Լեհաստանում հարկերից խուսափելու համար ձերբակալված ադրբեջանցի քաղէմիգրանտին երաշխավորությամբ ազատ են արձակել

Հունվարի 9

Ադրբեջանցի ընդդիմադիր ակտիվիստ և քաղէմիրանտ Դաշգըն Աղալարլին, որը ձերբակալվել է Ինտերպոլի կողմից Ադրբեջանի հարցմամբ, երաշխավորությամբ ազատ է արձակվել։

Աղալարլիի խոսքով, դա հնարավոր է դարձել՝ շնորհիվ միջազգային իրավապաշտպան կազմակերպությունների, Նորվեգիայի կառավարության միջամտության և Լեհաստանի քաղաքացու երաշխավորությամբ, որի անունն ակտիվիստը չի նշել։

Դաշգըն Աղալարլին ասում է, որ Ադրբեջանի իշխանություններն իրեն մեղադրում են հարկերից խուսափելու համար։ Այդ պատճառով էլ Ինտերպոլը ձերբակալել է նրան լեհական Գդանսկ քաղաքի օդանավակայանում։ Աղալարլին այդ մեղադրանքը շինծու և քաղաքական ենթատեքստ ունեցող է համարվում։

Այժմ Լեհաստանի դատախազությունը պարզելու է, թե որքանով են հիմնավորված ադրբեջանական կողմի մեղադրանքներն, ու արդյո՞ք ակտիվիստի արտահանձնման համար հիմքեր կան։ Քանի դեռ հետաքննություն է գնում, Աղալարլին Վարշավայում է գտնվելու։

Հունվարի 6

Ադրբեջանցի քաղէմիգրանտ Դաշգըն Աղալարլին, որը երեք տարի առաջ քաղաքական ապաստան էր ստացել Նորվեգիայում, հունվարի 6-ին կալանավորվել է Ինտերպոլի կողմից Գդանսկ քաղաքի (Լեհաստան) օդանավակայանում։

Ըստ Աղալարլիի՝ իրեն կալանավորել են ադրբեջանական իշխանությունների հարցմամբ և պատրաստվում են հետ ուղարկել Ադրբեջան։ Թե ինչ մեղադրանքներ են նրան ներկայացվում, պարզ չէ։ Աղալարլին կարծում է, որ ադրբեջանական իշխանությունները հետապնդում են իրեն։

2014 թ-ին Աղալարլին արդեն կալանավորվել էր Վրաստանում հարկերի չվճարման մեղադրանքով։

• Նոր Կասաբլանկայի լրտեսական կրքերը․ ինչո՞ւ ադրբեջանցի քաղէմիգրանտներն այլևս աջակցություն չունեն Թբիլիսիում

• Ինչպե՞ս են Լեհաստանում ապրում վրացի աշխատանքային միգրանտները

Վրաստանից դեպի Նորվեգիա

Ադրբեջանում Դաշգըն Աղալարլին ընդդիմադիր գործունեությամբ էր զբաղվում։ 2014 թ-ին նա ընտանիքով Վրաստան էր տեղափոխվել։ Վրաստանում հատատվելուց կարճ ժամանակ անց նրա նկատմամբ հետախուզում էր հայտարարվել հարկերի չվճարման համար, նա կալանավորվել էր Թբիլիսիում և քննչական մեկուսարան տեղափոխվել։ Կես տարուց նրան այնտեղից դուրս բերեցին տեղի իրավապաշտպանները։

2017 թ-ին Աղալարլին քաղաքական ապաստան էր ստացել Վրաստանում, սակայն հետո զրկվել էր այդ կարգավիճակից և ստիպված եղել լքել Վրաստանը։

Ի վերջո, նա քաղաքական ապաստան էր ստացել Նորվեգիայում։ Այժմ նա այնտեղ է ապրում և համագործակցում Ֆրանսիայից հեռարձակվող Turan Tv քաղէմիգրանտական հեռուստաընկերության հետ։

Այս բոլոր իրադարձությունների պատճառը՝ ներառյալ ներկայիս կալանքը, Դաշգըն Աղալարլին համարում է այլակարծության համար ադրբեջանական իշխանությունների կողմից հետապնդումը։

Կալանք Գդանսկում

«Ադրբեջանական անձնագիրը, որով իմ նկատմամբ հետախուզում էր հայտարարվել, արդեն վավեր չէ, և իմ փաստաթուղթը նորվեգական է։ Լեհական իշխանությունների ներկայացուցիչներն ինձ ասում են, որ այդ ամենն իրենք պետք է հետաքննեն», — պատմել է Դաշգըն Աղալարլին «Կավկազսկի ուզել» կայքին։

Ադրբեջանի գլխավոր դատախազությունից և արտգործնախարարությունից ոչ մի մեկնաբանություն դեռ չկա։

Turan Tv-ի հաղորդավար Ֆիքրեթ Հուսեյնլին (նույնպես Նիդերլանդներում բնակվող քաղէմիգրանտ), ֆեյսբուքյան իր էջում գրել է, որ «Լեհաստանում Ադրբեջանի դեսպանատունը սկսել է Դաշգըն Աղալարլիի արտահանձնման թույլտվություն ստանալու գործընթացը»։ Նրա կարծիքով՝ անհրաժեշտ է, որ միջազգային կազմակերպություններն ու իրավապաշտպանները բոլոր ջանքերը գործադրեն խնդրի լուծման համար, քանի դեռ ուշ չէ։

Սոցցանցերի շատ այլ օգտատերեր մտածում են, թե ինչպես օգնել Աղալարլիին կամ պարզապես պահանջում են նրան ազատ արձակել։

Ոչ առաջին դեպքը

Սա բնավ առաջին դեպքը չէ, երբ ադրբեջանցի ընդդիմադիր ակտկվիստներին, լրագրողներին և քաղէմիգրանտներին արտաքսում են, արտահանձնում կամ պարզապես առևանգում այլ երկրներից։

Այդ տեսանկյունից ամենաաղմկահարույց դեպքը տեղի էր ունեցել 2017 թ-ին․ լրագրող Աֆղան Մուխտարլիին առևանգել էին Վրաստանից և Ադրբեջան տեղափոխել, այնտեղ դատապարտել վեց տարվա ազատազրկման սահմանի ապօրինի հատման, մաքսանենգության և իշխանության ներկայացուցչին դիմադրելու մեղադրանքով։ Միջազգային իրավապաշտպան կազմակերպություններն այդ կալանքը քաղաքական են համարում և Մուխտարլիին քաղբանտարկյալ ճանաչում։

Մեկ այլ դեպք էր տեղի ունեցել 2019 թ-ի մարտին, երբ Ռուսաստանն արտաքսել էր Ադրբեջանի  հարավում ապրող թալիշ ազգային փոքրամասնության իրավունքների համար պայքարող Ֆահրադին Աբասովին։ Նա կալանավորվել էր Բաքվի օդանավակայան ժամանելուց։