«Սա այլևս քաղաքական հետապնդում չէ, այլ լայնամասշտաբ բռնաճնշում»․ կարծիք Թբիլիսիից
ՀԿ-ների հաշիվների սառեցում Վրաստանում
«Սոցիալ-դեմոկրատական» շարժման անդամ, սահմանադրագետ Վախուշտի Մենաբդեն մեկնաբանում է Վրաստանի մի քանի ՀԿ-ների բանկային հաշիվները սառեցնելու վերաբերյալ դատարանի որոշումը:
Նա բացատրում է, որ գործը շատ լուրջ է:
Այս կազմակերպությունների նկատմամբ քննությունը վարվում է առնվազն 3 ծանր հոդվածներով, այդ թվում՝ պետական դավաճանության հոդվածով:
Թբիլիսիի քաղաքային դատարանը բավարարել է դատախազության միջնորդությունը մի շարք ոչ կառավարական կազմակերպությունների բանկային հաշիվների վրա արգելանք դնելու մասին:
Հայտարարվել է, որ գործը վերաբերում է «դիվերսիայի, ծանրացնող հանգամանքներով դիվերսիայի փորձի, իր թշնամական գործունեության մեջ արտասահմանյան կազմակերպությանը կամ արտասահմանյան վերահսկողության տակ գտնվող կազմակերպությանը աջակցելու, ինչպես նաև Վրաստանի սահմանադրական կարգի և ազգային անվտանգության հիմունքների դեմ ուղղված գործունեության համար միջոցներ հավաքագրելու» փաստերի հիման վրա դատախազության քննությանը:
Նկատի է առնվում, որ այս ՀԿ-ները, իբր, «հավաքագրել» են բողոքի ակցիաների մասնակիցներին և նրանց բռնության գործադրման կոչ արել:
Սառեցվել են հետևյալ 7 ՀԿ-ների հաշիվները.
● «Քաղաքացիական հասարակության հիմնադրամ»
● «Հանուն արդար ընտրությունների և ժողովրդավարության միջազգային ընկերություն»
● «Տեղեկատվության ազատության զարգացման ինստիտուտ»
● «Ժողովրդավարության պաշտպաններ»
● «Վրացական ժողովրդավարական նախաձեռնություն»
● «Սապարի»
● «Սոցիալական արդարության կենտրոն»
Վախուշտի Մենաբդե. ի՞նչ են նշանակում նշված քրեական հոդվածները և ի՞նչ է սպառնում ՀԿ-ներին
«Պետական դավաճանության հոդվածը նախատեսում է մինչև 20 տարվա կամ նույնիսկ ցմահ ազատազրկում:
Այլ հոդվածները, որոնց համաձայն քննություն է ընթանում այս ՀԿ-ների վերաբերյալ, նույնպես նախատեսում են երկարաժամկետ բանտարկություն:
Մասնավորապես, դրանք են՝
Դիվերսիա (հոդված 318).
- Պետության բնականոն գործունեության խաթարում՝ այն թուլացնելու նպատակով- 2-4 տարվա ազատազրկում,
- Նույն նպատակով շենքի, սարքավորման կամ հատուկ նշանակության օբյեկտի վնասում- 5-10 տարվա ազատազրկում,
- Նույն արարքը, որն ուղեկցվել է պայթեցնելով, այրելով, մարդու առողջությանը վնաս պատճառելով- 10-20 տարվա կամ ցմահ ազատազրկում:
Աջակցություն օտարերկրյա կամ օտարերկրյա վերահսկողության տակ գտնվող կազմակերպությանը իր թշնամական գործունեության իրականացման մեջ (հոդված 319)
- Վրաստանի պետական շահերը խաթարելուն ուղղված օգնություն, եթե այն չի պարունակում 318-րդ հոդվածով նախատեսված արարքի տարրեր- 7-15 տարվա ազատազրկում։
Վրաստանի սահմանադրական կարգի և ազգային անվտանգության հիմունքների դեմ ուղղված գործունեության ֆինանսավորում (հոդված 321, մաս 1).
- Նյութական միջոցների հավաքագրում՝ այն գիտակցմամբ, որ դրանք կարող են օգտագործվել 318 և 319 հոդվածներով նախատեսված հանցագործություններից որևէ մեկը կատարելու համար- 6-10 տարվա ազատազրկում,
- Նույն արարքը, որը կատարվել է կազմակերպված խմբի կողմից կամ կրկնակի (10-15 տարի), եթե տվյալ արարքն առաջացրել է ծանր հետևանքներ՝ 15-20 տարվա ազատազրկում:
Դատախազությունը նշված 7 կազմակերպություններին մեղադրում է վերը թվարկված հոդվածների ամենածանր հանցակազմերով:
Հրապարակային հայտարարության մեջ դատախազությունը գրում է, որ այս կազմակերպությունները՝
- բնակչությանն անհնազանդության և դիմադրության կոչ են արել,
- ֆինանսական աջակցություն են ցուցաբերել բռնի գործողություններին մասնակցած անձանց և նրանց ընտանիքի անդամներին,
- միջոցներ են ծախսել հատուկ տեխնիկա ձեռք բերելու համար:
Կարծես թե ռեժիմն անցում է կատարում նոր մակարդակի, և սա այլևս քաղաքական հետապնդում չէ, այլ լայնամասշտաբ բռնաճնշում»:
Հետևեք մեզ — Facebook | Youtube
ՀԿ-ների հաշիվների սառեցում Վրաստանում
