Հայաստանի խորհրդարանում 1999 թ-ի ահաբեկչության կազմակերպիչների մասին գործը վերաբացվել է
Դատախազությունը վերսկսել է խորհրդարանում մի խումբ զինված անձանց կողմից 1999 թ-ի հոկտեմբերի 27-ին իրականացրած ահաբեկչության կազմակերպիչների մասին գործի քննությունը։
Խումբը ներխուժել էր Հայաստանի Ազգային ժողովի նիստերի դահլիճ և գնդակահարել ութ հոգու։ Զոհվածների թվում էին խորհրդարանի խոսնակն ու երկու փոխխոսնակները, վարչապետը, երեք պատգամավորներ և մեկ նախարար։ Խումբն այս ակցիան կազմակերպել էր վարչապետ Վազգեն Սարգսյանին հրաժարական պարտադրելու, և ինչպես արտահայտվել են դրա մասնակիցները, երկիրը կործանումից փրկելու համար։
Ընդ որում, ահաբեկիչները պատանդ էին վերցրել մոտ 50 մարդ՝ պատգամավոր և նախարար։
Սակայն մինչև այսօր հայտնի չէ, թե ով է եղել Հայաստանի խորհդրարանում գնդակահարության կազմակերպիչը՝ «պատվիրատուն»։
Գործի վերսկսման մասին որոշումը Գլխավոր դատախազությունն ընդունել է Անահիտ Բախշյանի բողոքի հիման վրա, որը 20 տարի առաջ սպանված փոխխոսնակ Յուրի Բախշյանի այրին է։
• Ահաբեկիչների պարագլուխը, որոնք 20 տարի առաջ գնդակահարել են Հայաստանի խորհրդարանը, բանտում կմնա
Ինչի՞ դեմ է Անահիտ Բախշյանի բողոքը
Անահիտ Բախշյանը դիմել է Գլխավոր դատախազություն՝ պահանջելով չեղարկել ահաբեկչության կազմակերպիչներին վերաբերող գործի կարճման մասին վճիռը և նոր հետաքննություն սկսել։
Հետաքննության այդ հատվածն առանձնացվել էր ահաբեկչության մասին հիմնական գործից 2000 թ-ին։ Սակայն չորս տարի անց Գլխավոր դատախազությունը, վկայակոչելով «հանցակազմի բացակայությունը», որոշել էր կարճել այն։ Ըստ քննչական խմբի տվյալների՝ ահաբեկչության կազմակերպման մասին գործով նոր փաստերի և հնարավոր մասնակիցների բացահայտման համար սպառվել էին բոլոր օպերատիվ-քննչական մեթոդները։
Դեկտեմբերի 25-ին հայտնի է դարձել, որ գլխավոր դատախազությունը բավարարել է Անահիտ Բախշյանի բողոքը։ Facebook-ի իր էջում նա հաղորդել է, որ գործի վերսկսմանը հնարավոր է եղել հասնել՝ շնորհիվ 37 էջանոց բողոքի, որը նախապատրաստել է իր փաստաբանը․
«Սա նշանակում է, որ Հայաստանի Հանրապետությունը հանդես է գալիս որպես այդ պետական ահաբեկչության տուժող կողմ ու կանի ամեն ինչ բացահայտելու համար մեր պետության թշնամիներին, դա լինի ներսից, թե՝ դրսից։ Ակնդետ հետևելու ենք գործընթացին»։
Անահիտ Բախշյանն ամուսնու մահվանից հետո սկսել է քաղաքականությամբ զբաղվել, 2007-2012 թթ-ին Հայաստանի խորհրդարանի պատգամավոր է եղել։
1999 թ-ի հոկտեմբերի 27-ի ահաբեկչության մանրամասները
Խորհրդարանի նիստերի դահլիճ զինված ներխուժած խմբի առաջնորդը Նաիրի Հունանյանն էր։ Ինչպես ավելի ուշ հաղորդել էին նիստերի դահլիճում ներկա գտնվող լրագրողները, Հունանյանը մոտեցել էր Հայաստանի այն ժամանակվա վարչապետ Վազգեն Սարգսյանին և ասել․ «Բավակա՛ն է մեր արյունը խմեք»։ Դրան ի պատասխան Վազգեն Սարգսյանը պատասխանել էր․ «Ամեն ինչ արվում է քեզ ու քո երեխաների համար»։ Ի պատասխան Նաիրի Հունանյանը կրակ էր բացել։ Վարչապետը զոհվել էր։
• Չբացահայտված գործի մանրամասները, որը կարող էր բացահայտել «հասարակ թաղայինը»
Ականատեսները նշում են, որ կրակոցները լսվել են փողոցում։ Առաջին կրակոցներից կես ժամ անց խորհրդարանի շենքի մոտ հազարավոր մարդիկ են հավաքվել, ՆԳՆ մեծ ուժեր կենտրոնացվել։
Ահաբեկիչները պահանջում էին ուղիղ բանակցություններ նախագահ Ռոբերտ Քոչարյանի հետ։
Բանակցությունները կայացան։ Ահաբեկիչները պահանջում էին իրենց ուղիղ եթերի հնարավորություն տալ, նաև արդար դատաքննություն ապահովել իրենց համար։ Զրույցի մանրամասները մինչև հիմա հայտնի չեն։
Հոկտեմբերի 28-ին պատանդներն ազատ արձակվեցին, իսկ զինված խմբավորման անդամները կալանավորվեցին։
Դատարանը վճիռ կայացրեց խորհրդարանում գնդակահարությունից հինգ տարի անց։ Խմբի բոլոր անդամները՝ բացառությամբ մեկի, ցմահ ազատազրկման դատապարտվեցին։
Հայաստանում հիշում են, որ դատարանում իրենց վերջին խոսքում հանցագործները ափսոսանք կամ զղջում չեն արտահայտել։
Վարկածներ կազմակերպիչների մասին
Ահաբեկիչների պարագլուխ Նաիրի Հունանյանը պնդում էր, որ իրենց հետևում ոչ ոք կանգնած չէ։ Սակայն Հայաստանում քչերն են հավատում, որ այդ ահաբեկչությունը պլանավորվել և իրագործվել է ընդամենը մի խումբ մոլագարների կողմից։
Գոյություն ունի մի քանի վարկած, սակայն, ընդհանուր առմամբ, հասարակությունը հակված է մտածել, որ ահաբեկչությունը պատվիրված է եղել արտասահմանից․ ոմանք առաջարկում են հետքը փնտրել Ռուսաստանում, մյուսներն՝ ԱՄՆ-ում։
Մեկ այլ վարկածի համաձայն՝ հանցագործության կազմակերպիչն այն ժամանակ գործող նախագահ Ռոբերտ Քոչարյանն էր։
