Հերթական անգամ հետաձգվել է Բաքու-Թբիլիսի-Կարս երկաթուղային գծի բացումը

Բաքու-Թբիլիսի-Կարս երթուղով երկաթուղու բացումը 2017թ-ի առաջին եռամսյակից հետաձգվել է մինչև տարվա կես: Այդ մասին հաղորդել է Թուրքիայի տրանսպորտի, ծովագնացության և կապի նախարար Ահմեդ Արսլանը Կարսի ոչ կառավարական կազմակերպությունների ներկայացուցիչների հետ հանդիպմանը:

Արսլանը երկաթուղու բացման հերթական հետաձգումը բացատրել է տեղացած ձնով: «Մարտին-ապրիլին երկաթուղին կթեստավորվի և ընթացիկ տարվա կեսին Բաքու-Թբիլիսի-Կարս երկաթուղին շահագործման կհանձնվի: …Երկրորդ փուլում մենք պլանավորում են երկարացնել երկաթուղին մինչև Նախիջևան, Իրան, Պակիստան և անգամ Հնդկաստան», — ասել է նախարարը:

Երկաթուղին կառուցվում է արդեն տասներորդ տարին: Ի սկզբանե դրա բացումը պլանավորվում էր 2011թ-ին: Այնուհետև նվազագույնը երեք անգամ հետաձգվել է այդ երթուղով գնացք ուղարկելը:

2015թ-ի հոկտեմբերին Ադրբեջանի երկաթուղիների տնօրեն Ջավիդ Գուրբանովը մամուլին վստահեցրեց, որ 2016թ-ի նոյեմբերին երկաթուղին շահագործման կհանձնվի: Սակայն դեկտեմբերին գործարկումը հետաձգվեց մինչև 2017թ-ի առաջին եռամսյակ:

• 2016թ-ի հունվարին Վրացական երկաթուղի ընկերության գլխավոր տնօրեն Մամուկա Բախտաձեն «Թրենդ» ընկերությանը հաղորդել է երկաթուղու վրացական մասի շինարարության ավարտի մասին:
• Երկաթուղու ընդհանուր երկարությունը կազմում է 826 կմ: Ենթադրվող թողունակությունը 1 մլն ուղևոր և 6,5 մլն տոննա բեռ է: Ապագայում այն կարող է ավելացվել մինչև 3 մլն ուղևոր և 20 մլն տոննա բեռ:
• Ի սկզբանե նախագծի արժեքը 422 մլն դոլար էր, որից 202 մլն դոլարը պետք է ուղղվեր վրացական մասին կառուցմանը, 220 մլն դոլարը՝ թուրքական մասի, սակայն ավելի ուշ արժեքը վերանայվեց այն ավելացնելու ուղղությամբ: 2008թ-ի վերջին նախագծի ընդհանուր արժեքն, ըստ տարբեր գնահատականների, գերազանցում է 600 մլն ԱՄՆ դոլարը: