Ադրբեջանում հինգ տարվա ազատազրկումից հետո չեղարկել են ընդդիմադիր կուսակցության առաջնորդի դատավճիռը
Ադրբեջանի գերագույն դատարանն անսպասելիորեն Իլգար Մամեդովի գործը վերադարձրել է Շեքի քաղաքի Վերաքննիչ դատարանի կրկնակի քննմանը՝ բավարարելով փաստաբանի երկրորդ վճռաբեկ բողոքը: Հայտնի չէ, թե արդյոք այդ որոշումը կհանգեցնի նրան, որ Մամեդովին ավելի վաղ ազատ արձակեն, իսկ նրան դեռ 2 տարվա ժամկետ է մնացել, թե, ընդհակառակը, ժամկետը կերկարացվի: Այժմ նա բանտում է՝ չնայած նրան, որ դատավճիռը չեղարկվել է:
Իլգար Մամեդովի գործն Ադրբեջանի իշխանությունների, եվրոպական իրավապաշտպան կազմակերպությունների և Եվրախորհրդարանի միջև կռվախնձորներից մեկն է:
«Հանրապետական այլընտրանք» (ՌԵԱԼ) ընդդիմադիր կուսակցության առաջնորդ Իլգար Մամեդովը 2013թ-ին դատապարտվել է 7 տարվա ազատազարկման Իսմայիլի շրջանում հանրային անկարգությունների կազմակերպման մեղադրանքով:
Տվյալ պահին Իլգար Մամեդովն Ադրբեջանում դատապարտված ամենահայտնի ընդդիմադիրն է: Ի աջակցություն նրա՝ բազմիցս ելույթ են ունեցել խոշոր միջազգային կազմակերպություններ՝ նարառյալ ԵԽԽՎ-ն:
Դեռևս 2014թ-ին Մարդու իրավունքների եվրոպական դատարանը որոշում է կայացրել Իլգար Մամեդովին առանց պայմանի ազատ արձակելու մասին: Սակայն ադրբեջանի իշխանությունները հրաժարվել են կատարել այդ որոշումը, ինչի կապակցությամբ նախորդ տարվա դեկտեմբերին Եվրախորհրդի նախարարների կոմիտեն դատական քննություն է սկսել:
Ինչ վերաբերում է պլենումի նիստին, ապա Իլգար Մամեդովին դրա մասին հայտնել են ընդամենը մի քանի օր առաջ, և նիստին նա ներկա չէր:
«Հանրապետական այլընտրանքի» անդամներից մեկը՝ Էմին Բաբաևը, դեպքերի զարգացման այսպիսի կանխատեսումներ է անում.
«Գործը Շեքիի Վերաքննիչ դատարան ուղարկել նշանակում է նվազագույնը ևս 5-6 ամսով երկարաձգել Իլգարի ազատումը: Ըստ էության՝ նախորդ որոշումների չեղարկմանը զուգահեռ պետք էր նաև որոշում կայացնել նրան անհապաղ ազատ արձակելու մասին: Իսկ այսպես նրան կէտապավորեն Շեքի, և քննությունը կձգվի մոտավորապես մինչև նոյեմբեր: Հետո, ըստ ամենայնի, ժամկետի մնացած մասը պայմանական կհայտարարեն և Իլգարին ազատ կարձակեն՝ սահմանափակելով նրա տեղաշարժը»:
Ըստ Բաբաևի՝ իշխանությունների կողմից դա պարզապես «մանր վրեժ է այն բանի համար, որ Իլգարը չի ցանկացել ներման համար խնդրագիր ներկայացնել»:
Նման, սակայն ավելի վատատեսական կարծիք ունի ՌԵԱԼ-ի անդամ Նաթիգ Ջաֆարլին.
«Փաստացի, իշխանությունները ժամանակ են ձգում, որպեսզի ազատ չարձակեն Իլգարին, և ամեն ինչ հենց այս նպատակով են անում: Այժմ դատաքննությունն ամիսներ կտևի, իսկ արդյունքն անհայտ է… Եթե կառավարությունը գեթ մի քիչ մտածում է պետական շահերի մասին, Իլգարին պետք է ազատ արձակի Շեքիի դատարանի առաջին իսկ նիստին»:
Իլգար Մամեդովը կրել է իր պատժի 7-ից 5 տարին: Եթե դատարանը նոր դատավճիռ կայացնի, այդ հինգ տարիները կներառվեն նոր ժամկետի մեջ:
