Ադրբեջանում դժվարացել է «անվստահելի» կայքերի հասանելիությունը

Ադրբեջանի ինտերնետ—փրովայդերների մեծ մասն արգելափակել է 3 կայքի հասանելիություն, որոնք հաճախ քննադատական նյութեր էին հրապարակում կառավարության հասեցին: Դա «Ազադլիգ» (azadliq.info) ընդդիմադիր թերթի, «Մեյդան» առցանց հեռուստաալիքի (meydan.tv) և Ազատություն ռադիոկայանի ադրբեջանական ծառայության (azadliq.org) կայքերն են:

Կայքերի արգելափակումը սկսվել է մարտի 27-ի երկրորդ կեսին: Կեսգիշերին մոտ արգելափակումը հանվել է, իսկ առավոտյան՝ կրկին վերականգնվել:

Տրանսպորտի, կապի և հեռահաղորդակցությունների նախարարության մամուլի ծառայությունը հրաժարվել է մանրամասն մեկնաբանել այդ խնդիրը: «Մենք տեղեկատվություն չունենք ինչ-որ կայքերի արգելափակման մասին: Տեղեկություններ են տարածվում, թե ինչ-որ կայքերի մուտքեր արգելափակվել են, հնարավոր չէ էջ մտնել: Կես ժամ անց նորություն է հայտնվում, որ խնդիրը լուծվել է: Նկատի ունենք, որ կայքերի արգելափակման մասին տեղեկատվությունը չի հաստատվում», — նախարարության մամուլի ծառայության խոսքերն է մեջբերում Ազատություն ռադիոկայանը:

Մեդիահարցերի փորձագետ Ալեսքեր Մամեդլին բացառեց, որ կայքերի արգելափաման խնդիրն առանձին փրովայդերների տեխնիկական խնդիրն է: «Այդ դեպքում այլ կայքեր նույնպես չէին բացվի»: Մամեդլին նույնպես կասկածում է, որ այդ կայքերի վրա DDOS-հարձակում է տեղի ունեցել, քանի որ Ադրբեջանի սահմաններից դուրս բոլոր երեք կայքերը հանգիստ բացվում են:

Սա Ադրբեջանում «անվստահելի» կայքերի արգելափակման առաջին դեպքը չէ: Նախորդ տարվա վերջին նույնպես նմանատիպ խնդիրներ են եղել:

Contact.az առցանց պարբերականը որպես կայքերի արգելափակման հնարավոր պատճառ հետևյալ վարկածն է առաջ քաշում. «Այդ կայքերում վերջին ժամանակներս քննադատություն էր հայտնվում Մեհրիբան Ալիևայի՝ երկրի առռաջին փոխնախագահ նշանակման մասին», — գրում է contact.az:

Սակայն Ադրբեջանի որոշ ինտերնետ—փրովայդերներ դեռևս չեն միացել արգելափակմանը, այդ պատճառով էլ խնդրի պատճառների մասին հարցը դեռևս հստակ պատասխան չունի;