Թբիլիսիում, հնարավոր է, «Վարդերի հեղափոխության» հրապարակ այլևս չլինի: Այն պատրատսվում են վերանվանել
Թբիլիսիի կենտրոնում գտնվող «Վարդերի հեղափոխության» հրապարակը, հնարավոր է, վերանվանվի «Առաջին Ժողովրդավարական Հանրապետության» հրապարակի:
Թբիլիսիի քաղաքային խորհրդի (սակրեբուլո) այս նախաձեռնությանն արդեն իր աջակցությունն է հայտնել քաղաքապետ Կախա Կալաձեն:
Հրապարակի վերանվանումը պլանավորվում է 1918թ-ին Առաջին Հանրապետության հռչակման 100-ամյա հոբելյանի կապակցությամբ, հաղորդում է «Նովոստի-Գրուզիան»:
«Մայիսի 26-ը Վրաստանի անկախության վերականգնման օրն է և այս տարի նշվող Առաջին Ժողովրդավարական Հանրապետության հռչակման 100-ամյա հոբելյանը, ինչը մեր երկրի և Վրաստանի յուրաքանչյուր քաղաքացու համար կարևորագույն ամսաթիվ է: Այդ պատճառով էլ Թբիլիսիի սակրեբուլոյի նախաձեռնությունն ուղղված է մայրաքաղաքի գլխավոր հրապարակներից մեկն Առաջին Ժողովրդավարական Հանրապետության անունով կոչելուն», — հայտարարել է Թբիլիսիի սակրեբուլոն:
Թբիլիսիի քաղաքապետ Կախա Կալաձեն հայտարարել է, որ այդ հարցում ակնկալում է նաև հասարակության աջակցությունը: Նրա խոսքով՝ Թբիլիսիի սակրեբուլոն 20 օր ունի որոշում կայացնելու համար:
Սակայն վերանվանման նախաձեռնությունից դժգոհ է հասարակության մի մասն, այդ թվում՝ նախկին նախագահ Միխայիլ Սահակաշվիլիի կողմնակիցները: Նրանք կարծում են, որ այդպիսով, իշխող «Վրացական երազանքը» պայքարում է Սահակաշվիլիի ժառանգության և Վարդերի հեղափոխության ձեռքբերումների դեմ:
«Վարդերի հեղափոխության հրապարակ» անվանումն այդ հրապարակին տվել է Վրաստանի երրորդ նախագահ Միխայիլ Սահակաշվիլին, որը երկրում իշխանության էր եկել 2003թ-ի նոյեմբերին թավշյա հեղափոխությունից հետո, որը կոչվեց «Վարդերի հեղափոխություն»:
Հրապարակը, որի մասին հիշատակվում է, գտնվում է քաղաքի կենտրոնում՝ Ռուսթավելու մետրոյի մերձակայքում: ԽՍՀՄ տարիներին այն կոչվում էր Հանրապետության հրապարակ և այդ անվան տակ նկատի էր առնվում Վրացական Սոցիալիստական Հանրապետությունը:
Այդ վայրում նախորդ դարի 80-ական թվականներին ԽԱՀՄ Կոմկուսի Կենտկոմի գլխավոր քարտուղար Յուրի Անդրոպովի՝ Վրաստան կատարած այցի նախօրեին հուշարձան էր կանգնեցվել, որը պաշտոնապես կոչվում էր «Հանդիսությունների հրապարակի տրիբունայի տարածական կամարաշարք», սակայն օրիգինալ կառուցվածքի համար թբիլիսցիներն այն անվանում էին «Անդրոպովի ականջներ»:
Այդ նույն հրապարակում էր տեղակայված «Իվերիա» հյուրանոցը՝ խորհրդային Վրաստանի լավագույն հյուրանոցը, որն 90-ական թվականներին մի քանի տարի Աբխազիայի եկած հարյուրավոր փախստականների համար ապաստան դարձավ:
2005թ-ին, Սահակաշվիլիի որոշմամբ, «Անդրոպովի ականջներն» ապամոնտաժվեցին որպես ծանր խորհրդային անցյալի խորհրդանիշ: Իսկ հին «Իվերիայի» տեղը Radisson Blu միջազգային բրենդի հինգաստղանի հյուրանոց կառուցվեց:
