ԵՄ-ը պատրաստվում է նոյեմբերին ստորագրել Հայաստանի հետ համագործակցության նոր համաձայնագիրը
Այսօր Հայաստանում Erasmus+Youth տեղեկատվական կենտրոնի բացմանը նվիրված մամուլի ասուլիսի ժամանակ Հայաստանում Եվրամիության պատվիրակության ղեկավար, դեսպան Պյոտր Սվիտալսկին հայտարարել է, որ ԵՄ և Հայաստանի միջև Համապարփակ և ընդլայնված գործընկերության համաձայնագիրը ստորագրելուն որևէ բան այս պահի դրությամբ չի խանգարում:
«Պատասխանատու անձինք ջանասիրաբար աշխատում են, որպեսզի ԵՄ-Հայաստան նոր համաձայնագրի ստորագրումն իրականություն դառնա նոյեմբերին կայանալիք Արևելյան գործընկերության գագաթնաժողովի ընթացքում»,- ասել է նա:
Հայաստանի քաղաքական ու փորձագիտական որոշ շրջանակներ կասկածներ են հայտնում այս համաձայնագրի ստորագրման վերաբերյալ: Նրանք հիշեցնում են, որ 2013թ.-ին Հայաստանը պատրաստվում էր ԵՄ հետ ստորագրել Ասոցացման և Խորը, Համապարփակ ազատ առևտրի գոտու ստեղծման մասին համաձայնագրերը, բայց սեպտեմբերի 3-ին ՀՀ նախագահ Սերժ Սարգսյանն անակնկալ կերպով հայտարարեց, որ ՀՀ-ն հրաժարվում է Եվրամիության հետ ասոցացումից և հայտնում Մաքսային միությանը անդամակցելու մտադրության մասին: Ըստ տեսակետների՝ տեղի ունեցածը ոչ այլ ինչ էր, քան ճնշում Ռուսաստանի կողմից:
Պյոտր Սվիտալսկին տեղեկացրել է, որ ինքը նոր է վերադարձել Բրյուսելից, որտեղ զրույցներ է ունեցել մարդկանց հետ, ովքեր պատասխանատու են համաձայնագիրը ստորագրելու անհրաժեշտ հարցերը նախապատրաստելու համար: Նրանք, ըստ դեսպանի, փաստում են, որ ամեն ինչ իր հունով առաջ է շարժվում:
Ավելի վաղ ՀՀ նախագահ Սերժ Սարգսյանը «Բազե» համահայկական երիտասարդական հավաքի մասնակիցների հետ հանդիպման ժամանակ պատասխանելով ճամբարականների հարցերին, հայտարարել է, որ Հայաստանը ԵՄ-ի հետ աշնանը ստորագրելու է Համապարփակ և ընդլայնված գործընկերության համաձայնագիրը։
«Այո՛, մենք աշնանը ստորագրելու ենք: Ինչո՞ւ եմ այսպիսի համոզվածությամբ ասում, որովհետև փաստաթուղթն արդեն իսկ նախաստորագրված է: Մենք, եթե չեմ սխալվում, մարտ ամսին հայտարարեցինք, որ փաստաթուղթն արդեն, ընդհանուր առմամբ, բանակցված է, և դրանից հետո նախաստորագրեցինք: Մենք այդ փաստաթուղթը չստորագրելու որևէ պատճառ չունենք»,- նշել է Սերժ Սարգսյանը։
Հայաստանում Լիտվայի դեսպան Էրիկաս Պետրիկասը ևս խոսել է թեմայի շուրջ՝ նշելով, որ համաձայնագրի ստորագրումից հետո Հայաստանի համար նոր հնարավորություններ կստեղծվեն:
Հարցին՝ արդյոք հակասություն չկա՞ նրա մեջ, որ Հայաստանը Եվրասիական տնտեսական միության անդամ է, բայց նման համաձայնագիր է կնքում Եվրամիության հետ, դեսպանը պատասխանել է. «Դրանք իրար չեն հակասում, դա, հակառակը՝ օգնում է ավելի լավ համագործակցել: Երբ մենք խոսում ենք Եվրամիության 500 միլիոնանոց շուկայի մասին, դա ցույց է տալիս արդեն, թե Հայաստանն ինչքան հնարավորություններ կունենա, և Եվրամիությունը, Հայաստանի պես, նույնպես կունենա մեծ հնարավորություններ՝ կոնկրետ Իրանի հետ հարաբերություններում, որը ձեզ հետ լավ հարաբերությունների մեջ է: Այնպես որ, մենք մտածում ենք, որ երկու կողմերն էլ սրանից կօգտվեն»:
