Հայաստանի վարչապետը հրաժարական է տվել

Հայաստանի վարչապետ Նիկոլ Փաշինյանը հրաժարական է տվել։

Փաշինյանի հրաժարականը ազդարարում է Հայաստանի Ազգային ժողովը ցրելու գործընթացի մեկնարկը և արտահերթ խորհրդարանական  ընտրությունների նշանակումը։

Ինչպես ավելի վաղ հայտարարում էր Փաշինյանը, ընտրությունները կանցկացվեն դեկտեմբերի 9-ին կամ 10-ին։

Ինչու է Փաշինյանը հրաժարական տվել

Հրաժարական տալու մտադրության մասին Նիկոլ Փաշինյանն ավելի վաղ էր հայտարարել։ Մեկ շաբաթ առաջ հստակ ամսաթիվ էր նշվել՝ հոկտեմբերի 16-ը։ Զբաղեցրած պաշտոնը լքելու Փաշինյանի որոշումը կապված է արտահերթ խորհրդարանական ընտրություններ անցկացնելու մտադրության հետ։

Երկրի Սահմանադրության համաձայն՝ վարչապետի հրաժարականից հետո խորհրդարանը կամ երկու շաբաթում նախարարների կաբինետի ղեկավար պետք է ընտրի, կամ պետք է հայտարարի խորհրդարանը ցրելու մասին։ Եթե Ազգային ժողովը ցրվում է, նոր խորհրդարանական ընտրություններ են նշանակվում։

Ինչո՞ւ է արտահերթ ընտրություններ անցկացնելու անհրաժեշտություն առաջացել

Բանն այն է, որ գարնանից Հայաստանն ամբողջությամբ անցում կատարեց պետության կառավարման խորհրդարանական համակարգի։ Սակայն դրանից անմիջապես հետո երկրում «թավշյա հեղափոխություն» տեղի ունեցավ։ Իշխանության եկավ մի քաղաքական ուժ, որը խորհրդարանում մեծամասնություն չունի։ Դրա առաջնորդ Նիկոլ Փաշինյանը գլխավորում է կառավարությունը, սակայն խորհրդարանը հնարավորություն ունի արգելափակել նրա որոշումները։

Ընդհանուր առմամբ փորձագետներն իրավիճակը երկրում գնահատում են այսպես․ «խորհրդարանը չի արտացոլում ժողովրդի կամքը»։ Այս եզրակացությունը հիմնավորվում է նրանով, որ 2017թ-ի խորհրդարանական ընտրություններում հաղթանակ է տարել Հայաստանի հանրապետական կուսակցությունը։ Սակայն «թավշյա հեղափոխության» ընթացքում 2018թ-ի գարնանը նրա իշխանության դեմ ընդդիմության հետ միասին դուրս եկան տասնյակ հազարավոր մարդիկ և հասան իշխանափոխության։

Հակահեղափոխության փորձ

Արտահերթ խորհդարանական ընտրությունների անցկացման հետ կապված իրավիճակը սրվեց երկու շաբաթ առաջ։ Այն ժամանակ վարչապետը հայտնեց ընտրությունները դեկտեմբերին անցկացնելու մտադրության մասին։ Իսկ ավելի վաղ խոսվում էր, որ արտահերթ ընտրությունները պետք է անցկացվեն մինչև 2019թ-ի մայիսը՝ հստակ ժամկետներ չէին նշվում։

Եվ խորհրդարանում ներկայացված քաղաքական ուժերը փորձեցին արգելափակել դրանց անցկացումը։ Ըստ փորձագետների՝ դա բացատրվում է նախկին իշխող կուսակցության և խորհրդարանական երկու մյուս ուժերի անվստահությամբ, թե նրանք կրկին նույն քանակությամբ պատգամավորական մանդատներ կստանան։

Հետևաբար, նախկին իշխող Հանրապետական կուսակցության նախաձեռնությամբ խորհրդարանի արտահերթ  նիստ գումարվեց և կանոնակարգի մասին օրինագծում փոփոխություններ ընդունվեցին, որոնց կարող էին արգելափակել ընտրությունների անցկացումը։ Վարչապետն իր ընդդիմադիրների գործողությունները հակահեղափոխության փորձ է անվանել։

Կարդացեք նաև․ Հակահեղափոխության փորձի և դրա ձախողման բոլոր մանրամասները 

Վարչապետի պատասխան գործողությունները

Ի պատասխան վարչապետ Փաշինյանը կրկին փողոց դուրս բերեց իր տասնյակ հազարավոր կողմնակիցներին։ Նրանք շրջապատեցին Ազգային ժողովի շենքը, իսկ Նիկոլ Փաշինյանը բանակցություններ անցկացրեց քաղաքական ուժերի հետ, որոնք կատարել էին օրինագծում փոփոխությունները։

Նա բանավոր հավաստում էր ստացել նրանցից այն մասին, որ նրանք ընդհանուր առմամբ դեմ չեն արտահերթ ընտրություններին։ Եվ, ինչպես ավելի ուշ հայտարարեցին այդ բանակցությունների մասնակիցներն, իրենք համաձայն չեն միայն դրանց անցկացման ժամկետների հետ։

Նիկոլ Փաշինյանը բանակցությունները շարունակեց իր ընդդիմադիրերի հետ նախորդ շաբաթվա ընթացքում։ Սկզբում հուշագիր ստորագրվեց փոփոխություններն ընդունած կուսակցություններից մեկի առաջնորդի հետ։ Եվ Գագիկ Ծառուկյանը պաշտոնապես հայտարարեց, որ իր խմբակցության պատգամավորները չեն արգելափակի արտահերթ ընտրությունները։

Հենց դեկտեմբերին ընտրություններ անցակցնելու մտադրությանն աջակցել են նաև ՀՀԿ որոշ պատգամավորներ։

Այսպիսով, Նիկոլ Փաշինյանը ստացել էր խորհրդարանում ձայների անհրաժեշտ քանակ և արդեն կարող էր սկսել խորհրդարանը ցրելու գործընթացը։ Սյդ ճանապարհին առաջին քայլը՝ նրա հրաժարականն է։

Կարդացեք նաև․ Ինչո՞ւ է վարչապետը շտապում ընտրություններ անցկացնել և ինչու նրա ընդդիմադիրները դա չէին ուզում

ԱԱԾ-ն արտահերթ ռեժիմով է աշխատելու

Վարչապետի հրաժարականից հետո Ազգային անվտանգության ծառայությունն ու մնացած ուժային կառույցներն արտակարգ ռեժիմով կաշխատեն։ Այսօր այս տեղեկատվությունը հաստատել է ծառայության ղեկավար Արթուր Վանեցյանը։

«Մենք այն կարծիքին ենք, որ չի կարելի թուլանալ, և մենք պարտավոր ենք բոլոր միջոցառումները ձեռնարկել՝ Հայաստանի տարածքում օրենքի ցանկացած խախտումներ բացառելու համար»։

Վանեցյանը հավաստիացրել է, որ ԱԱԾ-ն վերահսկում է իրավիճակն ու թույլ չի տա երկրում սահմանադրական կարգի խախտում։