Հայաստանում աճում է կանանց նկատմամբ բռնությունների թիվը
Լուսանկարը` Գևորգ Ղազարյան, JAMnews
Վերջին 5 տարիների ընթացքում Հայաստանում 50-ից ավելի կանանց սպանության դեպք է գրանցվել: Այս հայտարարությամբ հանդես է եկել Կանանց ռեսուրսային կենտրոնի ներկայացուցիչ Անահիտ Սիմոնյանը: Նրա խոսքով, ընտանեկան բռնության հետևանքով ամեն տարի տասնյակ կանայք մահանում են, հարյուրավորները՝ ծեծի ենթարկվում, հազարավորները՝ ահուսարսափի մեջ են ապրում:
«Չի կարելի իրավիճակն այսպես թողնել: Պետությունը պետք է ապահովի մեխանիզմներ, որպեսզի ընտանեկան բռնության հաջորդ զոհը չլինի»,- շեշտել է Անահիտ Սիմոնյանը:
Հայաստանում դեռ չկա ընտանեկան բռնության կանխարգելմանը նպաստող օրենք:
Այն, որ ընտանեկան բռնության պաշտոնական թվերը մտահոգիչ են, համաձայն է նաև արդարադատության նախարարը: Դավիթ Հարությունյանն ասել է, որ սարսափելի են ոչ միայն բացահայտված արյունալի պատմությունները, այլ նաև բռնության թաքնված դեպքերը:
Նախարարը կարծում է, որ եթե Հայաստանում ընդունվի Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին օրենքի նախագիծը, ապա մի շարք խնդիրներ ի հայտ կգան ու հարցն ավելի հեշտ լուծում կտասնա:
«Ճիշտ, պինդ, իսկական հայկական ընտանիքի դեմքը բռնությունը չէ», — ասել է արդարադատության նախարարը:
Օրենքի նախագիծն ավելի քան երլու շաբաթ է, ինչ ներկայացված է հանրային քննարկմանն արդարադատության նախարարության e-draft.am կայքէջում: Մինչև հոկտեմբերի 9-ը դեռ հնարավոր է դրան ծանոթանալ դրան, կարծիք հայտնել և քվեարկել: Այս պահի դրությամբ օրինագծին կողմ են արտահայտվել 565, դեմ՝ 502 մարդ:
Իրավապաշտպաններին մտահոգում է այն, որ շատերի կարծիքով Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին օրենքի նախագիծը հայկական ավանդական ընտանիքների համար չէ, որ այն քանդելու է ընտանիքները:
Իսկ օրինագծում հստակ նշվում է, թե որ դեպքերում պետությունն ապաստարան կտրամադրի կնոջը, եթե վերջինս բռնության ենթարկվելուց հետո հեռացել է տանից: Նախագծով սահմանվում է նաև, թե որ պարագայում կարող են ստիպել բռնարարին լքել տունը և չմոտենալ բռնության ենթարկվածին:
Կանանց իրավունքների պաշտպանությամբ զբաղվող կազմակերպություներն անհրաժեշտ են համարում օրենքի անհապաղ ընդունումը, սակայն բավարար չեն համարում բռնությունների թիվը նվազեցնելու համար: Նրանք ավելի կարևոր են համարում հանրության մշակութային ընկալումների փոփոխությունը, այդ թվում զոհի վերաբերմունքն այդ իրավիճակին:
«Մարդը պետք է թույլ չտա, որպեսզի իր հանդեպ տեղի ունենա բռնություն», — կարծում է «Ընդդեմ կանանց նկատմամբ բռնությունների կոալիցիայի» համակարգող Զարուհի Հովհաննիսյանը:
