«Իվանիշվիլին է հրամայել առևանգել լրագրող Մուխթարլիին». խոստովանություն բանտից
Գոգաշվիլիի նամակը բանտից
Բանտում գտնվող Վրաստանի Պետական անվտանգության ծառայության ղեկավարի նախկին տեղակալ Սոսո Գոգաշվիլին հերթական նամակն է հրապարակել և պնդել, որ օլիգարխ Բիձինա Իվանիշվիլիի հրամանով է Թբիլիսիից առևանգվել ադրբեջանցի լրագրող Աֆղան Մուխթարլին։ Այնուհետև առևանգման վայրի տեսահսկման տեսախցիկների ձայնագրությունները ջնջվել են ՊՊԾ օպերատիվ-տեխնիկական բաժնի կողմից։
Գոգաշվիլիի խոսքով՝ Բիձինա Իվանիշվիլիի անձնական հրահանգով 2017 թվականին ծեծի է ենթարկվել ՆԳ նախկին փոխնախարար Գելա Խվեդելիձեն «Բիձինային հեռախոսով հայհոյելու պատճառով», ջնջվել են նաև այս ծեծի կադրերը։
Այսօրվա հայտարարության մեջ Սոսո Գոգաշվիլին գրում է, որ իր ձերբակալությունը Բիձինա Իվանիշվիլիի հերթական անօրինական առաջադրանքն է, որը «կուրորեն իրականացրել են Պետական անվտանգության ծառայության ղեկավար Գրիգոլ Լիլուաշվիլին և ներքին գործերի նախարար Վախթանգ Գոմելաուրին»։
«Այժմ հերթը Շոթաձեինն [Գլխավոր դատախազ – JAMnews] ու Չինչալաձեինն [Թբիլիսիի վերաքննիչ դատարանի նախագահ – JAMnews] է: Ինչպես սուտ ցուցմունքներ կկարեն գործին և ինչ անօրինական պատիժ կկիրառեն։ Ի դեպ, այն, թե ինչպես են ապօրինի իրեր ու փաստաթղթեր բերվել, ֆիքսել են արտաքին և ներքին տեսահսկման տեսախցիկները և իմ ընտանիքի անդամները։ Բայց ես իմացա, որ տեսախցիկները վնասվել են, իսկ ձայնագրությունները ջնջվել են օպերատիվ-տեխնիկական վարչության կողմից այնպես, ինչպես նախորդ ապօրինի հանձնարարությունների ժամանակ»,- գրում է Գոգաշվիլին։
Ադրբեջանցի լրագրող Աֆղան Մուխթարլին Վրաստան է տեղափոխվել 2014 թվականին։ Նա հայտնի էր իր կոշտ քննադատություններով և Ադրբեջանի կառավարության դեմ ուղղված հոդվածներով: Նրան հետապնդում էին հայրենիքում, այդ պատճառով էլ ապաստանել էր Վրաստանում։
2017 թվականի մայիսի 29-ին՝ կեսօրին, Մուխթարլիին առևանգել էին Թբիլիսիի կենտրոնական թաղամասից՝ պարկ հագցնելով նրա գլխին։ Հաջորդ օրը՝ մայիսի 30-ին, լրագրողը հայտնվել էր ադրբեջանական բանտում։ Այնտեղ դատարանը նրան դատապարտել էր վեց տարվա ազատազրկման՝ սահմանի ապօրինի հատման, մաքսանենգության և իշխանություններին չհնազանդվելու մեղադրանքով։
Երեք տարվա ազատազրկումից հետո՝ 2020 թվականի մարտի 17-ին, Մուխթարլիին հանկարծակի ազատ արձակեցին և հատուկ չվերթով տեղափոխեցին Գերմանիա, որտեղ 2019 թվականից սկսած ապրում էին նրա կինն ու որդին։
Մուխթարլիի առևանգումից 5 տարի է անցել, իսկ Վրաստանում նրա գործը չի հետաքննվել։ Վրաստանի դատախազությունը պաշտոնապես հետաքննել է Մուխթարլիի առևանգման գործը՝ 143-րդ հոդվածի առաջին մասով (ազատությունից ապօրինի զրկում) և, ի վերջո, 2021 թվականի ապրիլի 21-ին նրան շնորհվել է տուժողի կարգավիճակ։
Հստակեցվել է նաև գործի որակավորումը՝ գործը վերաորակավորվել է, և այս պահին նախաքննությունը շարունակվում է՝ նախնական համաձայնությամբ խմբակային ազատությունից զրկելու հոդվածով։
Ինչ վերաբերում է Գելա Խվեդելիձեին ծեծի ենթարկելուն, ապա նրա վրա հարձակվել են իր տան մոտ 2017 թվականի ապրիլի 2-ին։ Նույնիսկ այն ժամանակ գործի մեջ տեսախցիկների ձայնագրությունները չկային։
