ԱՄՆ պետքարտուղարը պաշտպանել է ադրբեջանցի փաստաբանին

ԱՄՆ պետքարտուղար Էնթոնի Բլինքենն Ադրբեջանի իշխանություններին կոչ է արել վերականգնել փաստաբան Շահլա Գումբաթովայի աշխատանքը։ Ադրբեջանի իշխանությունները դեռևս ոչ մի կերպ չեն արձագանքել դրան։ Ո՞վ է Շահլա Գումբաթովան։ Ինչո՞ւ են նրան հեռացրել աշխատանքից։

---

• Ռուսաց լեզուն պաշտոնական է հայտարարվել Ստեփանակերտում․ Բաքվի արձագանքը
• Հայաստանի տնտեսությունը «գրեթե վերականգնվե՞լ է»։ Նախարարը տարեվերջին երկնիշ աճ է ակնկալում

---

ԱՄՆ պետքարտուղարի թվիթը

2021 թ-ի մարտի 26-ին ԱՄՆ պետքարտուղար Էնթոնի Բլինքենը գրառում է արել Թվիթերում՝ ի աջակցություն ադրբեջանցի փաստաբան Շահլա Գումբաթովայի։

I was disturbed to hear that 2020 International #WomenOfCourage awardee Shahla Humbatova of Azerbaijan was disbarred for her work defending and advocating for human rights. We call for Shahla’s expedited reinstatement, and we will continue to stand with her.

— Secretary Antony Blinken (@SecBlinken) March 26, 2021

«Ես մտահոգվեցի, երբ իմացա, որ 2020 թ-ի Կանանց խիզախության միջազգային մրցանակի ադրբեջանցի դափնեկիր Շահլա Գումբաթովան զրկվել է իր փաստաբանական կարգավիճակից մարդու իրավունքների պաշտպանությանն ուղղված իր գործունեության համար։ Մենք կոչ ենք անում շուտափույթ վերականգնել Շահլայի աշխատանքը և շարունակելու ենք սատարել նրան», — նշել է Բլինքենը։

Ո՞վ է Շահլա Գումբաթովան

2020 թ-ին ադրբեջանցի փաստաբան Շահլա Գումբաթովան ներառվել է Կանանց խիզախության միջազգային մրցանակի (International Women of Courage Award) 12 դափնեկիրների ցուցակում։

Հայ լրագրողն ու ադրբեջանցի փաստաբանը Կանանց խիզախության միջազգային մրցանակի են արժանացել

International Women of Courage Award–ն ԱՄՆ Պետքարտուղարության ամենամյա մրցանակ է

ԱՄՆ պետքարտուղարի այս մրցանակը շնորհվում է 2007 թ-ից ի վեր ամեն տարի ողջ աշխարհի կանանց, որոնք քաջություն և առաջնորդություն են դրսևորել հանուն խաղաղության, արդարության, մարդու իրավունքների, գենդերային հավասարության  և կանանց իրավունքների և հնարավորությունների ընդլայնման պայքարի։

Շահլա Գումբաթովան այն սակավաթիվ փաստաբաններից մեկն է, որոնք պաշտպանում են իրավապաշտպաններին, լրագրողներին, բլոգերներին, ակտիվիստներին, ընդդիմադիրներին և ԼԳԲՏ համայնքի ներկայացուցիչներին, որոնց պետությունը հետապնդում է նրանց հայացքների կամ իրավունքների և ազատությունների պահպանման պահանջի համար։ Ընդ որում, Գումբաթովան ինքը պարբերաբար բախվում է սպառնալիքների և հետապնդման իր գործունեության պատճառով։

Ինչո՞ւ են նրան հեռացրել աշխատանքից

Միջազգային մրցանակը ստանալուց ուղիղ մեկ տարի անց Շահլա Գումբաթովան դուրս է մնացել Ադրբեջանի փաստաբանների կոլեգիայից։ Այդպես նա զրկվել է որպես պաշտպան դատարաններում ելույթ ունենալու իրավունքից։

Կոլեգիայից Գումբաթովային դուրս թողնելու մասին որոշումն ընդունվել է Բաքվի վարչական դատարանի կողմից։

Փաստաբանի կարծիքով՝ այդ որոշումը քաղաքական բնույթ է կրում։ Իսկ փաստաբանների կոլեգիան դա բացատրել է նրանով, որ Գումբաթովան չի վճարել կոլեգիայի անդամավճարը վեց ամիս շարունակ։