Հայ-վրացական սահմանին գործարկվել է Բարեկամության կամուրջը
Նոր կամուրջ հայ-վրացական սահմանին
Օգոստոսի 19-ին հայ-վրացական սահմանին տեղի է ունեցել երկու երկրներն իրար կապող նոր՝ Բարեկամության կամրջի պաշտոնական բացման արարողությունը։
Կամրջի գործարկման առիթով սահմանի Բագրատաշենի հատվածում հանդիպել են Հայաստանի վարչապետ Նիկոլ Փաշինյանն ու Վրաստանի վարչապետ Իրակլի Ղարիբաշվիլին։ Առանձնազրույցի ընթացքում նրանք «կարևորել են կամրջի գործարկումն ու ընդգծել դրա դերը երկկողմ տրանսպորտային հոսքերն առավել դյուրին դարձնելու գործում»։ Այս մասին հաղորդում է Հայաստանի կառավարությունը։
- «Պետություն կառուցելը հեշտ գործ չէ». կարծիք Հայաստանի ներքաղաքական իրավիճակի մասին
- Վրաստանում հակառուսական տրամադրություններն ավելի ուժեղ են, քան 2008-ի պատերազմից հետո։ Ինչո՞ւ
- Հայաստանը Լաչինի այլընտրանքային ճանապարհի կառուցումը կավարտի 2023 թ․-ի մայիսին
Պաշտոնական Երևանի տարածած հաղորդագրության համաձայն՝ առանձնազրույցի ընթացքում Փաշինյանն ու Ղարիբաշվիլին՝
- քննարկել են Հայաստան-Վրաստան համագործակցության օրակարգային հարցեր,
- մտքեր են փոխանակել տարածաշրջանային զարգացումների շուրջ,
- վերահաստատել են բարեկամական կապերը հետևողականորեն խորացնելու և ակտիվ երկխոսությունը շարունակելու պատրաստակամությունը:
«Ղեկավարները նշել են, որ բարձրաստիճան ինտենսիվ շփումները վկայում են հայ-վրացական հարաբերությունների դինամիկ զարգացման և քաղաքական երկխոսության բարձր մակարդակի մասին»,- ասված է հաղորդագրությունում։
Նոր կամուրջը կառուցվել է մեկ տարվա ընթացքում
Բարեկամության կամուրջը կառուցվել է Դեբեդ գետի վրա։ Երկարությունը 160 մետր է։ Շինարարական աշխատանքները մեկնարկել էին գրեթե մեկ տարի առաջ։ Այդ ժամանակ հայկական կողմը հաղորդել էր, որ գործածվող կամուրջը հին է, վնասված և «այլևս ի վիճակի չէ ապահովել երկու երկրների միջև ուղևորափոխադրումներն ու բեռնափոխադրումները»։
Բագրատաշեն-Սադախլո շինարարական ծրագրի ղեկավար Իզաբելլա Մուրադյանն էր հայտնել, որ անհրաժեշտ է ստեղծել ավելի մեծ թողունակություն ապահովող և տեխնիկապես հագեցած ենթակառուցվածք։
Բարեկամության կամրջի կառուցման ծրագիրն իրականացվել է Վերակառուցման և զարգացման եվրոպական բանկի աջակցությամբ: Հյուսիսային սահմանի արդիականացման ծրագրի վարկային համաձայնագիրը ստորագրվել է 2012 թ. նոյեմբերի 23-ին: 2014 թ. դեկտեմբերի 24-ին Հայաստանի և Վրաստանի կառավարությունների միջև կնքվել է միջկառավարական համաձայնագիր, որով ստեղծվել է միջկառավարական հանձնաժողով՝ ծրագիրը համատեղ իրականացնելու նպատակով:
Ակնկալվում է, որ երկու երկրներն իրար կապող նոր կամուրջը մոտ 4 անգամ կմեծացնի ելումուտի հնարավորությունը, ըստ այդմ՝ նաև Հայաստանի և Վրաստանի միջև առևտրաշրջանառությունը։
Հին կամուրջը որպես այլընտրանքային ճանապարհ կծառայի միայն վթարային իրավիճակներում։
«Ամուր հենք է հարաբերությունները զարգացնելու համար»․ Փաշինյան
![Փաշինյանն ու Ղարիբաշվիլին կամրջի գործարկման պաշտոնական միջոցառմանը հանդես են եկել ելույթով](https://jam-news.net/app/uploads/2022/08/31953_b-1024x682.jpg)
Հայաստանի վարչապետ Նիկոլ Փաշինյանի կարծիքով՝ նման արդիական և ժամանակի պահանջներին համահունչ ենթակառուցվածքը ամուր հենք է ստեղծում «եղբայրական Վրաստանի հետ հարաբերությունները զարգացնելու և խորացնելու համար»։
Նա ասել է, որ հայ-վրացական առևտրատնտեսական հարաբերություններն ունեն մեծ ներուժ՝ շեշտելով, որ նախորդ տարվա նույն ժամանակահատվածի համեմատ տպավորիչ ցուցանիշ է արձանագրվել՝ «97 տոկոս առևտրաշրջանառության աճ»։
Փաշինյանի համոզմամբ՝ համագործակցության խորացման լուրջ հնարավորություններ կան արդյունաբերության, գյուղատնտեսության, դեղագործության, տեղեկատվության և կապի, տրանսպորտի, էներգետիկայի, զբոսաշրջության և այլ ոլորտներում։
«Տրանսպորտային միջազգային մի շարք կառույցներում փոխգործակցությունը մեզ հնարավորություն է ընձեռում իրատեսական քայլեր ձեռնարկել ոչ միայն Պարսից ծոց-Սև ծով միջազգային տրանսպորտային միջանցքի, այլև տրանսպորտի ոլորտի հանգուցային կապ ապահովող այլ նախաձեռնությունների համար»,- հայտարարել է Հայաստանի վարչապետը։
«Այս կամուրջը հզորացնում է ողջ տարածաշրջանը»․ Ղարիբաշվիլի
![Ղարիբաշվիլին կամրջի բացման արարողությանը](https://jam-news.net/app/uploads/2022/08/31956_b-1024x682.jpg)
Վրաստանի վարչապետ Իրակլի Ղարիբաշվիլիի խոսքով՝ նոր կամուրջը մարմնավորում է հայ-վրացական համագործակցության և բարեկամության հաջողությունը։
Ղարիբաշվիլիի գնահատմամբ՝ նոր կամուրջը «հզորացնում է մեզ, մեր երկրները, ողջ տարածաշրջանը»:
«Այս կամուրջը տարածաշրջանում հազվագյուտ նախագիծ է: Նրա գործարկմամբ տրանսպորտի թողունակությունը կրկնապատկվում է սահմանին, բարելավվում է անվտանգության որակը ինչպես երկու երկրների քաղաքացիների, հյուրերի, այնպես էլ տարանցիկ ավտոտրանսպորտի համար, իսկ դա, իր հերթին, կնպաստի առևտրային և տնտեսական հարաբերությունների էլ ավելի հզորացմանը»,- իր ելույթում շեշտել է Վրաստանի վարչապետը:
Նրա դիտարկմամբ՝ նոր կամուրջը ձեռք է բերում նաև ռազմավարական նշանակություն՝ որպես «Արևելք-Արևմուտք միջազգային ուղու նշանակալի մաս»:
Նոր կամուրջ հայ-վրացական սահմանին