա կատարած աշխատանքային այցի շրջանակներում Հայաստանի արտաքին գործերի նախարար Արարատ Միրզոյանը հանդիպել է Հավաքական անվտանգության պայմանագրի կազմակերպության գլխավոր քարտուղարի հետ։
Սա Միրզոյանի առաջին հանդիպումն է Զասի հետ՝ պաշտոնը ստանձնելուց հետո։ Օգոստոսի սկզբին Հայաստան կատարած այցի ժամանակ Ստանիսլավ Զասի գլխավորած պատվիրակության հետ հանդիպել էր ՀՀ ԱԳ նախարարի պարտականությունները կատարող Արմեն Գրիգորյանը։
«Արարատ Միրզոյանն ու Ստանիսլավ Զասը մանրամասն քննարկել են տարածաշրջանային ու միջազգային մակարդակներում տեղի ունեցող փոփոխությունների դինամիկան, որոնք անմիջական ազդեցություն են ունենում ՀԱՊԿ անդամ երկրների կենսական շահերի վրա»,- տեղեկացնում է ՀՀ արտաքին գերատեսչությունը։
Ըստ աղբյուրի՝ զրուցակիցներն անդրադարձել են ադրբեջանական ԶՈՒ-ի՝ ՀՀ ինքնիշխան տարածք ներթափանցելու հետևանքով ստեղծված իրադրությանը՝ շեշտելով իրավիճակի շուտափույթ հանգուցալուծման ու դեէսկալացիայի անհրաժեշտությունը:
Աշնանը ՀԱՊԿ նախագահությունը կփոխանցվի Հայաստանին։ Կազմակերպության գլխավոր քարտուղարը վստահեցրել է, որ կներդրվեն անհրաժեշտ ջանքեր «ՀԱՊԿ-ում ՀՀ նախագահության առաջնայնությունների առաջմղման համար»։
«ՀԱՊԿ-ում Հայաստանի գալիք նախագահությունն ակտիվ ջանքեր է գործադրելու` ուղղված կազմակերպության ներուժի զարգացմանն ու ամրապնդմանը»,- ընդգծել է ՀՀ արտաքին գործերի նախարար Արարատ Միրզոյանը։
Հիշեցնենք, որ Միրզոյանն ու Զասը մինչ այս հանդիպելու առիթ չէին ունեցել։ Օգոստոսի 9-10-ը Զասի գլխավորած պատվիրակությունը ՀՀ-ում էր, սակայն այդ ժամանակ ՀՀ ԱԳ նախարարի պաշտոնը թափուր էր։ ՀԱՊԿ գլխավոր քարտուղարը հանդիպել էր նախարարի պարտականությունները կատարող Արմեն Գրիգորյանի հետ։ Այդ հանդիպման ընթացքում ևս կողմերն անդրադարձել էին ՀԱՊԿ-ում Հայաստանի գալիք նախագահությանը։
Գրիգորյանը նշել էր, որ ՀՀ առաջնահերթություններից են լինելու ՀԱՊԿ արդյունավետության բարձրացումն ու անդամ պետությունների կարիքներին ժամանակին արձագանքելու մեխանիզմների ամրապնդումը։
Սա Միրզոյանի առաջին արտասահմանյան այցն է նշանակումից հետո։ Երեկ ՀՀ նորանշանակ արտգործնախարարը Մոսկվայում հանդիպել էր ՌԴ ԱԳ նախարար Սերգեյ Լավրովի հետ, գործընկերները հանդես էին եկել ճեպազրույցով։