Պետական անվտանգության ծառայության ղեկավարի նախկին տեղակալի հայտարարությունից հետո Աֆղան Մուխթարլին Facebook-ում գրառում է հրապարակել, որում պահանջում է հետաքննություն անցկացնել Սոսո Գոգաշվիլիի նկատմամբ՝ իր առևանգման հետ կապված։
«Սոսո Գոգաշվիլին՝ որպես Պետական անվտանգության ծառայության պետի նախկին տեղակալ, գիտի իմ առևանգման բոլոր մանրամասները։ Մենք պահանջում ենք նրան հարցաքննել դատախազությունում»,- գրել է Աֆղան Մուխթարլին։
Նրա խոսքով՝ մոտ ժամանակներս փաստաբանները պաշտոնական միջնորդություն կներկայացնեն գլխավոր դատախազություն և պաշտոնապես կպահանջեն հարցաքննել Գոգաշվիլիին։
Ադրբեջանցի լրագրողը Վրաստանի իշխանություններին և միջազգային կազմակերպություններին կոչ է արել ուժեղացնել Սոսո Գոգաշվիլիի նկատմամբ հսկողությունը, քանի որ «նա չափազանց շատ բան գիտի և կարող է սպանվել բանտում»։
Այսօրվա գրառման մեջ Սոսո Գոգաշվիլին դիմում է ներքին գործերի ներկայիս նախարար և Պետական անվտանգության ծառայության նախկին ղեկավար Վախթանգ Գոմելաուրիին և նրա հասցեին հերթական մեղադրանքները հնչեցնում.
«Վեց տարի առաջ դու առևանգել ես քո սեփական աղջկա նշանածին՝ Ամոյանին կամ Շամոյանին, արդեն չեմ հիշում։ Նրան խոշտանգել են, թողել են Հայաստանի հետ սահմանին, սպառնացել են, որ եթե վերադառնա, զենք կպահեն վրան, միայն այն պատճառով, որ չէին ուզում քուրդին իրենց տուն թողնել։ Այն պահին, երբ ես այնտեղ էի, քո բոլոր խայտառակ գործերն ինձ վրա էին լցնում: Հիմա ամբողջ աղբը հավաքել եք, բերել եք իմ տուն ու ուզում եք նորի՞ց լցնել վրաս»։
Սոսո Գոգաշվիլին բերման է ենթարկվել հուլիսի լույս 15-ի գիշերը։ Նրա կինը տարածել է ձերբակալության տեսագրությունը։ Տեսանյութում երևում է՝ ինչպես են հատուկ ջոկատայինները մտնում տուն, գետնին տապալում Գոգաշվիլիին և բերման ենթարկում։
Հուլիսի 18-ին Թբիլիսիի քաղաքային դատարանը լիովին կիսել է մեղադրող կողմի դիրքորոշումը և Պետական անվտանգության ծառայության պետի նախկին տեղակալ Սոսո Գոգաշվիլիի համար որպես խափանման միջոց ընտրել կալանավորումը։
![](https://jam-news.net/app/uploads/2022/07/სოსო_გოგაშვილი_ვახტანგ_გომელაური_დფგდგდფგ.jpeg)
Գործի նյութերը պարունակում են գաղտնի փաստաթղթեր և անձնական տվյալներ, ուստի դատավոր Արսեն Կալատոզիշվիլին նիստը դռնփակ է անցկացրել։
ՀՊԾ նախկին բարձրաստիճան պաշտոնյային 3 մեղադրանք է առաջադրվել՝
- պաշտոնատար անձի կողմից պաշտոնական լիազորությունների գերազանցումը, որը հանգեցրել է պետության օրինական շահերի էական ոտնահարման,
- անձնական տվյալների ապօրինի պահպանում, ստացում և տարածում,
- ապօրինի կերպով հրազենի ձեռքբերում և կրում։
Մինչ ձերբակալվելը Գոգաշվիլին հայտարարել է, որ ընտրակեղծիքների սխեմաներ է փոխանցել ոչ կառավարական կազմակերպություններին և դիվանագիտական կորպուսին։
Արդեն հուլիսի 21-ին հասարակական կազմակերպությունները հրապարակել են Գոգաշվիլիի տրամադրած նյութերը։ Փաստաթղթերում ասվում է, որ ուսումնասիրության հիման վրա բացահայտվել է իշխող կուսակցության օգտին ընտրողներին անօրինական ճանապարհով մոբիլիզացնելու լայնածավալ սխեմա։
Պետական անվտանգության ծառայությունում Գոգաշվիլիի գործունեությունը կապվում է մի քանի աղմկահարույց գործերի հետ։ 2017 թվականին բարձրաստիճան պաշտոնյան ղեկավարել է Պանկիսիի կիրճում հատուկ գործողությունը, որի հետևանքով սպանվել է 19-ամյա Թեմիրլան Մաչալիկաշվիլին։
Գոգաշվիլիի նամակը բանտից